ەلىمىزدە كەڭ قانات جايعان «بەلسەندى ۇزاق ءومىر» ۇلتتىق باعدارلاماسى اياسىندا شاراپاتتى شارۋا جۇزەگە اسىرىلدى. اشىلۋ سالتاناتىندا وبلىس اكىمى مارات احمەتجانوۆ جاڭا يننوۆاتسيالىق جوبانىڭ ماڭىزىنا توقتالىپ, جاسالىپ جاتقان يگى ىستەر جايىندا بايانداپ بەردى. ورتالىق ديرەكتورى باقىت سماعۇل اعا بۋىن ءۇشىن جايلى ورىن بولاتىندىعىنا سەنىم ءبىلدىردى. ايتسا ايتقانداي, عيمارات تولىق جاڭارتىلعان. قۇتتى قۇرىلىسشىنىڭ قالاعىنان جاڭا شىققانداي جارقىراپ تۇر. ەڭ باستىسى, زاماناۋي جابدىقتارمەن قامتاماسىز ەتىلىپتى. نەگىزگى قىزمەتى ەمدىك, دەنە شىنىقتىرۋ, يوگا جانە سكانديناۆيالىق ءجۇرىس, ۆوكال, حورەوگرافيا, قولونەر شەبەرلىگىن دامىتۋ, شاحمات, توعىزقۇمالاق, اسىق اتۋ ءتارىزدى ويىندارعا قىزىعۋشىلىقتى ارتتىرۋ. كومپيۋتەرلىك ءبىلىم الۋعا تولىق مۇمكىندىك جاسالعان.
«مەن وبلىس ورتالىعىنداعى اۆتوكولىكتەردى جوندەۋ ستانتسياسىندا جارتى عاسىرعا جۋىق ەڭبەك ەتتىم, ۇزاق ۋاقىتتان بەرى شاحماتپەن اينالىسامىن», دەيدى قالا تۇرعىنى ساكەن تاڭىرقۇلوۆ, – ورتالىق زەينەتكەرلەردىڭ باس قوسىپ, شۇيىركەلەسەتىن, ءارتۇرلى ويىن ويناپ, وزدەرى قىزىعاتىن شارۋامەن شۇعىلداناتىن ورىنعا اينالعالى تۇر. ەڭ باستىسى, مەملەكەت تاراپىنان اعا بۋىنعا ايتا قالارلىقتاي قامقورلىق جاسالىپ جاتىر.
اشىلۋ سالتاناتىندا فرانتسياداعى حالىقارالىق كۇمىس ۋنيۆەرسيتەتتەر قاۋىمداستىعىنىڭ پرەزيدەنتى, پروفەسسور فرانسۋا ۆەللاس ونلاين بايلانىسقا شىقتى. پروفەسسور ورتالىقتىڭ اشىلۋىمەن قۇتتىقتاپ, جارقىن جوبا جايىندا لەبىزىن ءبىلدىردى.
ورتالىقتا ارنايى مەديتسينالىق كابينەت بار. وندا دارىگەر كەلۋشىلەردىڭ دەنساۋلىقتارىن قاداعالايدى. اپپاراتتىق بازا ازىرلەنىپ, ەم-دومنىڭ قاجەتتىلىكتەرى ەكشەلەدى.
جاڭا جوبانى جۇزەگە اسىرۋعا ەل قامىن جەگەن مەتسەناتتار دا ارالاسىپتى. بۇل جاقسى مىسال. شوقان ءۋاليحانوۆ اتىنداعى جانە اباي مىرزاحمەتوۆ اتىنداعى كوكشەتاۋ ۋنيۆەرسيتەتتەرى ىنتىماقتاستىق مەموراندۋمىنا قول قويدى. ايتپاقشى, جاڭا عيماراتتا ارداگەرلەر كەڭەسى دە ورنالاسپاق. وسىلايشا, اعا بۋىن ءۇشىن اق تۇيەنىڭ قارنى جارىلعان ادەمى ءبىر وقيعا ورىن الدى.
