ناقتىراق ايتساق, جاداعاي, ىشىك, بەشپەت, تون, كاجەكەي, قوس ەتەك كويلەك, بۇرمەلى كويلەك, تاقيا, ساۋكەلە, بورىك, شوڭقايما ەتىك كيىپ, تەڭىز جاعالاۋىندا ساپ قۇرعان 5 مىڭ ادام «قازاق ۇلتتىق كيىمىمەن باس قوسقان ەڭ كوپ ادام» اتالىمى بويىنشا گيننەسس رەكوردىن ورناتتى.
«Best Fest Nauryz» اتاۋىمەن وتكەن شاراعا تىركەلۋشىلەر از بولعان جوق, ايتسە دە تەك سولاردىڭ اراسىنان 5 مىڭ ادام عانا قازاق حالقىنىڭ مادەني مۇراسىن الەمدىك دەڭگەيدە ناسيحاتتاۋعا ءوز ۇلەسىن قوسۋعا مۇمكىندىك الدى. ولاردىڭ قاتارىندا ءتۇرلى سالا ماماندارى, ەتنوس وكىلدەرى, قاريالار, سونداي-اق ءوڭىردىڭ شالعاي اۋىلدارى مەن ەلىمىزدىڭ وزگە وبلىس, قالالارىنان ارنايى كەلگەن تۇرعىندار دا بار. ەرلى-زايىپتىلار, ەنە مەن كەلىن, اناسى مەن قىزى سىندى جۇپتاسىپ كەلگەندەر دە بار.
تىركەۋدەن وتكەن قاتىسۋشىلار ارنايى جاساقتالعان الاڭعا جينالىپ, ۇلىبريتانيادان كەلگەن گيننەستىڭ رەكوردتار كىتابىنىڭ رەسمي وكىلدەرى ەسەپ جۇرگىزدى. بىرنەشە ساعاتقا سوزىلعان ساناۋ ناتيجەسىندە قويىلعان تالاپتاردىڭ تولىق ورىندالعانى راستالىپ, ەلىمىزدىڭ جاڭا الەمدىك رەكورد يەسى اتانعانىن دالەلدەيتىن ارنايى سەرتيفيكات تابىستالدى. جاڭبىرلى كۇننىڭ تەڭىز جاعالاۋىنداعى لەبى سالقىن بولدى, الايدا ۇلتتىق كيىممەن جايناڭ قاعىپ, كۇلىمدەگەن قالىڭ ادامنىڭ كوڭىل كۇيى مەن پاتريوتتىق سەزىمى توڭۋ مەن الاڭدى تاستاپ كەتۋگە جول بەرگەن جوق. قاتىسۋشىلار ساعاتتاپ تۇرىپ, ساناقتىڭ ءساتتى اياقتالۋىنا ءبىر كىسىدەي اتسالىستى.
بىرنەشە ساعاتقا سوزىلعان ءىس-شارا ناتيجەسىندە رەكورد سەرتيفيكاتىن قابىلداپ العان ماڭعىستاۋ وبلىسىنىڭ اكىمى نۇرداۋلەت قيلىباي بۇل تاريحي وقيعانىڭ ۇلتىمىزدىڭ مادەني مۇراسىن حالىقارالىق دەڭگەيدە تانىتۋداعى ماڭىزىن ايتىپ, جينالعانداردى ۇلىستىڭ ۇلى كۇنىمەن قۇتتىقتادى.
« ۇلىستىڭ ۇلى كۇنىندە تاريحي ءساتتىڭ كۋاسى بولىپ وتىرمىز. قازاق حالقىنىڭ تەرەڭ تاريحى مەن باي مادەني مۇراسىن, ۇلتتىق ءداستۇرىمىزدى جەر-جاھانعا پاش ەتتىك. ماڭعاز ماڭعىستاۋىمىزدا قازاقتىڭ ۇلتتىق كيىمىنەن الەمدىك رەكورد ورنادى. وسىناۋ زور جەتىستىكپەن بارشا وتانداستارىمىزدى قۇتتىقتايمىن! قازاق حالقىنىڭ مادەنيەتىن ناسيحاتتاۋعا اتسالىسقان باستاماشى توپقا, لوندون قالاسىنان ارنايى كەلگەن گيننەستىڭ رەكوردتار كىتابىنىڭ وكىلدەرىنە جانە رەكورد ورناتۋعا ۇلەس قوسقان بارشا قاتىسۋشىعا العىس بىلدىرەمىن!
