دەگدار كومپوزيتوردىڭ مەرەيتويىنا ارنالعان كونتسەرتكە قازاقستاننىڭ ەڭبەك سىڭىرگەن قايراتكەرلەرى – سۆەتلانا ايتباەۆا, ازامات جىلتىركوزوۆ, جۇبانىش جەكسەن ۇلى, نۇرجان جانپەيىسوۆ, حالىقارالىق جانە رەسپۋبليكالىق بايقاۋلاردىڭ لاۋرەاتتارى فەرۋزا راحمەتوۆا, ارتۋر عابديەۆ, راسۋل جارماعامبەت, نۇرعالىم امانباي, فارحاد كوبەەۆ, نازەركە ومىرباەۆا قاتىسىپ, ونەر كورسەتتى. سونىمەن بىرگە كومپوزيتوردىڭ جيەن نەمەرەسى – دايانا تىلەنديەۆا, قازىبەك قۇرايىش, ن.تىلەنديەۆ اتىنداعى مەملەكەتتىك اكادەميالىق, فولكلورلى-ەتنوگرافيالىق «وتىرار سازى» وركەسترى, ە.راحماديەۆ اتىنداعى مەملەكەتتىك اكادەميالىق فيلارمونيانىڭ سيمفونيالىق وركەسترى, ب.بايقاداموۆ اتىنداعى مەملەكەتتىك حور كاپەللاسى قاتىستى.
– اكەم 70-كە تولعاندا مەرەيتويى 1995 جىلى وپەرا جانە بالەت تەاترىندا وتكەن. ول كەزدە مەن 10 جاستا بولاتىنمىن. دۇركىرەتىپ تويىن وتكىزىپ ەدىك, بيىل دا مەرەيتويلىق كەشكە كوپتەن دايىندالىپ كەلدىك. بۇگىنگى كونتسەرت وتە ەرەكشە بولدى. كەرەمەت انشىلەر اكەمنىڭ ايگىلى اندەرىن ناقىشىنا كەلتىرىپ ورىنداپ شىقتى. «قۇستار ءانى», ء«وز ەلىم» اندەرى بۇكىل حالىققا تاراعان, ءتىپتى حالىق اندەرى بولىپ كەتكەنى ەلگە ءمالىم, – دەدى ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ كوركەمدىك جەتەكشىسى ءدىنزۋحرا تىلەنديەۆا.
كۇيشى-كومپوزيتوردىڭ ءوزى نەگىزىن سالىپ كەتكەن «وتىرار سازى» وركەسترى ن.تىلەنديەۆتىڭ 20-عا جۋىق كۇيلەرى مەن اندەرىن ورىندادى. ونىڭ باس ديريجەرى جانە كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى ءدىنزۋحرا نۇرعيساقىزى. سونىمەن قاتار ەكىنشى ديريجەر رەتىندە قازاقستاننىڭ ەڭبەك سىڭىرگەن ءارتىسى, «قۇرمەت» وردەنىنىڭ يەگەرى, پروفەسسور جالعاسبەك بەگىندىكوۆ ونەر كورسەتتى. وركەستر كونتسەرتتى كومپوزيتوردىڭ «اتا تولعاۋى» كۇيىمەن باستاپ, ودان ءارى ساز يەسى ۇلتىمىزدىڭ بەلگىلى اقىندارىنىڭ ولەڭىنە جازعان «جان ساۋلەم», «اباي تابيعاتى», «ەسىڭە مەنى العايسىڭ», ء«وز ەلىم», «قارلىعاشتار», «كۋا بول», «داريعا, دومبىرامدى بەرشى ماعان!», «اكەمە», «اجەمە», «جۇرەگىم مەنىڭ», «اق قۇسىم», «الاتاۋ» اندەرىن ورىندادى.
ءان-كۇي ونەرىنىڭ دانىشپانى قازاق حالقىنىڭ مۋزىكا مادەنيەتىن الەمدىك دەڭگەيگە كوتەرگەنى داۋسىز. بۇگىندە كومپوزيتوردىڭ مەرەيتويى يۋنەسكو-نىڭ شەشىمىمەن حالىقارالىق مەرەكەلىك ءىس-شارالار تىزىمىنە ەنىپ, الەمدىك اۋقىمدا اتالىپ وتىلەدى.
«القيسسا – نۇرعيسا» – عاسىرلىق مەرەيتويلاردىڭ رەسمي باستاماسى, بەتاشارى ىسپەتتى. تۇتاس عۇمىرىن ونەر جولىنا ارناعان داۋىلپاز نۇرعيسا 500-دەن استام مۋزىكالىق ەڭبەكتى ۇلتىنا مۇرا ەتسە, ونىڭ ىشىندە اندەر مەن كۇيلەردەن بولەك, بالەت, پەسا, وپەرا, فيلمدەرگە جازىلعان مۋزىكالار مەن ۋۆەرتيۋرالار, ەلەگيالار مەن پوەمالار, كونتاتالارى بار. دارا تالانت سونىمەن بىرگە ەلىمىزدىڭ التىن قورىنا ەنگەن 20-دان استام كينوتۋىندىعا مۋزىكا جازعان.
كونتسەرت بارىسىندا كۇيشىنىڭ «ماحامبەت», «القيسسا», « ۇلى توي», «اققۋ» سىندى ەلگە تانىمال كۇيلەرى دە ورىندالدى. كەش سوڭى كوپشىلىكتىڭ بىرگە شىرقاۋىمەن «قۇستار قايتىپ بارادى» انىمەن قورىتىندىلاندى. مادەنيەت جانە اقپارات مينيسترلىگىنىڭ قولداۋىمەن وتكەن كونتسەرتتە ساحناعا پرەزيدەنت اتىنان ىقىلاس گ ۇلى اكەلىندى.
