«KEGOC» اكتسيونەرلەرى 40 مىڭنان استى

بيىلعى جىلعى 30 ساۋىردە «KEGOC» اق اكتسيونەرلەرىنىڭ العاشقى جىلدىق جالپى جينالىسى بولىپ ءوتتى. وندا بىرقاتار وزەكتى ماسەلەلەر قارالدى. سول كۇنى اكتسيونەرلەردىڭ جالپى جينالىسىنىڭ قورىتىندىسى بويىنشا رەسپۋبليكالىق بۇقا­رالىق اقپارات قۇرالدارىنىڭ وكىلدەرىمەن ءباسپاسوز ءماسليحاتى بولدى. وعان «KEGOC» اق باسقار­ماسىنىڭ توراعاسى باقىتجان قاجيەۆ, باسقارما توراعاسىنىڭ ورىنباسارى جاڭاباي بەكسارى جانە «KEGOC» اق-تىڭ ەكونوميكا جونىندەگى اتقارۋشى ديرەكتورى ايبەك بوتابەكوۆ قاتىسىپ, جۋرناليستەردى قىزىقتىرعان سۇ­راق­تار توڭىرەگىندە وي ءوربىتتى. «قۇرمەتتى جۋرناليستەر بۇگىن «KEGOC» اق اكتسيونەرلەرىنىڭ جالپى جينالىسى ءوتتى جانە بۇل جينالىستى «KEGOC» كوپشىلىككە ورتاق كومپانيا رەتىندە العاش رەت وتكىزىپ وتىر. وزدەرىڭىزگە بەل­گىلى, وتكەن جىلدىڭ اياعىندا «حا­لىقتىق IPO» باعدارلاماسى اياسىندا قازاقستاندىق قور بيرجاسىنا (KASE) «KEGOC» اق اكتسيا­لارى ورنالاستىرىلعان بولاتىن», دەپ باس­تادى ءسوزىن «KEGOC» اق باس­قارما توراعاسى باقىتجان قاجيەۆ. ەستەرىڭىزگە سالا كەتەتىن بول­ساق, 2014 جىلعى 18 جەلتوق­ساندا «سامۇرىق-قازىنا» ۇلتتىق ءال-اۋقات قورى» اكتسيونەرلىك قو­عامىنىڭ ەنشىلەس جانە باعى­نىستى ۇيىمدارىنىڭ اكتسيالار پاكەتىن قازاقستان رەسپۋبليكاسى ۇكىمەتىنىڭ 2011 جىلعى 8 قىر­كۇيەكتەگى №1027 قاۋلىسىمەن بەكىتىلگەن باعالى قاعازدار نارىعىنا شىعارۋ باعدارلاماسىن («حالىقتىق IPO» باع­دارلاماسى) ىسكە اسىرۋ شەڭ­بەرىندە «KEGOC» اق كوم­پانيانىڭ جاي اكتسيالارىن وعان جازىلۋ جولىمەن قازاق­ستاندىق قور نارىعىنا العاشقى ورنالاس­تىرۋدى ءىس ءجۇ­زىنە اسىردى. باعالى قاعاز­داردىڭ ۇيىمداستىرىلعان نارىعىندا «KEGOC» اق-تىڭ ورنالاستىرىلعان جاي اكتسيا­لارىنىڭ سانى – 25 999 999 (جيىرما بەس ميلليون توعىز ءجۇز توقسان توعىز مىڭ توعىز ءجۇز توق­سان توعىز) دانا. «KEGOC» اق-تىڭ ءبىر جاي اكتسياسىنىڭ ورنالاستىرۋ باعاسى 505 (بەس ءجۇز بەس) تەڭگەگە باعالاندى. – سونىڭ ناتيجەسىندە 13 ملرد. تەڭگەدەن استام مولشەردە قارا­جات تارتىلدى. 40 مىڭنان استام قازاقستاندىقتار «KEGOC» اك­تسيا­­لارىن يەلەنۋگە مۇمكىندىك الدى, – دەپ جالعاستىردى ودان ءارى ءسوزىن باقىتجان قاجيەۆ. بۇگىنگى وتكەن جالپى جينا­لىسقا كومپانيانىڭ بارلىق اكتسيو­­نەرلەرى جانە ولاردىڭ وكىل­دەرى قاتىستى. ەندى ولار قازاق­ستان رەسپۋبليكاسىنداعى ءىرى ەلەكتر جەلىلىك كومپانيانى باسقارۋ قۇقىعىن يەلەندى. ال­عاشقى جىل­دىق جالپى جينا­لىستىڭ كۇن ءتارتىبى بويىنشا اك­تسيونەرلەردىڭ قاراۋىنا مىناداي ماسەلەلەر ەنگىزىلدى: - «KEGOC» اق-تىڭ جىلدىق ەسەبىن بەكىتۋ تۋرالى; - جىلدىق قارجىلىق ەسەپ­تە­مەنى, تازا تابىستى ءبولۋ ءتار­تىبىن بەكىتۋ, جاي اكتسيالار بويىنشا ديۆيدەندتەر تولەۋ تۋرالى شەشىم قابىلداۋ جانە 2014 جىلعا ارنالعان «KEGOC» اق-تىڭ ءبىر جاي اكتسياسىنا شاققانداعى ديۆيدەند مولشەرىن بەكىتۋ تۋرالى; - «KEGOC» اق ديرەكتورلار كەڭەسىنىڭ ساندىق قۇرامىن, وكىلەتتىك مەرزىمىن انىقتاۋ, ونىڭ مۇشەلەرى مەن توراعاسىن سايلاۋ جانە باسقا دا ماسەلەلەر. اكتسيونەرلەر KEGOC-تىڭ 2014 جىلعى جىلدىق قارجىلىق ەسەبىن بەكىتتى, بۇل قۇجاتتا كوم­پانيانىڭ وتكەن جىلعى تازا تابىسى 8,6 ملرد. تەڭگە كولەمىندە بولعانى اتاپ كورسەتىلدى. – بۇدان بۇرىن حابارلا­عانى­مىزداي, ءبىزدىڭ ديۆيدەندتىك سايا­ساتىمىزعا سايكەس تازا تابى­سى­مىزدىڭ كەمىندە 40 پايىز ديۆيدەند تولەۋگە جۇمسالۋى مۇمكىن. بۇل دەگەنىمىز, KEGOC ەسەپتى كەزەڭدەگى تازا تابىسىنىڭ بارلىق 100 پايىزىن ديۆيدەند تولەۋگە جىبەرە الادى دەگەن ءسوز. بۇگىن اكتسيونەرلەردىڭ جالپى جينالىسى 2014 جىلعى تازا تابىستىڭ 99,97%-ىن KEGOC-تىڭ جاي اكتسيالارىن ۇستاۋشىلارعا ءبولۋ تۋرالى شەشىم قابىلدادى. ال كومپانيانىڭ ءبىر جاي اكتسياسىنا شاققانداعى سوما 33,13 تەڭگەنى قۇرايدى. ديۆيدەند 2015 جىلعى 25 مامىردان باستاپ تولەنە باس­تايدى, – دەدى باسقارما توراعاسى جۋرناليستەرمەن جۇزدەسۋدە. اكتسيونەرلەر باس قوسۋىنىڭ كۇن تارتىبىندەگى تاعى ءبىر ماڭىزدى ماسەلە, «KEGOC» اق ديرەكتورلار كەڭەسىنىڭ ساندىق قۇرامىن, وكىلەتتىك مەرزىمىن انىقتاۋ, ونىڭ مۇشەلەرى مەن توراعاسىن سايلاۋ بولاتىن. ويتكەنى 2015 جىلعى 8 مامىردا «KEGOC» اق ديرەكتورلار كەڭەسىنىڭ 2012 جىلعى 8 مامىردا سايلانعان قۇرامىنىڭ 3 ء(ۇش) جىلدىق وكىلەتتىك مەرزىمى اياقتالماق. سوعان وراي, اكتسيونەرلەردىڭ جالپى جينالىسى «KEGOC» اق ديرەكتورلار