مەملەكەت باسشىسى قاسىم-جومارت كەمەل ۇلى توقاەۆ بۋرابايدا وتكەن IV ۇلتتىق قۇرىلتايدا ۇلتتىق بىرەگەيلىگىمىزدى نىعايتۋ جولىندا ناۋرىز مەيرامىنىڭ ورنى ايرىقشا ەكەنىن اتاپ ءوتتى. پرەزيدەنتىمىزدىڭ باستاماسىمەن ناۋرىز مەرەكەسى تۋرالى جاڭا تۇجىرىمداما ازىرلەندى. ەلىمىز ۇلىستىڭ ۇلى كۇنىن 14 ناۋرىزدان, ياعني امال مەرەكەسىنەن باستاپ 10 كۇن بويى اتاپ وتەدى. كۇن مەنەن ءتۇن تەڭەلىپ, جەر-انا جاڭا كۇيگە ەنىپ, تىرشىلىك اتاۋلى ويانىپ, اينالا مارە-سارە بولاتىن ۇلىستىڭ ۇلى كۇنى –جىل باستاۋى ءاز-ناۋرىز بارشاڭىزعا قۇتتى بولسىن, اعايىن!» دەدى ءوڭىر باسشىسى نۇرداۋلەت قيلىباي.
ماڭعىستاۋ وبلىسى اكىمىنە ارنايى سەرتيفيكاتتى تابىستاعان گيننەستىڭ رەكوردتار كىتابىنىڭ رەسمي وكىلى ريچارد ستەننينگ قازاق حالقىن تاماشا ناتيجەگە قول جەتكىزۋىمەن قۇتتىقتادى.
«قۇرمەتتى قازاقستاندىقتار, حالقىڭىزدىڭ باستى مەرەكەسى – ناۋرىز مەيرامىندا رەكورد جاسادىڭىزدار. بۇگىن قازاق ەلىنىڭ سالت-داستۇرگە بەرىك ەكەنىنە, رۋحتى, تالعامى جوعارى حالىق ەكەنىنە كۋا بولدىم. ءىس-شارا دا وتە جوعارى دەڭگەيدە ۇيىمداستىرىلعان. تاريحي وقيعا جاساۋلارىڭىزبەن شىن جۇرەكتەن قۇتتىقتايمىن», دەدى ول.
ۇلتتىق كيىم ۇلت مەرەيىن كوتەردى. ساندىقتا جاتقان 50–70 جىل بۇرىنعى, اكە-شەشە, اتا-اجەلەرى تىككەن, كيگەن كيىمدەرىن كيىپ شىققان قاتىسۋشىلار دا, ءىس-شارانى تاماشالاۋشىلار دا ءماز.
ء«ىس-شاراعا اناممەن بىرگە باردىم. كونەنىڭ كوزى انام – قولى ۇسىناقتى, شەبەر ادام. كەشەگى كۇنى قۋانىشى قوينىنا سىيمادى دەۋگە بولادى. كۇن سالقىن بولسا دا, ادەمى, ساپالى, تابيعي كيىم مەن ماڭىزدى ءىس-شارانىڭ اسەرىنەن توڭعانىمىز جوق. سالتانات جوعارى دەڭگەيدە ءوتتى, قازاقتىڭ كيىمى الەمدىك رەكورد ورناتىپ, مارتەبەمىزدى ارتتىردى. حالقىمىزدىڭ, ۇلتتىق كيىمىمىزدىڭ ابىرويىن اسىرعان تاريحي وقيعاعا قاتىسىپ, ءسال دە بولسا ۇلەسىمدى قوسقانىما قۋانامىن», دەيدى قاتىسۋشى ۇستاز شىنار تۇيەشيەۆا.
ءىس-شارا ماڭعىستاۋدا وتكەنىمەن, گيننەستىڭ رەكوردتار كىتابىنا ەنگەن – قازاقتىڭ ۇلتتىق كيىمى. ورتاق قۋانىشقا ەل بولىپ قۋانۋ جاراسىمدى.
ماڭعىستاۋ وبلىسى
