وڭىرلەردىڭ وندىرىستىك قۋاتىن ارتتىرۋ ماڭىزدى

قوستاناي وبلىسى ماشينا جاساۋ سالاسىن جۇيەلى تۇردە دامىتىپ كەلەدى. بيىل وڭىردە بىردەن بەس جاڭا ءوندىرىس ىسكە قوسىلماق. ساۋىردە شاعىن توراپتىق ادىسپەن جىلىنا 5 مىڭ بىرلىك «Jetour» ءاۆتوموبيلىن وندىرەتىن زاۋىت ىسكە قوسىلادى. ناتيجەسىندە, 200 جۇمىس ورنى اشىلادى. قازان ايىندا قۋاتتىلىعى جىلىنا 70 مىڭ اۆتوموبيل شىعاراتىن جاڭا «Kia» زاۋىتى اشىلماق. بۇل جوبا 1500 جاڭا جۇمىس ورنىن اشۋعا مۇمكىندىك بەرەدى. العاشقى كولىك بيىل شىلدەدە شىعارىلادى. اۆتوكولىك وندىرىسىن­دەگى لوكاليزاتسيالاۋ ۇلەسىن ارتتىرۋ ماقساتىندا بيىل قۋاتى جىلىنا 60 مىڭ دانا قوسالقى بولشەك (بوياۋ, پلاستيكالىق بۇيىمدار, پايدا­لانىل­عان گاز جۇيەلەرى, گەرمەتيكتەر, اۋديو­جۇيەلەر, ت.ب.) شىعاراتىن زاۋىت ىسكە قوسىلادى. 800 جۇمىس ورنى اشىلادى.

ءوندىرىس ونىمدىلىگىن ارتتىرۋ, ۇدەرىس­تەر­دى اۆتوماتتاندىرۋ جانە اۆتوكو­لىك ونىمدەرىنىڭ تۇرلەرىن كەڭەيتۋ ماق­ساتىندا جەتەكشى ءوستىڭ نەگىزگى بەرىلىستەرى مەن ارقالىقتارىن شىعاراتىن ەكى زاۋىت ىسكە قوسىلادى. بۇل جوبالار اياسىندا 650 جۇمىس ورنى اشىلادى. بۇدان باسقا, شوب-تى دامىتۋ ءۇشىن بيىل 150 ادامدى جۇمىسپەن قامتيتىن تىگىن جانە جيھاز تسەحتارىن ىسكە قوسۋ جوسپارلانعان.

قوستاناي وبلىسىنىڭ اكىمى قۇمار اقساقالوۆ ونەركاسىپتى دامىتۋ قورى ارقىلى جەڭىلدىكتى ليزينگ شەڭبەرىندە ەلىمىزدىڭ بارلىق وڭىرىنە قاجەت ارنايى ماقساتتاعى اۆتوتەحنيكا, اتاپ ايتقاندا قوقىس جينايتىن ماشينا ءوندىرىسىن ۇلعايتۋ ماسەلەسىن اتاپ ءوتتى. رەسپۋبليكالىق بيۋدجەتتەن سوڭعى قارجىلاندىرۋ 2023 جىلى بولىنگەن. ۆيتسە-پرەمەر ۇەم-گە بۇل ماسەلەنى «بايتەرەك» حولدينگىمەن بىرلەسىپ پىسىقتاۋدى تاپسىردى.

اۆتوكولىك ونەركاسىبىنىڭ دامۋىنا بايلانىستى قوستاناي وڭىرىندە كولىك-لوگيستيكالىق حاب قۇرۋ ماسەلەسى وزەكتى بولىپ وتىر. جوبانى قۋاتتىلىعى جىلىنا 400 مىڭ كونتەينەرگە دەيىن­گى يندۋستريالىق ايماقتا ىسكە اسىرۋ جوسپارلانۋدا. مەملەكەتتىك ساراپتاما قورىتىندىسى الىنعاننان كەيىن ينجەنەرلىك ينفراقۇرىلىمدى جۇرگىزۋگە قارجىلاندىرۋ قاجەت بولادى. جوبانى ىسكە اسىرۋ «سولتۇستىك – شىعىس» باعىتى بويىنشا حالىق­ارالىق كولىك-لوگيستيكالىق حاب قۇرۋعا جانە جۇك تاسىمالى كولەمىن 20%-عا ارتتىرۋعا مۇمكىندىك بەرەدى.

