قمگ باسشىسى اسحات حاسەنوۆ اۋقىمدى جوبا مەملەكەت باسشىسى قاسىم-جومارت توقاەۆتىڭ ەلىمىزدىڭ باتىسىندا مۇناي-گاز-حيميا ونەركاسىبى كلاستەرىن دامىتۋ جونىندەگى تاپسىرماسى اياسىندا جۇزەگە اسىرىلىپ جاتقانىن اتاپ ءوتتى.
– زاۋىت ونەركاسىپ سالالارىندا قولدانىلاتىن پوليەتيلەننىڭ جيىرمادان اسا ءتۇرىن شىعارۋعا قاۋقارلى. جوبا قۇرىلىس كەزەڭىنىڭ وزىندە-اق ۇلتتىق ەكونوميكاعا مۋلتيپليكاتيۆتى وڭ اسەرىن تيگىزىپ, ەلىمىزدىڭ شيكىزاتتىق ەمەس ەكسپورتىن ارتتىرۋعا ىقپال ەتەدى. «سيللەنو» ونىمدەرى ەلدەگى پوليەتيلەن يمپورتىنىڭ 90%-ىن الماستىرا الادى, – دەدى ا.حاسەنوۆ.
ۇلتتىق ستاتيستيكا بيۋروسىنىڭ مالىمەتىنشە, 2024 جىلى وتاندىق پوليەتيلەن نارىعى شامامەن 300 مىڭ تونناعا جەتتى. ساراپشىلاردىڭ باعالاۋىنشا, 2035 جىلعا دەيىن بۇل كورسەتكىش 400 مىڭ تونناعا دەيىن ءوسۋى مۇمكىن. ەندەشە, جەرگىلىكتى تۇتىنۋشىلاردىڭ سۇرانىسىن «سيللەنو» قامتاماسىز ەتۋگە دايىن. «سيللەنو» جشس باس ديرەكتورى جاندوس قايرگەلدى بالاماسى جوق بىرەگەي جوبانى جۇزەگە اسىرۋ بارىسىنا توقتالدى.
– بۇگىن ۇكىمەت پەن اكتسيونەرلەردىڭ قولداۋىمەن نەگىزگى قۇرىلىس جۇمىستارىنا قادام باسىپ وتىرمىز. «سيللەنو» – وتاندىق وڭدەۋ ونەركاسىبىندەگى ءىرى جوبالاردىڭ ءبىرى. جىلىنا 1,25 ملن توننا پوليەتيلەن وندىرەتىن جانە ينۆەستيتسيا كولەمى 7 ملرد دوللاردى قۇرايتىن زاۋىت قۇرىلىسىن 2028 جىلى اياقتاپ, ءوندىرىستى 2029 جىلى ىسكە قوسۋ جوسپارلانىپ وتىر, – دەيدى.
جوبانىڭ ىشكى جالپى ونىمگە قوساتىن ۇلەسى شامامەن 0,9-1% دەڭگەيىندە باعالانىپ وتىر. قۇرىلىس كەزىندە 8 مىڭنان استام, ال زاۋىت ىسكە قوسىلعاندا 800-گە جۋىق تۇراقتى جۇمىس ورنى اشىلادى. سونداي-اق قۇرىلىسپەن بىرگە, ورتا جانە جوعارى بۋىن مامان دايارلاۋ ءىسى دە قاتار جۇرەدى. ماسەلەن, يسپانيالىق مەردىگەر مەكەمە جىل سايىن جەرگىلىكتى 30 ستۋدەنتتى وقىتىپ شىعارماق.
جوباعا الەمنىڭ ەڭ وزىق جاڭا تەحنولوگيالارى تارتىلادى. بولاشاق كەشەن امەريكالىق «Lummus» كومپانياسىنىڭ تەحنولوگياسىمەن ەتيلەن وندىرۋگە ارنالعان پيروليز قوندىرعىسىنان جانە «Chevron Phillips Chemical», «Univation Technologies» (اقش) تەحنولوگيالارىنىڭ كومەگىمەن ەتيلەندى پوليمەرلەۋ قوندىرعىلارىنان, سونداي-اق, «Axens» (فرانتسيا) تەحنولوگياسىمەن سالىناتىن بۋتەن قوندىرعىسىنان تۇرادى. قۇرىلىس الاڭىنداعى العاشقى دايىندىق جۇمىستارى پيروليز قوندىرعىسىنان باستالدى. ونىڭ قۇرىلىسىن EPC-مەردىگەر رەتىندە «Tecnicas Reunidas» (يسپانيا) «Sinopec Engineering Incorporation» (قىتاي) كومپانياسىمەن بىرلەسىپ جۇرگىزەدى.
— وسىلايشا, ەلىمىزدىڭ باتىس ءوڭىرى مۇناي-گاز-حيميا كلاستەرىنە اينالماق. مەملەكەت باسشىسى ايتىپ وتكەندەي, جوبالاردى تەك جۇزەگە اسىرىپ قويماي, سونىڭ اياسىندا ارنايى كلاستەرلەر قۇرۋ ماڭىزدى. ويتكەنى بازالىق ءونىم شىعارۋ ازدىق ەتەدى. پوليەتيلەننەن كوپتەگەن دايىن ءونىم جاساپ شىعارۋعا بولادى. بۇگىندە ول – الەمدە ەڭ كوپ تۇتىناتىن شيكىزات ونىمدەرىنىڭ ءبىرى, – دەيدى ا.حاسەنوۆ.
ايتا كەتەيىك, «سيللەنو» كومپانياسىنىڭ اكتسيونەرلەرى – قازمۇنايگاز (40%), «Sinopec Overseas Investment Holding» (30%) جانە سيبۋر (30%). زاۋىت قازاقستاننىڭ پوليەتيلەنگە دەگەن ىشكى سۇرانىسىن قامتاماسىز ەتە وتىرىپ, ونىمدەرىن تمد ەلدەرىنە, ەۋروپا, قىتاي جانە تۇركياعا جەتكىزۋدى جوسپارلاپ وتىر.
اماندىق ساعىنتاي ۇلى
