كەشكى ۋاقىتتا ۇيىنە قايتىپ كەلە جاتقان قالا تۇرعىنى «جەتىسۋ رەزورت» كەشەنىنىڭ ماڭىندا تانىسىنىڭ كولىگىن بايقاپ قالادى. ونىمەن امانداسپاق بولىپ ىشكە كىرگەندە, ونى تابا المايدى. تەلەفون سوققانىمەن, جاۋاپ الا المايدى. الاڭداعان ەر ادام ىزدەۋ جۇمىستارىن باستاپ, جەرتولەگە تۇسەدى. سول جەردە تيمۋردىڭ تەلەفونىن, كىلتىن جانە كيىمدەرىن كورىپ, ءارى قاراي ءوتىپ, ونى بوياۋ قالدىقتارى بار كەڭىستىكتىڭ ىشىندە ەس-ءتۇسسىز جاتقان جەرىنەن تابادى.
ۋاقىتتى بوسقا وتكىزبەي, ەر ادام كوشەگە جۇگىرىپ شىعىپ, ءوتىپ بارا جاتقان پاترۋلدىك پوليتسيا كولىگىن بايقاپ, كومەككە شاقىرادى. كومەككە بىردەن كاپيتان ازامات قازىباەۆ پەن ەلدار امانگەلدين, جانە اعا لەيتەنانت جاناتبەك احمەتوۆ كەلگەن. پوليتسەيلەر جەدەل ارەكەت ەتىپ, زارداپ شەككەن ازاماتتى سىرتقا شىعارىپ, العاشقى مەديتسينالىق كومەك كورسەتكەن. كەيىن وقيعا ورنىنا جەدەل جاردەم كەلىپ, جاس جىگىتتى دارىگەرلەرگە تابىستاعان. قالالىق اۋرۋحانانىڭ انەستەزيولوگ-رەانيماتولوگىنىڭ ايتۋىنشا, پوليتسيا قىزمەتكەرلەرىنىڭ ۋاقتىلى ارەكەت ەتۋى جاس جىگىتتىڭ ءومىرىن ساقتاپ قالۋدا شەشۋشى ءرول اتقارعان.
ايتا كەتەيىك, پوليتسيا كاپيتانى ازامات قازىباەۆ بۇعان دەيىن دە باتىلدىق تانىتقان. 2011 جىلى ول جاپونيا مەن وڭتۇستىك كورەيا دەلەگاتسياسىن تاسىمالداعان اۆتوبۋستى «اق-بۇلاق» كەشەنىنە قاراي الىپ بارا جاتقان. الماتى – كوكپەك – كوكتال تاسجولىنىڭ 13-شاقىرىمىندا قارسى باعىتقا «Subaru Impreza» اۆتوكولىگى شىعىپ كەتىپ, اۆتوبۋسقا سوعىلۋ قاۋپى تۋىنداعان. سول كەزدە كاپيتان قازىباەۆ ءوز پاترۋلدىك كولىگىمەن جولدى جاۋىپ, سوققىنى وزىنە قابىلداپ, ۇلكەن اپاتتىڭ الدىن العان. وسى ەرلىگى ءۇشىن ول مەملەكەت باسشىسىنىڭ جارلىعىمەن «ەرلىگى ءۇشىن» مەدالىمەن ماراپاتتالعان.
جەتىسۋ وبلىسىنىڭ پوليتسيا دەپارتامەنتى بەي-جاي قاراماي, ازاماتتى قۇتقارۋعا كومەكتەسكەن تۇرعىنعا العىس بىلدىرەدى جانە توتەنشە جاعدايلاردا جەدەل ارەكەت ەتۋدىڭ ماڭىزدىلىعىن ەسكە سالادى.
