سۋرەتتى تۇسىرگەن – ۆالەري بۋگاەۆ
كۇننىڭ كۇرت جىلىنۋى ەرىگەن قار سۋىنان پايدا بولاتىن العاشقى قاۋىپ كوزدەرىن اڭعارتتى. ماسەلەن, كۇنى كەشە استانا مەن پاۆلودار قالالارىنىڭ اراسىن جالعايتىن اۆتوباننىڭ ۇستىنەن قارعىن سۋ ءجۇرىپ كەتتى. سالدارىنان كۇرە جولدىڭ شىدەرتى كەنتى اۋماعىندا كولىك قوزعالىسىندا ءبىراز قيىندىق تۋىنداپ, جولداعى سۋ باسقان اۋماقتىڭ كولەمى 150 مەترگە دەيىن جەتتى. «قازاۆتوجول» جشس-نىڭ وكىلدەرى جول بويىنا ينەرتتى ماتەريالدار مەن قۇم تولتىرىلعان قاپشىقتار توسەپ, تاسقىننىڭ ءارى قاراي جايىلۋىنا جول بەرگەن جوق. اتالعان اۋماقتا سۋ وتكىزەتىن قۇبىر ورنالاسقان. بىراق لاپ قويعان سۋ قۇبىردان ءوتىپ ۇلگەرمەگەن. جولعا جاۋاپتى كاسىپورىن, ماماندار جاعدايدى تۇراقتى باقىلاۋدا ۇستاپ وتىر, قوزعالىس قاۋىپسىزدىگىن قامتاماسىز ەتەتىن بارلىق قاجەتتى شارالاردى اتقارىپ جاتىر.
وبلىس اكىمىنىڭ ءباسپاسوز قىزمەتى باياناۋىل اۋدانىندا جەتى ەلدى مەكەندى سۋ باسۋ قاۋپى بار ەكەنىن حابارلادى. «اقجار» بوگەتى, سونداي-اق وڭىردەگى اششىسۋ, ايدوس, بالا شىدەرتى, قاراسۋ وزەندەرى قاتتى تاسىسا, بىرقاتار اۋىلعا سۋ كىرۋى ىقتيمال. بۇگىندە باياناۋىل اۋدانىنداعى قاردىڭ قالىڭدىعى 21 سانتيمەتر, بۇل وتكەن جىلمەن سالىستىرعاندا 8 سانتيمەترگە كوپ. كوكتەمگى كەزەڭدە اششىسۋ, ايدوس, بالا شىدەرتى, قاراسۋ وزەندەرى ايتارلىقتاي قاۋىپ توندىرەدى. سۋ دەڭگەيىنىڭ كۇرت كوتەرىلۋى تاۋلارداعى قاردىڭ ەرۋىنە, قاراعاندى وبلىسىنان قاراسۋ وزەنىنىڭ ساعاسى بويىمەن اعىپ كەلەتىن سۋلاردىڭ قوزعالىسىنا بايلانىستى. ماماندار اششىسۋ بوگەتىنىڭ جاعدايىن تەكسەرىپ شىققان. بۇعان دەيىن ونى نىعايتۋ, بيىكتىگىن كوتەرۋگە قاتىستى جۇمىس جۇرگىزىلگەن. 1,6 كم بوگەتتىڭ سىرتقى جاقتارى گابيوندارمەن نىعايتىلدى. باياناۋىل قاراعاندى وبلىسىمەن شەكارالاس, نەگىزگى قاۋىپ تە جىل سايىن سول جاقتان تونەدى.
– قاراعاندى وبلىسىنىڭ بۇقار جىراۋ اۋدانى مەن باياناۋىل اۋدانى ساتباەۆ اۋىلدىق وكرۋگىنىڭ شەكارا ماڭى اۋماعىندا جينالعان قاردىڭ ۇلكەن قورى قارقىندى ەرىگەن كەزدە, سونداي-اق «اقجار» بوگەتى تولىپ, سۋ جىبەرىلگەن جاعدايدا اۋداننىڭ 7 ەلدى مەكەنىن سۋ باسۋ قاۋپى بار. «اقجار» بوگەتىنەن اعىپ كەلەتىن سۋدىڭ نەگىزگى ارناسى ق.ساتباەۆ اۋىلىنان 10-15 كم جەردە «قاراتوقا» بوگەتىنەن اعىپ كەلەتىن سۋدىڭ ارناسىمەن قوسىلادى, وسىعان بايلانىستى جاقىن ماڭداعى ءماشھۇر ءجۇسىپ, جاڭاتىلەك, كوكدومباق, قانىش ساتباەۆ, مۇسا شورمان ۇلى اۋىلدارىنىڭ ماڭىندا گيدروپوستتار جابدىقتالعان. اۋەدەن بارلاۋدىڭ ناتيجەسىندە, قاراعاندى وبلىسىنىڭ «اقجار» بوگەتىندەگى جاعدايعا مونيتورينگ جۇرگىزىلدى. جوبالىق كولەمى 4,2 ملن تەكشە مەتردى قۇرايتىن سۋ قويماسى قازىردە 71%-عا تولعان. «قاراتوقا» بوگەتى بۇقار جىراۋ اۋىلىنان 25 كم قاشىقتىقتا ورنالاسقان. 3 ملن تەكشە مەتر سۋ سياتىن بوگەت بۇگىندە 33% تولعان, – دەپ حابارلادى وبلىس اكىمىنىڭ ءباسپاسوز قىزمەتى.
«قازگيدرومەت» رمك پاۆلودار وبلىسى بويىنشا فيليالىنىڭ دەرەكتەرىنە سۇيەنسەك, ءوڭىردىڭ بارلىق اۋماعىندا كۇزگى كەزەڭدە تۇسكەن جاۋىن-شاشىننىڭ مولشەرى نورمادان ارتىق. ەرتىس وزەنىنىڭ گيدروپوستتارىندا مۇزدىڭ ءالى دە قاتىپ جاتقانى بايقالادى. مامانداردىڭ بولجامىنشا, وبلىس اۋماعىنداعى سۋ تاسقىنى كەزەڭى ەكى كەزەڭدە وتەدى: ناۋرىزدىڭ 2-3-ونكۇندىگىندە قار ەريدى, ءساۋىردىڭ 2-3-ونكۇندىگىندە جوعارعى ەرتىس كاسكادىنان سۋ جىبەرىلەدى.
پاۆلودار وبلىسى