سولتۇستىك قازاقستان وبلىسى­نىڭ ءسۇت-تاۋارلى فەرمالارىن جەڭىلدە­تىل­گەن قارجىلاندىرۋ تاجىريبەسىن تاراتۋ باعدارلاماسى اياسىندا قوستا­ناي وبلىسىندا 10 ءسۇت-تاۋارلى فەرما­دان تۇراتىن جوبا پۋلى قالىپتاستى­رىلدى. بۇل جوبالاردى جۇزەگە اسىرۋ ءۇشىن قوسىمشا 31,7 ملرد تەڭگە قاجەت. بيىلدىڭ وزىندە وڭىردە ءۇش ءسۇت-تاۋارلى فەرمانى ىسكە قوسۋ جوس­پارلانىپ وتىر, بۇل ءسۇت ءوندىرىسىن 30%-عا ارتتىرۋعا مۇمكىندىك بەرەدى. وبلىس اكىمى جوبالاردى اشم باع­دار­لا­ماسى ارقىلى جەڭىلدەتىلگەن قار­جىلاندىرۋمەن نەسيەلەۋ ءۇشىن قاراجات ءبولۋ جونىندە ءوتىنىش ءبىلدىردى. ۆيتسە-پرەمەر ءسۇت-تاۋارلى فەرمالار قۇرىلىسىنا قولداۋ وڭىردە ءسۇتتى قايتا وڭدەۋ ءوندىرىسى قاتار ۇيىمداستىرىلعان جاعدايدا عانا كورسەتىلەتىنىن اتاپ ءوتتى.

2024–2028 جىلدار ارالىعىندا قوستاناي وبلىسى بويىنشا جالپى قۇنى 2,5 ترلن تەڭگە بولاتىن, 10,5 مىڭ جۇمىس ورنىن قۇرۋدى كوزدەيتىن 45 ينۆەستيتسيالىق جوبادان تۇراتىن پۋل قالىپتاستىرىلدى.

اقمولا وبلىسى بيىلعى جىلدىڭ ەكى ايىنىڭ قورىتىندىسى بويىنشا ەكونوميكا ءوسىمىنىڭ قارقىنى 12,1% بولعانىن كورسەتىپ وتىر.

وبلىس اكىمىنىڭ ورىنباسارى ەرنار جاركەشوۆ بيىل رەسپۋبليكالىق ماڭىزى بار «Aqmola» يندۋستريالىق ايماعىندا ءوڭىر ەكونوميكاسىن ارتاراپتاندىرۋعا جانە قوسىلعان قۇنى جوعارى وندىرىستەردى دامىتۋعا باعىتتالعان ءىرى ينۆەستيتسيالىق جوبالار بويىنشا قۇرىلىس-مونتاج جۇمىستارى باستالاتىنىن حابارلادى. سولاردىڭ ىشىندەگى نەگىزگى جوبا — «Dalian Hesheng Holdings» كومپانياسىنىڭ بيدايدى تەرەڭ وڭدەيتىن وندىرىستىك كەشەنىنىڭ قۇرىلىسى. جوبانىڭ ءبىرىنشى كەزەڭىنە شامامەن 650 ملن دوللار كولەمىندە ينۆەستيتسيا تارتۋ كوزدەلگەن. العاشقى كەزەڭدە جىلىنا 1 ملن تونناعا دەيىن بيداي وڭدەلمەك, ءارى قاراي بۇل كولەمدى ۇلعايتۋ مۇمكىندىگى بار. سونداي-اق شامامەن 1 مىڭ جۇمىس ورنى اشىلادى. اتالعان جوبانى ىسكە اسىرۋ جانە جالپى يندۋستريالىق ايماقتى دامىتۋ استانالىق اگلومەراتسيانىڭ دامۋىنا وڭ اسەر ەتىپ, ماياتنيكتىك كوشى-قوندى ازايتىپ, وڭىردە جاڭا جۇمىس ورىندارىن قۇرۋعا جانە جەرگىلىكتى حالىقتىڭ ءال-اۋقاتىن ارتتىرۋعا وڭ اسەرىن تيگىزەدى.

«بۇگىندە ۇكىمەت الدىندا 2029 جىلعا قاراي ءىجو-ءنى ەكى ەسە ارتتىرۋ مىندەتى تۇر. بۇل ماقساتقا جەتۋ ءۇشىن اتالعان مەرزىمگە دەيىن نەگىزگى كاپيتالعا سالىناتىن ينۆەستيتسيالار كولەمىن ءىجو-ءنىڭ 23%-ىنا دەيىن جەتكىزۋ قاجەت, بۇل 58,4 ترلن تەڭگە. ال بيىل نەگىزگى كاپيتالعا قۇيىلاتىن ينۆەستيتسيالار كولەمىن ءىجو-ءنىڭ 17%-ىنا جەتكىزۋ مىندەتى تۇر. بۇل 26,2 ترلن تەڭگە. ياعني وتكەن جىلمەن سالىستىرعاندا كەمىندە 35,2% ءوسىمدى قامتاماسىز ەتۋ. ءبىرىنشى توقسان قورىتىندىسى بويىنشا ءبىز وسى جىلى جالپى قوسىلعان قۇن اكەلەتىن جوبالاردى قارجىلاندىرۋ ارقىلى جۇزەگە اسىرىلاتىن باسىم مىندەتتەر تىزبەسىن قالىپتاستىرامىز. سونىمەن قاتار اۋىل شارۋاشىلىعى سالاسىنداعى جوبالاردى قارجىلاندىرۋ كەزىندە وڭدەۋ جوباسىن ۇيىمداستىرۋ بويىنشا قارسى مىندەتتەمەلەر قويىلاتىن بولادى. بۇل – ۇكىمەتتىڭ ينۆەستيتسيالىق تاپسىرىسىنا جاتادى», دەپ قورىتىندىلادى س.جۇمانعارين.