سۋرەت: atpress.kz
ارينە, ءبىز قوزعايتىن اڭگىمە – تەحنيكالىق جانە كاسىپتىك ءبىلىم بەرۋ جايىندا. ءبىلىمنىڭ قاي-قايسى دا ءبولىپ-جارىپ قاراۋعا كەلمەيتىن ورتاق يگىلىك. دەسە دە, كاسىپتىك ءبىلىم – ايرىقشا دەن قويىپ, ەرەكشە نازارعا الۋ قاجەت سالا ەكەنى جىل وتكەن سايىن ايقىندالىپ كەلەدى. قازىر وقۋشىلار كوللەدجگە ءتۇسىپ, سول يگەرگەن ماماندىعىمەن ەڭبەك نارىعىنا قادام باسۋعا قۇشتار. تيىسىنشە, كوللەدجدەردە جۇمىسشى ماماندارىن دايارلاۋعا قاتىستى بارلىق مۇمكىندىك قاراستىرىلعان. قاجەتتى زاماناۋي جابدىقتار ورناتىلىپ, ونىڭ ءتىلىن بىلىكتىلىگى جوعارى ماماندار ۇعىندىرادى. ءوندىرىس پەن قۇرىلىستىڭ, كولىك پەن اۋىل شارۋاشىلىعىنىڭ, ەنەرگەتيكا مەن قىزمەت كورسەتۋ سالاسىنىڭ قىر-سىرىن جەدەل مەڭگەرگەن جاستار نارىققا اياق باسىپ جاتىر.
ماسەلەن, قازىرگى ۋاقىتتا دانەكەرلەۋشى, توكار, سلەسار, مەحانيك, ونەركاسىپتىك جابدىقتاردى جوندەۋ شەبەرلەرىنە سۇرانىس جوعارى. قۇرىلىسشى, ەلەكتريك, سانتەحنيك, بەتونشى, ارلەۋشى دە ءا دەگەننەن جۇمىس تاۋىپ كەتە الادى. قازىر جۇمىس بەرۋشىلەر اگرونوم, ۆەتەرينار, تەحنيك-مەحانيزاتور, ەلەكتر مونتەرى, اۆتوسلەسار, تەمىرجولشى, ەنەرگەتيك ماماندارعا ءتاۋىر جالاقى ۇسىنىپ, تەزىرەك جۇمىسقا ورنالاستىرۋعا اسىعادى. IT-سالاسى مەن جەلىلىك ينجەنەريا ماماندارىنىڭ دا ايى وڭىنان تۋىپ تۇر. قىسقاسى, ەڭبەك نارىعىنا اۋاداي قاجەت مامانداردىڭ باسىم بولىگى كوللەدجدەردە دايارلانادى دەۋگە تولىق نەگىز بار. بۇل ماماندىق يەلەرىن اتتاي قالاپ الدىرۋدىڭ دا پالەندەي سىرى جوق, بار بولعانى بۇل ماماندار ەكونوميكانىڭ تۇراقتى دامۋىنا ىقپال ەتەدى.
جۇمىسشى ماماندىقتارى بويىنشا ساپالى ءبىلىم بەرۋدىڭ ماڭىزدى فاكتورى – دۋالدى وقىتۋ جۇيەسى. اتالعان جۇيە بويىنشا ستۋدەنتتەر تەوريالىق ءبىلىمدى وقۋ ورنىندا الىپ, تاجىريبەنى كاسىپورىنداردا وتەدى. وسىنداي ءتاسىل ولاردىڭ كاسىبي داعدىسىن شىڭداپ, جۇمىسقا ورنالاسۋ مۇمكىندىگىن ەسەلەي تۇسەدى.
قازىر قوعامدا جۇمىسشى ماماندىقتارىنا دەگەن كوزقاراس تۇبەگەيلى وزگەرىپ كەلەدى. بۇرىن جوعارى ءبىلىمدى ماماندار عانا بەدەلدى دەپ ەسەپتەلسە, بۇگىندە بىلىكتى جۇمىسشىنىڭ ەل ەكونوميكاسىنىڭ تىرەگىنە اينالىپ كەلە جاتقانىنا دالەل كوپ. كوپتەگەن كاسىپورىن بىلىكتى جۇمىسشىلارعا جوعارى جالاقى ۇسىنىپ, ولاردىڭ كاسىبي وسۋىنە جاعداي جاساۋعا كىرىستى. وسى تۇرعىدان العاندا, 2025 جىلدىڭ «جۇمىسشى ماماندىقتارى جىلى» بولىپ جاريالانۋى – ەل بولاشاعى ءۇشىن ماڭىزدى قادام. يگىلىكتى باستاما تەحنيكالىق جانە كاسىپتىك ءبىلىم بەرۋ سالاسىن ودان ءارى دامىتا تۇسۋگە, جاستاردى قاجەتتى ماماندىقتارعا باۋلۋعا, ەلىمىزدىڭ وندىرىستىك الەۋەتىن ارتتىرۋعا ىقپال جاسايدى دەپ سەنەمىز.
زۋحرا ديۋانوۆا,
جالاعاش يندۋستريالدى-اگرارلىق كوللەدجىنىڭ جالپى ءپان وقىتۋشىسى
قىزىلوردا وبلىسى
