قۇرمەتتى وتانداستار! سىزدەردى كۇللى مۇسىلمان بالاسىنىڭ ۇلىق مەرەكەسى – ورازا ايتتىڭ كەلۋىمەن شىن جۇرەكتەن قۇتتىقتايمىن! ايت قابىل بولسىن!
«ايت» ءسوزى – «مەرەكەلەۋ», «حال سۇراسۋ», ء«بىر-ءبىرىن قۋانتۋ», «قۋانىشقا توپتالۋ» دەگەن ماعىنالاردى بىلدىرەدى. ورازا ايت مەيرامىندا جۇرەككە مەيىرىم, قۋانىش سەزىمى ۇيالايدى. وسىناۋ ساۋلەلى ساتتە بارشاڭىزعا رياسىز نيەتپەن اللانىڭ اماندىعى مەن بەرەكەسىن تىلەيمىن. جاراتقان جانۇيالارىڭىزعا جار بولسىن!
ورازا ايت – ءبىر اي بويى ورازا ۇستاپ, ىقىلاسپەن جاقسىلىق جاساعان ادامنىڭ قۇرمەتكە, ماراپاتقا يە بولاتىن ءساتى. اللا تاعالا: «مەن پارىز ەتكەن ورازانى پەندەلەرiم وتەپ, اقىسىن الۋعا (ايت نامازىن وتەۋگە) مەشiتكە بەت الدى. ولار مەن ءۇشiن ورازا ۇستادى, مەنiڭ پارمەنiممەن اۋىز اشتى, ەندi قۋانىشقا كەنەلسiن...» دەيدى. راببىمىز بارشامىزدىڭ قۋانىشىمىزدى ارتتىرىپ, ەكى دۇنيەدە دە مەرەيىمىزدى ۇستەم ەتكەي.
اللا تاعالا ۇستاعان ورازامىزدى, مۇقتاج جاندارعا ۇلەستىرگەن زەكەتىمىز بەن ءپىتىر ساداقامىزدى, بەرگەن اۋىزاشارىمىزدى قابىل ەتىپ, مول ساۋاپ جازعاي.
ساۋاپتار ەسەلەنىپ جازىلاتىن بەرەكەلى ايدا كوڭىلى جابىرقاۋ جانداردىڭ جۇرەگىنە قۋانىش سىيلاۋعا تىرىستىق. وسى رەتتە قازاقستان مۇسىلماندارى ءدىني باسقارماسىنىڭ يگى باستاماسىنا ءۇن قوسىپ, مەشىتتەرىمىزدە اتقارىلعان ىزگى ءىس-شارالارعا, «رامازان سىيى» قايىرىمدىلىق اكتسيالارىنا بەلسەندى تۇردە ۇلەس قوسقان بارشا جومارت جاندارعا اللانىڭ نۇرى جاۋسىن دەيمىن.
ورازا ايت مەرەكەسى قۇتتى بولسىن! ءار شاڭىراققا باق پەن بەرەكە, بىرلىك پەن تاتۋلىق تىلەيمىن. اللا تاعالا كەلەسى رامازان ايىنا دا ءتورت كوزىمىز تۇگەل امان-ەسەن جەتىپ, يگى باسقوسۋلاردا جۇزدەسۋدى جازعاي. ەلىمىز امان, جۇرتىمىز تىنىش, تاۋەلسىزدىگىمىز باياندى بولعاي! ءاۋمين!
ناۋرىزباي قاجى تاعان ۇلى,
قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي
