سۋرەت: pexels.com
ماڭعىستاۋ وبلىسىندا دا الەۋمەتتىك وسال توپ وكىلدەرىنىڭ تۇرعىن ءۇي جاعدايىن جاقسارتۋ جۇمىستارى جۇيەلى جۇرگىزىلىپ كەلەدى. وڭىردە «باقىتتى وتباسى» جانە «ناۋرىز» سياقتى مەملەكەتتىك تۇرعىن ءۇي باعدارلامالارى بەلسەندى تۇردە ىسكە اسىرىلىپ جاتىر. دەگەنمەن اقتاۋداعى ۋربانيزاتسيانىڭ جوعارى دەڭگەيىن, حالىق سانىنىڭ قارقىندى ءوسۋىن ەسكەرە وتىرىپ, تۇرعىن ۇيگە دەگەن سۇرانىس وزەكتى بولىپ قالا بەرەدى. قۇرىلىس كولەمىن ارتتىرۋ عانا ەمەس, جاڭا تۇرعىن اۋدانداردا ينفراقۇرىلىمنىڭ تەڭگەرىمدى دامۋىن قامتاماسىز ەتۋ ماڭىزدى. سوندا عانا تۇرعىن ءۇي شىن مانىندە جايلى بولادى.
سونىمەن قاتار مەملەكەت الەۋمەتتىك ينفراقۇرىلىمدى, اسىرەسە ەرەكشە قاجەتتىلىكتەرى بار ادامداردى وڭالتۋ, قولداۋ سالاسىن دامىتۋعا قاتىستى ماڭىزدى قادامدار جاسالادى. پرەزيدەنت قۇرىلتايدا سەمەي, تاراز, كەنتاۋ, ورال قالالارىندا زاماناۋي وڭالتۋ ورتالىقتارى اشىلعانى تۋرالى ايتتى. 2026 جىلعا دەيىن اقتوبە, اتىراۋ, كوكشەتاۋ, شىمكەنت, تالدىقورعاندا وڭالتۋ ورتالىقتارىن سالۋ جوسپارلانىپ وتىرعانىن ەرەكشە اتاپ ءوتتى. بۇل ايتارلىقتاي جەتىستىك بولعانىمەن, مۇنداي مەكەمەلەرگە دەگەن قاجەتتىلىك ءالى دە جوعارى. بۇل مەكەمەلەردىڭ تولىققاندى جۇمىس ىستەۋى ءۇشىن بىلىكتى ماماندارمەن, زاماناۋي جابدىقتارمەن, تيىمدىلىگى دالەلدەنگەن ادىستەرمەن قامتاماسىز ەتۋ قاجەت. ماڭعىستاۋ وبلىسىندا دا ەرەكشە قاجەتتىلىكتەرى بار ادامداردى وڭالتۋعا ارنالعان مامانداندىرىلعان ورتالىقتاردىڭ جەتىسپەۋشىلىگى بايقالادى. وڭىردە اۋتيزم سپەكترى بۇزىلعان (اسب), دامۋ ەرەكشەلىكتەرى بار بالالاردىڭ سانى ايتارلىقتاي كوپ, بىراق مامانداندىرىلعان مەكەمەلەر جەتكىلىكسىز. اتا-انالار ەلدىڭ باسقا وڭىرلەرىنە جۇگىنۋگە ءماجبۇر. بۇل قارجىلىق, لوگيستيكالىق قيىندىقتار تۋدىرادى.
پرەزيدەنت قۇرىلتايدا ەلىمىز الەۋمەتتىك مەملەكەت ەكەنىنە, سوندىقتان دا ءبىلىم بەرۋ, دەنساۋلىق ساقتاۋ سالالارىنا ينۆەستيتسيا سالۋدى جالعاستىرا بەرەتىنىنە, شىن مۇقتاج ازاماتتارعا عانا كومەك كورسەتىلۋى كەرەكتىگىنە دە باسا نازار اۋداردى. بۇل باعدارلامالاردى مەملەكەتتىك رەسۋرستاردىڭ ەسەبىنەن قارجىلاندىرۋ ازدىق ەتەدى. ولارعا قايىرىمدىلىق ۇيىمدارى مەن جەكە ينۆەستورلاردىڭ قولداۋى قاجەت. «قازاقستان حالقىنا» قورى بۇل سالادا وڭ ناتيجەلەر كورسەتىپ وتىر. دەگەنمەن وسى باستامالاردى ىسكە اسىرۋدى جەدەلدەتۋگە جەرگىلىكتى بيلىك ورگاندارى مەن كاسىپكەرلىك سەكتورىن, اسىرەسە, بيزنەستى وڭالتۋ ينفراقۇرىلىمىن تارتۋ تابىسقا جەتۋدىڭ ماڭىزدى فاكتورى بولا الادى.
ەرەكشە قاجەتتىلىكتەرى بار بالالاردى وقىتۋ – مەملەكەت ءۇشىن قاعيداتتى ماسەلە. تەك بىلىمگە قول جەتكىزۋدى قامتاماسىز ەتۋ عانا ەمەس, ونىڭ ساپاسىن ارتتىرۋ, ينكليۋزيۆتى ءبىلىم بەرۋ جاعدايلارىن جاساۋ قاجەت. وسى ماقساتتا جىل سوڭىنا دەيىن بالالاردى كەشەندى قولداۋدى, ونىڭ ىشىندە ءبىلىم بەرۋ, مەديتسينالىق, الەۋمەتتىك اسپەكتىلەردى ەسكەرەتىن جاڭا زاڭ ازىرلەنۋگە ءتيىس. ماڭعىستاۋ وبلىسىندا دا ينكليۋزيۆتى ءبىلىم بەرۋ مۇمكىندىكتەرىن كەڭەيتۋ, جالپى ءبىلىم بەرەتىن مەكتەپتەردە ارنايى سىنىپتار قۇرۋ, مۇعالىمدەردى ەرەكشە قاجەتتىلىكتەرى بار بالالارمەن جۇمىس ىستەۋدىڭ زاماناۋي ادىستەرىنە وقىتۋ قاجەت.
بۇل شارالاردى جۇزەگە اسىرۋ كەشەندى ءتاسىلدى, ۆەدومستۆوارالىق ءوزارا ءىس-قيمىلدى تالاپ ەتەدى. تەك سوندا عانا قويىلعان ماقساتتارعا قول جەتكىزۋگە, ەلىمىزدە شىن مانىندە قولجەتىمدى, ءتيىمدى الەۋمەتتىك قولداۋ جۇيەسىن قۇرۋعا بولادى.
اسەم كۇلباەۆا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ باس ساراپشىسى
