ەرلان قوشانوۆ قازاقستان مەن قىتاي قارىم-قاتىناسى جاڭا «التىن 30 جىلدىقتا» ماڭگىلىك جان-جاقتى ستراتەگيالىق ارىپتەستىك رۋحىندا نىعايىپ كەلە جاتقانىن اتاپ ءوتتى.
– بۇل ۇزدىكسىز دامۋدىڭ باستى قوزعاۋشى كۇشى رەتىندە كوشباسشىلارىمىزدىڭ جەكە دوستىق بايلانىستارى مەن ەرەن ەڭبەگىن ايتۋعا بولادى. اسىرەسە كەيىنگى جىلدار قازاق-قىتاي قارىم-قاتىناسىن جاڭا دەڭگەيگە كوتەرۋدە ماڭىزدى كەزەڭگە اينالدى. مەملەكەتتەرىمىزدىڭ باسشىلارى قاسىم-جومارت توقاەۆ پەن سي ءتسزينپيننىڭ سالىپ بەرگەن جولىمەن پارلامەنتارالىق بايلانىستارىمىزدى ودان ءارى دامىتامىز دەپ سەنەمىن, – دەدى ءماجىلىس توراعاسى.
پالاتا سپيكەرى مارتەبەلى مەيمانعا ەلدەگى جۇرگىزىلىپ جاتقان ساياسي-ەكونوميكالىق رەفورمالار تۋرالى مالىمەت بەرىپ, پارلامەنتارالىق ىنتىماقتاستىققا جەكە توقتالدى.
بۇل ورايدا ەكى ەل پارلامەنتتەرىنىڭ ىقپالداستىعىن نىعايتۋدا بىلتىرعى ءماجىلىس دەلەگاتسياسىنىڭ قىتايعا ساپارى تىڭ قارقىن بەردى. ەرلان قوشانوۆ باستاعان دەلەگاتسيا بەيجىڭ, ءۇرىمشى قالالارىندا بولىپ, ەلدىڭ باسشىلىعىمەن جانە پارلامەنتتەگى ارىپتەستەرىمەن جەمىستى كەلىسسوزدەر جۇرگىزگەن ەدى.
– ەكىجاقتى ارىپتەستىكتى دامىتۋدا زاڭ شىعارۋشى ورگانداردىڭ ماڭىزى مەن ءرولى ەرەكشە. جالپى, ەكى ەل پارلامەنتتەرىنىڭ تاجىريبە الماساتىن, ۇيرەنەتىن تۇستارى از ەمەس. ءبىز پارلامەنتارالىق ىنتىماقتاستىقتى ودان ءارى نىعايتۋعا مۇددەلىمىز. قىتاي تاراپىنان دا ءدال وسىنداي ىقىلاس بار ەكەنىن بىلەمىز. وسى تۇرعىدا ارىپتەستەرىمىزبەن زاڭ شىعارۋ سالاسىندا ءتۇرلى باعىتتار بويىنشا تاجىريبە الماسىپ كەلەمىز, – دەدى ەرلان قوشانوۆ.
ەكى ەل اراسىنداعى پارتياارالىق ارىپتەستىكتىڭ دە كەلەشەگى زور. اڭگىمەلەسۋ بارىسىندا تاراپتار «Amanat» پارتياسى مەن قىتاي كوممۋنيستىك پارتياسى اراسىنداعى ىنتىماقتاستىقتى نىعايتۋ ماسەلەسىن دە تالقىلادى.
ءوز كەزەگىندە ليۋ تسزيانچاو ەلدەرىمىز اراسىنداعى ستراتەگيالىق ارىپتەستىكتىڭ ودان ءارى قارقىندى دامي بەرەتىنىنە سەنىم ءبىلدىردى.
– قىتاي كوممۋنيستىك پارتياسى مەن «Amanat» پارتياسىن بايلانىستىراتىن ورتاق ماقساتتار كوپ. ول – ەڭ اۋەلى ءبىزدىڭ مەملەكەتتەرىمىزدىڭ دامۋى جولىنداعى جاۋاپكەرشىلىك. ءبىز بىرلەسىپ, كوشباسشىلارىمىزدىڭ ستراتەگيالىق باعدارىن ۇستانىپ, ەلدەرىمىزدىڭ ودان ءارى دامۋىنا كۇش سالۋعا ءتيىسپىز. مەملەكەت باسشىلارىنىڭ سەنىم مەن سىيلاستىققا نەگىزدەلگەن بەرىك دوستىعى حالىقتارىمىز ءۇشىن وتە قۇندى. ەندىگى كەزەكتە ولاردىڭ ۋاعدالاستىقتارىن ىسكە اسىرۋ – ءبىزدىڭ پارتيالارىمىزدىڭ ورتاق مىندەتى, – دەدى ليۋ تسزيانچاو.
