فوتو: بقو سپورت باسقارماسى
سايىس ءساۋىر ايىنىڭ 3-ىنە دەيىن سوزىلادى. جارىسقا ەلىمىزدىڭ ءۇش قالاسى مەن 17 وبلىسىنان 400-دەن استام سپورتشى قاتىسۋعا نيەت بىلدىرگەن.
«چەمپيوناتتىڭ باستى ماقساتى – توعىزقۇمالاق ويىنىن ناسيحاتتاپ, ونى دامىتۋ, سونداي-اق سالاۋاتتى ءومىر سالتىن ناسيحاتتاۋ. بۇل جارىس جاس سپورتشىلاردى بىرىكتىرىپ, ولاردىڭ شەبەرلىك دەڭگەيىن ارتتىرۋعا, بولاشاق چەمپيونداردى انىقتاۋعا جول اشادى», دەيدى سايىستى ۇيىمداستىرۋشى باتىس قازاقستان وبلىسى دەنە شىنىقتىرۋ جانە سپورت باسقارماسىنىڭ باسشىسى ورىنباسارى ميربولات نۇرجانوۆ. ونىڭ ايتۋىنشا, جارىستىڭ جوعارى دەڭگەيدە وتۋىنە بارىنشا جاعداي جاسالعان.
رەسپۋبليكالىق چەمپيوناتتى ۇيىمداستىرۋشىلار مەن تورەلىك ەتۋشىلەر قاتارىندا توعىزقۇمالاقتان قر مەملەكەتتىك جاتتىقتىرۋشىسى, قر-ءنىڭ ەڭبەك سىڭىرگەن جاتتىقتىرۋشىسى داۋلەت ابدىكارىموۆ, قازاقستان رەسپۋبليكاسى توعىزقۇمالاق سپورتى فەدەراتسياسىنىڭ ۆيتسە-پرەزيدەنتى, قر-ءنىڭ ەڭبەك سىڭىرگەن جاتتىقتىرۋشىسى ماقسات شوتاەۆ, باتىس قازاقستان وبلىسىنىڭ توعىزقۇمالاق فەدەراتسياسىنىڭ پرەزيدەنتى مۇحتار مانكەەۆتەر بار. ال جارىستىڭ باس تورەشىسى – ۇلتتىق دارەجەدەگى تورەشى حاكىمجان ەلەۋسىنوۆ.
چەمپيوناتقا استانا, الماتى, شىمكەنت قالالارىنان, اباي, اقمولا, اقتوبە, الماتى, اتىراۋ, جامبىل, جەتىسۋ, قاراعاندى, قوستاناي, قىزىلوردا, ماڭعىستاۋ, پاۆلودار, تۇركىستان, ۇلىتاۋ, شىعىس قازاقستان جانە باتىس قازاقستان وبلىستارىنان كوماندا قاتىسادى.
«بۇل چەمپيونات جاس سپورتشىلار اراسىندا توعىزقۇمالاق ويىنىنىڭ تانىمالدىلىعىن ارتتىرۋعا, ونى دامىتۋعا جانە ەلىمىزدەگى سپورتتىق مادەنيەتتىڭ دەڭگەيىن كوتەرۋگە ىقپال ەتەدى. جارىس ناتيجەلەرى مەن جەڭىمپازدارى بولاشاقتا ەلىمىزدىڭ اتىن شىعاراتىن مىقتى سپورتشىلاردى دايىنداۋعا ءوز ۇلەسىن قوساتىنى ءسوزسىز», دەيدى ۇيىمداستىرۋشىلار.
باتىس قازاقستان وبلىسى
