پالاتا سپيكەرى سلوۆەنيا قازاقستاننىڭ ەۋروپالىق وداقتاعى سەنىمدى جانە ماڭىزدى سەرىكتەستەرىنىڭ ءبىرى ەكەنىن اتاپ ءوتتى. سونىمەن قاتار ماۋلەن اشىمباەۆ پارلامەنتارالىق دەڭگەيدە, ونىڭ ىشىندە حالىقارالىق ۇيىمدار اياسىندا ءوزارا ءىس-قيمىلدى ودان ءارى ارتتىرۋدىڭ ماڭىزدى ەكەنىن ايتتى.
«قازاقستان پرەزيدەنتى قاسىم-جومارت توقاەۆپەن ناتيجەلى جانە مازمۇندى كەزدەسۋ وتكىزدىڭىزدەر. ءبىلىم بەرۋ, تۋريزم, ساۋدا-ەكونوميكالىق قاتىناستار سالاسىندا بىرقاتار ماڭىزدى قۇجاتقا قول قويىلدى. سەنات قول جەتكىزىلگەن ۋاعدالاستىقتاردى ءتيىمدى ىسكە اسىرۋ ءۇشىن ءوز تاراپىنان قاجەتتى جۇمىستاردى جۇرگىزۋگە دايىن. ەكىجاقتى قارىم-قاتىناستى دامىتۋ جولىندا پارلامەنتارالىق بايلانىستار دا ۇلكەن ءرول اتقارادى. ءبىزدىڭ پارلامەنتتىڭ ەكى پالاتاسىندا دا سلوۆەنيامەن دوستىق توپتارى جۇمىس ىستەيدى. سلوۆەنيا پارلامەنتىندە دە وسىنداي قۇرىلىم قۇرۋ ەكىجاقتى ءوزارا ءىس-قيمىلدى تەرەڭدەتىپ, ءوزارا سەرىكتەستىگىمىزدى ارتتىرۋعا ءوز ىقپالىن تيگىزەر ەدى. ءبىز سلوۆەنيا پارلامەنتىمەن ىنتىماقتاستىقتى كەڭەيتۋگە جانە نىعايتۋعا مۇددەلىمىز», دەدى م.اشىمباەۆ.
كەزدەسۋ بارىسىندا حالىقارالىق جانە وڭىرلىك كۇن تارتىبىندەگى وزەكتى ماسەلەلەر دە نازاردان تىس قالعان جوق. بۇعان قوسا ىسكەرلىك بايلانىستاردى ىلگەرىلەتۋگە, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ كەلەشەگىنە, سونداي-اق ورنىقتى دامۋعا, ەكولوگياعا جانە ەكوجۇيەلەردى قورعاۋعا باسا ءمان بەرىلدى.
سەنات سپيكەرى ءوز سوزىندە قاسىم-جومارت توقاەۆتىڭ باستاماسىمەن قولعا الىنعان رەفورمالاردى جۇزەگە اسىرۋ جولىندا پالاتا اتقارىپ كەلە جاتقان زاڭنامالىق جۇمىسقا دا توقتالدى. ونىڭ ىشىندە ەلدىڭ ساياسي جۇيەسىن دەموكراتيالاندىرۋ جونىندەگى شارالار جانە ادام قۇقىقتارى مەن گەندەرلىك تەڭدىكتى قورعاۋ سالاسىن نىعايتۋدى كوزدەيتىن جاڭا باستامالار بار.
پالاتا توراعاسى الەمدىك جانە ءداستۇرلى دىندەر كوشباسشىلارى سەزىنىڭ قىزمەتىنە دە نازار اۋدارىپ, سلوۆەنيانىڭ ءدىن قايراتكەرلەرىن 2025 جىلعى 17-18 قىركۇيەكتە استانادا وتەتىن «دىندەر ديالوگى: بولاشاق جولىنداعى سينەرگيا» اتتى VIII سەزگە شاقىردى.
ءوز كەزەگىندە سلوۆەنيا پرەزيدەنتى قازاقستاندا جۇرگىزىلىپ جاتقان قوعامدىق-ساياسي وزگەرىستەردى جوعارى باعالادى جانە ەكىجاقتى بايلانىستاردى ودان ءارى نىعايتۋعا پراكتيكالىق تۇرعىدان ىقپال ەتۋگە دايىن ەكەنىن جەتكىزدى.
