پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت, سونداي-اق ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قارادى. اتالعان زاڭ سپورتتىڭ باسىم تۇرلەرىن ايقىنداۋعا, ولاردى قارجىلاندىرۋعا باعىتتالعان. سونداي-اق قۇجات نورمالارى دەنەشىنىقتىرۋ جانە سپورت سالاسىن رەتتەۋدىڭ نورماتيۆتىك نەگىزىن تۇجىرىمدامالىق تۇرعىدان وزەكتەندىرۋگە مۇمكىندىك بەرەدى جانە ۇلتتىق زاڭنامانى, ونىڭ قۇقىق قولدانۋ پراكتيكاسىن ودان ءارى جەتىلدىرۋگە ىقپال ەتەدى.
– كەيىنگى جىلداردا ەلىمىزدە سپورت سالاسىن دامىتۋعا باسا ءمان بەرىلىپ كەلەدى. پرەزيدەنت قاسىم-جومارت توقاەۆ ۇلتتىق قۇرىلتايدىڭ
IV وتىرىسىندا سپورتتى دامىتۋ ماسەلەسىنە ەرەكشە كوڭىل ءبولدى. وسى قارالعان زاڭ – سپورت سالاسىن باسقارۋدى جەتىلدىرۋ باعىتىندا ىسكە اسىرىلىپ جاتقان ماڭىزدى قادامداردىڭ ءبىرى. زاڭدا سپورت سالاسىنا بولىنەتىن بيۋدجەت قاراجاتىن ءتيىمدى پايدالانۋدى قامتاماسىز ەتەتىن ەرەجەلەر قامتىلدى, – دەدى م.اشىمباەۆ.
سەنات توراعاسىنىڭ ايتۋىنشا, وسىلايشا ۇلتتىق سپورت تۇرلەرى باسىم سپورت تۇرلەرىنىڭ قاتارىنا قوسىلدى. سپورتشىلار مەن باپكەرلەرگە مەملەكەتتىك الەۋمەتتىك قولداۋ كورسەتۋ ءتارتىبىن جەتىلدىرۋگە ارنالعان جەكەلەگەن تۇزەتۋلەر دە ەنگىزىلگەن. ماقۇلدانعان زاڭ سالاماتتى ءومىر سالتىن ناسيحاتتاۋعا, ازاماتتاردى, اسىرەسە بالالاردى سپورتقا باۋلۋعا جانە جوعارى سپورتتىق جەتىستىكتەرگە قول جەتكىزۋگە مۇمكىندىك بەرەدى.
اتالعان قۇجاتتا ۇلتتىق سپورتتىق مەديتسينا جانە وڭالتۋ ۇيىمىنىڭ قىزمەتىن زاڭنىڭ جەكە بابىندا رەگلامەنتتەۋ كوزدەلگەن. وزگەرىستەر رەسپۋبليكالىق جانە وڭىرلىك سپورت فەدەراتسيالارىنىڭ مارتەبەسىنە دە اسەر ەتەدى. ناقتى ايتقاندا, ولار ۇلتتىق سپورت فەدەراتسيالارى بولىپ وزگەرتىلەدى.
سونداي-اق بالالار-جاسوسپىرىمدەر سپورتتىق ءبىلىم بەرۋ ۇيىمدارىنىڭ جاتتىقتىرۋشى-وقىتۋشىلارىنا اپتاسىنا 18 ساعاتتىق نورماتيۆتىك وقۋ جۇكتەمەسى ەنگىزىلەدى. ال ەل ازاماتى بولىپ سانالمايتىن سپورتشىلاردى بيۋدجەت قاراجاتى ەسەبىنەن قارجىلاندىرۋعا تىيىم سالىنادى.
بۇعان قوسا بىرقاتار سالالىق زاڭنامالىق اكتىلەردىڭ ماقساتتارىن, مىندەتتەرى مەن قاعيداتتارىن ايقىنداۋ بولىگىنە وزگەرىستەر مەن تولىقتىرۋلار ەنگىزىلەدى.
سونىمەن قاتار پالاتا وتىرىسىندا سەناتور اندرەي لۋكين دەپۋتاتتىق ساۋال جولدادى. ول جەردى پايدالانۋداعى مەملەكەتتىك باقىلاۋ سالاسىندا انىقتالعان ەلەۋلى زاڭ بۇزۋ دەرەكتەرى تۋرالى ايتتى. سەناتوردىڭ پىكىرىنشە, بۇل ءتاسىل كاسىپكەرلەرگە قاۋىپ ءتوندىرىپ, بيلىككە دەگەن سەنىمگە نۇقسان كەلتىرەدى.
– جۇيەلى قاتەلىكتەر مەن جەكەلەگەن لاۋازىمدى تۇلعالاردىڭ ارەكەتسىزدىگى كاسىپكەرلىك احۋالعا ەلەۋلى زيان كەلتىرەدى. بولاشاقتا زاڭ بۇزۋ دەرەكتەرىنىڭ قايتالانۋىن بولدىرماۋعا اتسالىسۋ كەرەك جانە جۇيەلى شارالار قابىلدانۋعا ءتيىس. جەر رەسۋرستارىن مەملەكەتتىك باقىلاۋ زاڭ شەڭبەرىندە كاسىپكەرلەرگە ارتىق قىسىم جاساماي جۇزەگە اسۋى قاجەت, – دەدى ا.لۋكين.
ماسەلەن, سولتۇستىك قازاقستان وبلىسىنداعى «Bidai-Astyk» جشس-نا باسشىلىققا حابارلانباي تەكسەرۋ جۇرگىزىلىپ, اقىر سوڭىندا ول ۇيعارىم زاڭسىز دەپ تانىلعان. ال شىعىس قازاقستان وبلىسىندا «گەورگيەۆسكوە» جشس-نىڭ جەر ۋچاسكەلەرىن يگەرۋ قاجەتتىگى تۋرالى ۇيعارىمى تالاپتاردى ورىنداماي الىنىپ تاستالعان.
– قالىپتاسقان جاعدايدى تۇزەتۋ جانە بولاشاقتا وسىنداي زاڭ تالابىن بۇزعانداردى الدىن الۋ ءۇشىن بىرقاتار شۇعىل شارا قابىلداۋدى ۇسىنامىن. اتاپ ايتقاندا, تەكسەرۋلەردىڭ زاڭدىلىعىن قامتاماسىز ەتۋ, نەگىزسىز تەكسەرۋلەر مەن ۇيعارىمدار تاجىريبەسىن توقتاتۋ, سوت شەشىمدەرىنىڭ ورىندالۋىنا باقىلاۋدى كۇشەيتۋ كەرەك. سونداي-اق زاڭ بۇزۋشىلىققا قاتىسى بار لاۋازىمدى تۇلعالاردى اتقاراتىن لاۋازىمىنان بوساتۋعا دەيىن تارتىپتىك جاۋاپكەرشىلىككە تارتۋ تۋرالى ماسەلەنى قاراۋ قاجەت. اشىق باقىلاۋ تەتىكتەرى ەنگىزىلسىن, – دەدى سەناتور.
