فوتو: سولتان جەكسەنبەكوۆ/Kazinform
مارتەبەلى مەيماندى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ, NU ۆيتسە-پرەزيدەنتتەرى كاديشا دايىروۆا مەن اسەل ۋۆاليەۆا, سونداي-اق ۆيتسە-پرورەكتور لورەتتا و’دوننەلل قارسى الىپ, ۋنيۆەرسيتەتتىڭ تىنىس-تىرشىلىگىمەن تانىستىردى. ءدارىس باستالعانعا دەيىن سلوۆەنيا پرەزيدەنتى ۋنيۆەرسيتەتتىڭ قۇرمەتتى قوناقتارىنا ارنالعان ارنايى كىتاپتا جازبا قالدىردى.
ناتاشا پيرتس-مۋسار ءوز سوزىندە بىتىمگەرشىلىك ساياسات, سۋ رەسۋرستارى, ادام قۇقىقتارى مەن قورشاعان ورتانى قورعاۋ, جاساندى ينتەللەكت جانە گەندەرلىك تەڭدىك سياقتى ماڭىزدى جاھاندىق تاقىرىپتاردى قوزعادى. پرەزيدەنت گەندەرلىك ادىلەتتىڭ ەرەكشە ماڭىزىن اتاپ ءوتىپ, اتالعان ماسەلەلەردىڭ بارلىعىن شەشۋ ءۇشىن حالىقارالىق دەڭگەيدە ۇجىم رەتىندە بىرىگىپ كۇش-جىگەر جۇمساۋ قاجەت ەكەنىن ايتتى.
– گەندەرلىك تەڭدىك پەن گەندەرلىك ادىلەتتىڭ اراسىنداعى ايىرماشىلىق مىنادا: تەڭدىك – بارلىعىنا بىردەي اياقكيىم بەرۋ, ال ادىلدىك – اركىمگە وزىنە ساي كەلەتىن اياقكيىم بەرۋ. سوندىقتان گەندەرلىك ادىلەت كوپتەگەن ساياسي قادامدى قاجەت ەتەدى. سلوۆەنيا ايەلدەردىڭ قۇقىقتارىن بەلسەندى تۇردە قورعايدى, سونداي-اق ولاردىڭ كوشباسشىلىق پوزيتسيالاردا بولۋىن قولدايدى. مەن – سلوۆەنيانىڭ العاشقى ايەل پرەزيدەنتىمىن, وعان قوسا سلوۆەنيا پارلامەنتىندە ايەلدەردىڭ ۇلەسى – 36%. بۇل كورسەتكىشتەر بىرتىندەپ ءوسىپ كەلەدى, الايدا ءالى دە جۇمىس كوپ», دەدى ول ءوز سوزىندە.
سونىمەن قاتار ول قازاقستان مەن سلوۆەنيا اراسىنداعى, اسىرەسە جاساندى ينتەللەكت جانە سۋ رەسۋرستارىن باسقارۋ سالاسىنداعى ىنتىماقتاستىقتىڭ الەۋەتىنە سەنىم ءبىلدىردى.
«قازاقستان مەن سلوۆەنيا – مۇمكىندىكتەر كوپ ەل. ءبىزدىڭ بيزنەس-قاۋىمداستىقتار بۇل سوزدەردى راستايدى دەپ ۇمىتتەنەمىن», دەدى ناتاشا پيرتس-مۋسار.
دارىستەن كەيىن ستۋدەنتتەر سلوۆەنيا پرەزيدەنتىنە سۇراقتار قويىپ, حالىقارالىق ساياسات تۋرالى دەرەكتەرگە قانىقتى.
