فوتو: اشىق دەرەككوز
جامبىل وبلىسىنىڭ «قازسۋشار» فيليالى مەن شۋ-تالاس باسسەيندىك ينسپەكتسياسىنىڭ باسشىلارى سوزاق اۋدانىنا بارىپ, شۋ وزەنىنىڭ ارناسىن ءوز بەتىنشە بۇرۋ نەمەسە زاڭسىز بوگەت سالۋ فاكتىلەرى انىقتالماعانىنا كوز جەتكىزدى. مينيسترلىك بارلىق سۋ پايدالانۋشىلار مەن سۋارمالى القاپتار بەلگىلەنگەن ليميت اياسىندا سۋمەن قامتىلىپ جاتقانىن مالىمدەدى.
«اتاپ ايتقاندا, 2024 جىلدىڭ قىركۇيەك ايىنان باستاپ تاسوتكەل سۋ قويماسىنان شۋ وزەنىنىڭ تومەنگى ارناسىنا 1 ملرد 356 ملن م3 سۋ جىبەرىلدى. جىل سوڭىنا دەيىن تاعى 44 ملن م3 سۋ جىبەرۋ جوسپارلانىپ وتىر. 2025 جىلعى 27 ناۋرىزدا شۋ وزەنىنىڭ سۋى سوزاق اۋدانىنىڭ جۋانتوبە اۋىلدىق وكرۋگىنە جەتتى. قازىرگى تاڭدا سۋ اۋدان شەكاراسىنان 80 شاقىرىم ىشكە قاراي تارالىپ جاتىر. بەينەجازبادا كورسەتىلگەن بوگەت, مويىنقۇم اۋىلدىق وكرۋگىنىڭ تۇسىندا 1970 جىلدارى سالىنعان جانە ونى سۋ شايىپ كەتپەس ءۇشىن جەرگىلىكتى اكىمدىك جىل سايىن نىعايتۋ جۇمىستارىن جۇرگىزەدى. راداي وزەگى بويىنداعى بوگەت شۋ وزەنىنىڭ سۋىن سوزاق اۋدانىنا جىبەرۋ جانە 10 مىڭعا جۋىق تۇرعىنى بار كومسومول جانە مويىنقۇم ەلدى مەكەندەرىنىڭ تۇرعىندارى مەن شارۋا قوجالىقتارىن سۋ شايىپ كەتۋ قاۋىپىنەن ساقتاۋ ماقساتىندا بوي كوتەرگەن», دەلىنگەن حابارلامادا.
مينيسترلىك شۋ وزەنىنىڭ اعىسىن رەتتەۋ جانە بوگەتتىڭ بۇزىلۋىنىڭ الدىن الۋ ءۇشىن راداي وزەگىنىڭ باسىنا سۋ رەتتەگىش قۇرىلعى ورناتۋ تۋرالى شەشىم قابىلدانعانىن حابارلادى.
«بۇل قۇرىلعى سۋدىڭ تابيعي اعىسىن كەزەڭ-كەزەڭىمەن, قاۋىپسىز جانە ءتيىمدى باسقارۋعا, سۋدى شۋ وزەنىنىڭ نەگىزگى ارناسىمەن جىبەرۋ جانە سوزاق اۋدانىنا سۋدى جەتكىزۋ ۋاقىتىن ازايتۋعا باعىتتالعان. قازىرگى ۋاقىتتا, جەرگىلىكتى اكىمدىك جوبالىق-سمەتالىق قۇجاتتاماسىن ازىرلەپ جاتىر», دەلىنگەن حابارلامادا.
ايتا كەتەيىك, اۋدان اكىمدىگىنىڭ مالىمەتى بويىنشا شۋ وزەنىنىڭ بويىنداعى مويىنقۇم اۋدانى اۋماعىندا 68 شاعىن شارۋا قوجالىعى جانە جالپى سانى 7500 ءىرى قارا مالى بار ەكى ءىرى جشس بار.
سۋ رەسۋرستارى جانە يرريگاتسيا مينيسترلىگى وزەننىڭ بويىندا ورنالاسقان اۋداندارعا تۇراقتى تۇردە سۋ جەتكىزۋدى باستى مىندەتتەردىڭ ءبىرى دەپ سانايدى. وسىعان وراي, الداعى جىلدا سۋمەن قامتاماسىز ەتۋ ءۇشىن تاسوتكەل سۋ قويماسىنا 470 ملن م³ سۋ جيناۋ جوسپارلانعان.
مينيسترلىكتىڭ مالىمەتىنشە, وزەن بويىندا 500 سۋ سورعى بار, زاڭسىز قويىلعان 17 سۋ سورعىسى انىقتالىپ, ولارعا ايىپپۇل سالىنعان.
بۇعان دەيىن ءماجىلىس دەپۋتاتى ماقسات تولىقباي قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە شۋ وزەنىنىڭ زاڭسىز بۇرىلۋىنا قاتىستى ماسەلە كوتەرگەنىن حابارلاعان ەدىك.
