فوتو: ۇكىمەتتىڭ ءباسپاسوز قىزمەتى
بولات نۇرجانوۆ اتىنداعى گرەس-1 جانە گرەس-2 قۇرامىنا كىرەتىن ەكىباستۇز ەنەرگيا تورابى نىساندارىنىڭ جالپى بەلگىلەنگەن قۋاتى 5 مىڭ مۆت-قا جەتەدى, بۇل ەكىباستۇزدى ەلەكتر ەنەرگياسىن وندىرۋدە ستراتەگيالىق ماڭىزدى ورتالىققا اينالدىرادى. جالپى, پاۆلودار وبلىسى رەسپۋبليكاداعى ەلەكتر ەنەرگياسىنىڭ 40%-دان استامىن وندىرەدى.
گرەس-1-ءدى جاڭعىرتۋ اياسىندا وتكەن جىلدىڭ جەلتوقسان ايىندا قۋاتى 540 مۆت بولاتىن №1 ەنەرگوبلوك قالپىنا كەلتىرىلىپ, پايدالانۋعا بەرىلگەن. 2026-2028 جىلدارى وتىنمەن قامتاماسىز ەتۋ جۇيەلەرىن رەكونسترۋكتسيالاۋ جانە جاڭا ءتۇتىن مۇرجاسىن سالۋ جوسپارلانىپ وتىر. سونىمەن قاتار پروتسەستەردى اۆتوماتتاندىرۋ, شىعارىندىلاردى باقىلاۋ جانە قانداي دا ءبىر وقىس وقيعالاردىڭ الدىن الۋ بويىنشا بايانداما جاسالعان.
پرەمەر-مينيستر ولجاس بەكتەنوۆتىڭ توراعالىعىمەن وتكەن ەنەرگەتيكانى دامىتۋ ماسەلەلەرى جونىندەگى رەسپۋبليكالىق كەڭەستە سالانىڭ نەگىزگى باعىتتارى, ونىڭ ىشىندە جاڭا قۋات كوزدەرىن ىسكە قوسۋ, ينفراقۇرىلىمدى جاڭعىرتۋ, باتىس ايماقتىڭ ەلەكتر جەلىلەرىن ەلىمىزدىڭ بىرىڭعاي ەلەكتر ەنەرگەتيكالىق جۇيەسىمەن بىرىكتىرۋ, ەنەرگيا تيىمدىلىگىن ارتتىرۋ جانە باسقا دا ماسەلەلەر قارالدى. ەنەرگەتيكا ءمينيسترى ەرلان اقكەنجەنوۆ, ونەركاسىپ جانە قۇرىلىس ءمينيسترى ەرسايىن ناعاسپاەۆ, «سامۇرىق-ەنەرگو» اق جانە «KEGOC» اق كومپانيالارى باسشىلىعى, سونداي-اق بىرقاتار ءوڭىر اكىمدەرى بايانداما جاسادى.
قازاقستاندا 227 ەلەكتر ستانساسى جۇمىس ىستەيدى. ستانسا جابدىقتارىنىڭ ورتاشا توزۋ دەڭگەيى 56%-عا جەتەدى. وتكەن جىلدىڭ قورىتىندىسى بويىنشا ەلەكتر ەنەرگياسىن ءوندىرۋ كولەمى 4%-عا ءوستى. جاڭا قۋات كوزدەرىن ىسكە قوسۋ قولدانىستاعى ستانسالاردى جاڭعىرتۋ جانە جاڭا گەنەراتسيالايتىن قوندىرعىلار سالۋ ەسەبىنەن بولجانىپ وتىر.
ەنەرگەتيكا ءمينيسترى ەرلان اقكەنجەنوۆ وتكەن جىلى 771 مۆت جاڭا قۋات كوزى, ونىڭ ىشىندە ەكىباستۇز گرەس-1-دەگى №1 بلوك قالپىنا كەلتىرىلگەنىن, اتىراۋ جەو-داعى №6 تۋربينا, جەزقازعان قالاسىنداعى جەو-دا №8 قازاندىق اۋىستىرىلعانىن, سونداي-اق جالپى قۋاتى 163 مۆت بالامالى ەنەرگەتيكا جوبالارى ىسكە قوسىلعانىن مالىمدەگەن.
«گەنەراتسيالايتىن قوندىرعىلاردى جاڭعىرتۋعا, كەڭەيتۋگە, رەكونسترۋكتسيالاۋعا جانە جاڭارتۋ بويىنشا جالپى قۋاتى شامامەن 2 گۆت بولاتىن 14 ينۆەستيتسيالىق كەلىسىم جاسالدى. بيىل 621 مۆت, 2026 جىلى – 2,6 گۆت ىسكە قوسۋ جوسپارلانعان. ەكونوميكانىڭ ەلەكتر ەنەرگياسىنا دەگەن قاجەتتىلىگىن وتەۋ ءۇشىن 2029 جىلعا دەيىن 68 جوبا جۇزەگە اسىرىلادى. جالپى, 2035 جىلعا دەيىن جالپى قۋاتى 4,2 گۆت قولدانىستاعى ستانسالاردى جاڭعىرتۋ, رەكونسترۋكتسيالاۋ جانە كەڭەيتۋ جوسپارلانىپ وتىر», دەلىنگەن حابارلامادا.
«پرەزيدەنت ەنەرگەتيكانى ءوزىن-ءوزى قامتاماسىز ەتەتىن ءارى باسەكەگە قابىلەتتى ەل قۇرۋدىڭ نەگىزگى باعىتتارىنىڭ ءبىرى رەتىندە اتادى. بۇل تابىستى تسيفرلاندىرۋ مەن جاساندى ينتەللەكتىنى كەڭىنەن ەنگىزۋ – وعان تىكەلەي تاۋەلدى بولاتىن جاڭا الەمدەگى تۇراقتى ىلگەرىلەۋدىڭ نەگىزگى فاكتورى. بۇل جەردە مەملەكەت باسشىسى اتاپ وتكەندەي, قازاقستاندا وراسان زور مۇمكىندىكتەر بار. سونىمەن قاتار جوسپارلانعان جوبالاردىڭ ۋاقتىلى ورىندالماۋى ەكونوميكانىڭ دامۋىن تەجەيدى. مۇنداي جاعدايعا جول بەرۋگە بولمايدى. ءبىز بەلسەندى تۇردە جۇمىس ىستەۋىمىز كەرەك. بىرقاتار ءىرى جوبا قازىردىڭ وزىندە ەلەكتر قۋاتىن قاجەت ەتىپ وتىر», دەدى ولجاس بەكتەنوۆ. ماڭىزدى جوبالار قاتارىندا سەمەي, وسكەمەن جانە كوكشەتاۋ قالالارىندا زاماناۋي كومىر ستانتسيالارىن ىسكە قوسۋ, ەكىباستۇز قالاسىنداعى زاماناۋي گرەس-3 ستانتسياسىنىڭ قۇرىلىسى اتاپ ءوتىلدى.
