بۇل تۇرعىدا تەمىر اۋدانى تۇرعىندارى ەرەكشە بەلسەندىلىك تانىتىپ وتىر. اۋدان ورتالىعى شۇبارقۇدىق كەنتىندە كوشەلەر, جاياۋ جۇرگىنشىلەر جولى, مەكەمەلەردىڭ جان-جاعى, اۋلالار مەن ساياباق, سكۆەر, ايالدامالاردى قوقىستان تازارتىپ, جيناۋعا كوممۋنالدىق مەكەمەلەر قىزمەتكەرلەرى مەن ۆولونتەرلەر, بەلسەندى تۇرعىندار ءبىر كىسىدەي جۇمىلدى. اۋدان اكىمدىگىنىڭ مالىمەتىنە قاراعاندا, ەكواكتسيا اياسىندا كەيىنگى ەكى ايدا 640 توننا تۇرمىستىق قاتتى قالدىقتار, 195 توننا قار شىعارىلعان. ەكواكتسيا كەزىندە ۆولونتەرلەر كوممۋنالدىق قىزمەت جۇمىسشىلارىنا ىستىق شاي تاراتتى.
قارعالى اۋدانىنىڭ بەلسەندى جاستارى دا ەكولوگيالىق اكتسيادان سىرت قالمادى. ولار اۋدانداعى كورىكتى جەرلەردىڭ ءبىرى قاسقىر سارقىراماسى ماڭايىن قوقىستاردان تازارتۋدى باستاما ەتىپ كوتەردى. اۋداندىق جاستار رەسۋرستىق ورتالىعىنىڭ بەلسەندىلەرى ءار اۋىلدىق وكرۋگتە تازالىق اكتسياسىن ءبىر كۇندە باستاۋعا ۇندەۋ تاستادى. ەرىكتى جاستار مەكتەپ وقۋشىلارىنا قوعامدىق ورىنداردى لاستاماۋ, قوقىس تاستاماۋ تۋرالى ەكودارىستەر جۇرگىزدى.
اقتوبە قالالىق ءماسليحاتىنىڭ دەپۋتاتى رايسا باليەۆانىڭ ايتۋىنشا, تازالىق قورشاعان ورتانى كۇتىپ ۇستاۋ عانا ەمەس, ول مادەنيەتتىڭ, جاۋاپكەرشىلىكتىڭ, ۇرپاقققا ۇلگى بولۋدىڭ كورىنىسى.
«اسىرەسە, مەكتەپتەردە, وقۋ ورىندارىندا, قوعامدىق ورىنداردا تازالىققا ءمان بەرىپ, ونى جۇيەلى تۇردە ناسيحاتتاۋ وتە ماڭىزدى. وسى ورايدا جەرگىلىكتى بيلىك ورگاندارى, قوعامدىق ۇيىمدار مەن بەلسەندى ازاماتتار سەنبىلىكتەر ۇيىمداستىرىپ قانا قويماي, تۇرعىنداردى ەكولوگيالىق مادەنيەتكە تاربيەلەۋ باعىتىندا ناقتى قادامدار جاساۋى كەرەك. تەك سوندا عانا «تازا قازاقستان» جالپىحالىقتىق قوزعالىسقا اينالىپ, ۇزاق مەرزىمدى ناتيجەسىن بەرەدى», دەيدى دەپۋتات.
بىلتىر «تازا قازاقستان» اكتسياسىنا 400 مىڭنان اسا اقتوبەلىك قاتىسىپ, وزەن-كولدەر جاعالاۋلارىن, ساياباقتار مەن تاريحي ەسكەرتكىشتەر اينالاسىن, قالا كوشەلەرىن تازالادى. اكتسيا اياسىندا 291 ساياباق پەن سكۆەر رەتكە كەلتىرىلىپ, ەلدى مەكەندەر اۋماعىنا 300 مىڭ ءتۇپ اعاش, 6400 بۇتا وتىرعىزىلدى. اۋماقتاردى جيناۋعا 6203 تەحنيكا تارتىلىپ, پوليگوندارعا 74 270 توننا قوقىس شىعارىلدى.
اقتوبە وبلىسى