كەڭەسىن 6 ادامدىق قۇرامدا سايلاۋ تۋرالى شەشىم قابىلدادى: «KEGOC» اق ديرەكتورلار كەڭەسىنىڭ توراعاسى بولىپ قۋانىش ابدىعالي ۇلى بەكتەمىروۆ سايلاندى. «KEGOC» اق ديرەكتورلار كەڭەسىنىڭ وكى­لەتتىك مەرزىمى 3 ء(ۇش) جىل بولىپ بەلگىلەندى. ديرەكتورلار كەڭەسىنىڭ قۇرامىنا ەكى جاڭا تاۋەلسىز ديرەكتورلار – دامينيك فاش جانە يانۋش بيالەك سايلاندى. دومينيك فاش – فرانتسيا ازاماتى, سوربوننا تۇلەگى, ين­جەنەر. ورىس ءتىلىن ەركىن مەڭ­گەرگەن. ءىرى ەنەرگەتيكالىق كوم­پانيانىڭ پرەزيدەنتى, ديرەكتور­لار كە­ڭەسىنىڭ توراعاسى بولىپ قىزمەت اتقارعان. ال يانۋش بيالەك –  ۇلى­بريتانيا جانە پولشا مەملەكەتتەرىنىڭ ازاماتى, ۆار­شاۆا تەحنولوگيالىق ۋني­ۆەرسيتەتىنىڭ تۇلەگى, ينجەنەريا سالاسى بويىنشا عىلىم دوكتورى (PhD), ەلەكتروتەحنيكا سالاسى بويىنشا ماگيستر. قازىرگى ۋاقىتتا سكولكوۆسكي عىلىم جانە تەحنولوگيا ينس­تيتۋتىنىڭ ەنەرگەتيكالىق جۇيە­­لەر جونىندەگى «سكولتەحا» زەرت­تەۋ ورتالىعىندا جۇمىس ىستەيدى. رەسەي فەدەراتسياسىنىڭ ءبىلىم جانە عىلىم مينيسترلىگى قارجىلاندىراتىن «تاراتۋشى ەلەكتر جەلىلەر ديناميكاسى, تۇ­راقتىلىعى جانە ولاردى با­قىلاۋ» اتتى ءىرى زەرتتەۋ جۇ­مى­سىن باسقارادى. تاۋەلسىز دي­رەكتورلاردىڭ ەكەۋى دە ورىس ءتىل­دەرىن جەتىك مەڭگەرگەن. جۋرناليستەرمەن ءوت­كەن ءجۇز­دەسۋ بارىسىندا اكتسيونەر­لەردىڭ جالپى جينالىسىندا قارالعان ماسەلەلەر مەن قابىل­دانعان شە­شىمدەر تۋرالى جان-جاقتى اق­پارات بەرىلدى. سونىمەن بىرگە, كوم­پانيا باسشىلارى جۋرناليستەر تاراپىنان قويىلعان بىرقاتار سۇراقتارعا جاۋاپ بەردى. وسى رەتتە كومپانيا تۋرالى تۇيىندەي ايتاتىن بولساق, «KEGOC» اق قازاقستان رەس­پۋبليكاسىنىڭ ءبىرتۇتاس ەلەكتر جۇيەسىنىڭ (بەج) جۇيەلىك وپەراتورى فۋنكتسياسىن اتقارادى. كومپانيا بالانسىندا ۇلتتىق ەلەكتر تورابىن (ۇەت) قۇرايتىن كەرنەۋى 35-1150 كۆ, ۇزىندىعى 24,5 مىڭنان اسا شاقىرىمدى قۇرايتىن ەلەكتر جەتكىزۋ جەلىلەرى جانە ترانسفورماتورلارىنىڭ قون­دىرمالى قۋاتى 36,38 گۆا بولاتىن 77 قوسالقى ەلەكتر ستانتسياسى بار. كومپانيادا ەتم (ەنشىلەس جانە تاۋەلدى مەكەمەلەردى) قوس­قاندا, 4,7 مىڭنان استام ادام جۇمىس ىستەيدى. جىلقىباي جاعىپار ۇلى, «ەگەمەن قازاقستان».