رەكورد اۆتورى – نەمات نارحوجاەۆ. «كامال اتا» ءدامحاناسىنىڭ باس اسپازى. ونىڭ سوزىنشە مۇنداي سامسا ءپىسىرۋ وڭاي ەمەس, سول ءۇشىن ەكى اپتاداي دايىندالىپتى. دەگەنمەن ونىڭ كادىمگى سامسادان ەش ايىرماشىلىعى جوق ەكەنىن ايتادى. قامىرى دا, ىشىندەگى قوسپاسى دا بىردەي. تەك كولەمى عانا ۇلكەن. اسپاز ءبىرىنشى كەزەكتە ۇيىندە ءپىسىرىپ كورگەن. ونىسى 17 كيلو شىققان. ال فەستيۆالدا, جوعارىدا ايتىلعانداي 24 كيلو ەتىپ ءپىسىردى.
جالپى, ء«دامداسTour» فەستيۆالى شىمكەنتتە 2022 جىلدان بەرى ءوتىپ كەلەدى. ءىس-شارا قالا تۇرعىندارى مەن قوناقتارىنا ەرەكشە ۇناپ قالعاندىقتان, جەرگىلىكتى اكىمدىك ونى جىل سايىن ۇيىمداستىرۋدى ۇيعارعان. مۇنداعى ماقسات – شاھاردىڭ بۇرىننان كەلە جاتقان ءداستۇرلى تاعامدارى مەن قوناقجايلىلىعىن ناسيحاتتاپ, ەلگە تۋريستەر تارتۋ. شىمقالا ءوزىنىڭ باي اسحاناسىمەن تانىمال. ونى مۇنداي دارەجەگە كوتەرگەن وڭتۇستىك ولكەدەگى ءتۇرلى مادەنيەتتەردىڭ ءبىر-بىرىمەن توعىسۋى. ءارى مول داستارقان قازاق حالقىنىڭ كەڭ پەيىلى مەن دارقان كوڭىلىنىڭ ءبىر كورىنىسى ىسپەتتى.
فەستيۆالدا قالانىڭ ەلۋدەن استام ءدامحاناسى مەن تاماق يندۋسترياسىنداعى كاسىپورىندارى قاتىسىپ, ءوز ونىمدەرىن كەلۋشىلەر نازارىنا ۇسىندى. سونداي-اق جەرگىلىكتى قولونەرشىلەر دە ءوز بۇيىمدارىن قوناقتارعا تانىستىردى. سونىمەن بىرگە مەرەكە اياسىندا موتوسپورتتىق ءىس-شارا ۇيىمداستىرىلدى. رەسپۋبليكانىڭ ءار وڭىرىنەن جانە قىرعىزستان, وزبەكستان, تاجىكستان ەلدەرىنەن كەلگەن موتوبايكەرلەر وزدەرىنىڭ ەرەكشە قىزىقتى موتوشوۋى مەن موتوشەرۋىن وتكىزدى.
فەستيۆال وتشاشۋ مەن ەسترادا جۇلدىزدارىنىڭ مەرەكەلىك كونتسەرتىنە ۇلاستى.
شىمكەنت
