قازىرگى تاڭدا البينا بوكەتوۆ اتىنداعى ۋنيۆەرسيتەتتە جۋرناليستيكا ماماندىعى بويىنشا ءبىلىم الىپ ءجۇر. اڭگىمە بارىسىندا ول جۋرناليستيكاعا قىزىعاتىنىن, ءتۇرلى سايىستارعا قاتىسىپ, وسى جولدا ءوزىن شىڭداپ كەلە جاتقانىن ايتتى.
«قازىر وقۋىمدى تولىقتاي يگەرىپ, بىلىكتى مامان بولۋدى كوزدەيمىن. سونىمەن قاتار, ءارتۇرلى كونكۋرستارعا قاتىسىپ, ءوزىمنىڭ شەبەرلىگىمدى ارتتىرۋعا تىرىسامىن. الەۋمەتتىك جەلى ارقىلى ويلارىمدى, كوزقاراسىمدى ءبولىسىپ, قوعاممەن بايلانىس ورناتۋعا دا كوپ كوڭىل بولەمىن. ينستاگرامدا بەلسەندىمىن, وقىرماندارىممەن ەفيرگە شىققاندى ۇناتامىن», دەيدى ول.
البينانىڭ اكەسى ۇلتى تاتار بولعانىمەن, قازاق تاربيەسىندە وسكەن. بالالارىمەن كىشكەنتاي كەزىنەن باستاپ تەك قازاق تىلىندە سويلەسكەن. سوندىقتان البينا دا بويىنا قازاق تاربيەسىن, مادەنيەتىن ءسىڭىرىپ وسكەن.
«وتباسىم ۇلكەن ءارى بەرىك. اكەم – ۆيتالي, انام – ناتاليا, ولار مال شارۋاشىلىعىمەن اينالىسادى. انام ءسۇت ونىمدەرىن وندىرەدى, ءوز جەرىمىز بەن جايىلىمىمىز بار. ءبىزدىڭ وتباسىمىزدا قازاقي داستۇرلەر ەرەكشە ورىن الادى. مىسالى, «قوناق كەلسە, قۇت كەلەدى» جانە «امانشىلىق بولسىن» دەگەن سوزدەر ماعىنالى ءارى ماڭىزدى. اتا-انام ماعان وتە كوپ ومىرلىك قۇندىلىقتاردى ۇيرەتىپ كەلەدى», دەيدى البينا.
سونداي-اق سلاۆيان قىزى ورىس تىلىندە سويلەۋ وعان قيىندىق تۋدىراتىنىن, ورىس ءتىلىن ەندى ۇيرەنىپ جۇرگەنىن, ءتىلىن جەتىلدىرۋ ءۇشىن كوپ وقىپ, تاجىريبە جيناپ جۇرگەنىن ايتىپ ءوتتى.
البينا ءوزىن قازاقتىڭ قىزى دەپ سانايدى, سەبەبى ونىڭ جۇرەگىندە قازاقتىڭ رۋحى مەن مادەنيەتىنە دەگەن تەرەڭ ماحاببات بار. بۇل – تەك سوزبەن ايتاتىن ۇعىم ەمەس, ول ءومىرىنىڭ نەگىزىنە اينالعان شىنايى سەزىم. قازاق تىلىندە ەركىن سويلەپ, وسى تىلدە ويلارىن اشىق ءبىلدىرۋ ول ءۇشىن تابيعي نارسە. ول قازاقتىڭ سالت-داستۇرلەرىن, ۇلتتىق قۇندىلىقتارىن جۇرەگىنە جاقىن ۇستاپ, سول ارقىلى ءوز ءومىرىن بايىتۋدى ماقسات ەتەدى.
ء«يا, ءوزىمدى قازاقتىڭ قىزى سانايمىن, سەبەبى وسى مادەنيەتتە تاربيەلەندىم. ءتىلىم دە, قۇندىلىقتارىم دا – قازاقى. بۇل مەن ءۇشىن جاي سەزىم ەمەس, ءومىرىمنىڭ بولىگى. قازاقي سالت-داستۇرلەردى دە بويىما ءسىڭىرىپ ءوسىپ كەلەمىن. ماعان اسىرەسە تۇساۋكەسەر مەن بەتاشار داستۇرلەرى ەرەكشە ۇنايدى», دەيدى ول.
البينا قازاق ادەبيەتىنە ەرەكشە قۇرمەتپەن قارايدى. مۇقاعالي ماقاتاەۆتىڭ ولەڭدەرىنەن باستاپ, ماعجان جۇماباەۆ پەن ورالحان بوكەيدىڭ شىعارمالارىنا دەيىنگى ءاربىر ءسوز, ءاربىر شۋماق ونىڭ جۇرەگىنە اسەر ەتەدى.
سونىمەن قاتار, ول تەك قازاقشا سويلەپ قانا قويماي قازاق تىلىندە ولەڭ-جولدارىن جازاتىنىن ايتىپ ءوتتى.
«انامنىڭ بويىندا اقىندىق قاسيەت بار. ول اباي ولەڭدەرىن ءسۇيىپ وقيدى, جاس كەزىندە جارىستارعا قاتىسىپ, ولەڭ جازعان. مۇمكىن, شىعارماشىلىققا دەگەن قىزىعۋشىلىعىم انامنان دارىعان شىعار», دەيدى جاس قىز.
البينا ءۇشىن قازاق ءتىلىن ءبىلۋ تەك تىلدىك داعدى ەمەس, ونىڭ ومىرىندەگى ۇلكەن ارتىقشىلىقتاردىڭ ءبىرى. قازاق تىلىندە سويلەۋ وعان اينالاسىنداعى ادامدارمەن تەرەڭ ءارى شىنايى بايلانىس ورناتۋعا مۇمكىندىك بەرەدى.
«قازاق ءتىلىن ءبىلۋ ماعان ادامدارمەن ەركىن قارىم-قاتىناس جاساۋعا, مادەنيەتتى تەرەڭ تۇسىنۋگە جانە كاسىبي مۇمكىندىكتەرىمدى كەڭەيتۋگە كومەكتەسەدى. بۇل – مەنىڭ بولاشاعىم ءۇشىن ۇلكەن ارتىقشىلىق. قازاقشا ۇيرەنۋ ءۇشىن قورىقپاي سويلەۋ, كىتاپ وقۋ, تىڭداۋ جانە كۇندەلىكتى قولدانۋ ماڭىزدى. ەڭ باستىسى ۇزدىكسىز تاجىريبە كەرەك», دەيدى ول.
