كرەاتيۆتى ءوندىرىس سالاسىندا قولونەرشىلىك باسىم باعىتتاردىڭ ءبىرى سانالىپ, جالپى كرەاتيۆتى نارىقتىڭ ۇشتەن ءبىرىن قۇرايدى. بۇگىندە ەلىمىزدە, شامامەن 46 مىڭ قولونەرشىلىك سۋبەكتىسى تىركەلگەن. نەگىزىنەن قولونەر ورتالىقتارى ەلدىڭ وڭتۇستىگىندە – تۇركىستان, تاراز, شىمكەنت قالالارىندا شوعىرلانعان. جۋىردا تۇركىستانعا «قولونەرشىلەر قالاسى» مارتەبەسى بەرىلدى. «ارنايى مارتەبە تۋرالى» زاڭعا سايكەس جەرگىلىكتى بيۋدجەت ەسەبىنەن قولونەرشىلەردىڭ شىعىندارىن 10-25% كولەمىندە وتەۋ جۇيەسى قاراستىرىلعان.
كەزدەسۋ بارىسىندا مادەنيەت جانە اقپارات ۆيتسە-ءمينيسترى ەۆگەني كوچەتوۆ كرەاتيۆتى ءوندىرىستى قولداۋدىڭ ەكىنشى پاكەتى ازىرلەنىپ جاتقانىن اتاپ ءوتتى. ونىڭ ىشىندە قولونەرشىلەردى قولداۋ قۇرالدارى دا بار.
«بۇل وتە اۋقىمدى زاڭ. بۇگىن وسى سالانىڭ ماماندارىن شاقىرىپ, وي-پىكىرلەرى مەن ۇسىنىستارىن تىڭداپ وتىرمىز. ايتىلعان ءار ماسەلەنىڭ جانى بار. ءبارى قاعازعا ءتىزىلىپ, زاڭ جوباسى اياسىندا قارالاتىن بولادى», دەدى ءماجىلىس دەپۋتاتى نۇرگۇل تاۋ.
جيىن بارىسىندا قولونەرشىلەرگە كورمە الاڭدارىن ۇسىنۋ جانە ولاردىڭ ونىمدەرىن كوممەرتسيالاندىرۋ ماسەلەلەرى دە تالقىلاندى.
ايتا كەتسەك, بيىل كرەاتيۆتى ءوندىرىستى قولداۋ جانە دامىتۋ تۋرالى زاڭ قابىلداندى.
سونداي-اق جاڭا بيۋدجەت كودەكسىنە سايكەس بىرىڭعاي لوتەرەيا وپەراتورى ءتۇسىمىنىڭ 3%-ى توقسان سايىن كرەاتيۆتى يندۋستريالاردى دامىتۋعا قولداۋ كورسەتۋ قورىنىڭ ەسەبىنە اۋدارىلىپ وتىرادى. بۇل قور 2025 جىلدىڭ شىلدە ايىنان باستاپ جۇمىس ىستەي باستايدى.
كەزدەسۋ بارىسىندا ءماجىلىس دەپۋتاتى امانجول ءالتاي ەلىمىزدە قولونەرشىلەر كۇنىن بەلگىلەۋدى جانە «حالىق شەبەرى» ۇلتتىق سىيلىعىن تاعايىنداۋدى ۇسىندى. بۇل ماسەلە ءماجىلىستىڭ الەۋمەتتىك-مادەني دامۋ كوميتەتىنىڭ وتىرىسىندا قارالاتىن بولادى.
