فوتو: اشىق دەرەككوزدەن
بريفينگتە س. جاراسباەۆ دەنە شىنىقتىرۋ جانە سپورت سالاسىن رەفورمالاۋدىڭ نەگىزگى تەتىكتەرىن باياندادى. ونىڭ ايتۋىنشا, سپورتشىلاردى دايارلاۋدىڭ ءتيىمدى, اشىق جانە ناتيجەگە باعدارلانعان جۇيەسىن قالىپتاستىرۋ, بۇقارالىق سپورتتى دامىتۋ, سونداي-اق سپورتتىق ينفراقۇرىلىمدى جاڭعىرتۋ باسىم باعىتتار بولىپ قالا بەرەدى.
مينيسترلىك «دەنە شىنىقتىرۋ جانە سپورت تۋرالى» زاڭ جوباسىن ازىرلەدى. ول 2025 جىلدىڭ 29 قاڭتارىندا ماجىلىستە ەكىنشى وقىلىمدا ماقۇلدانىپ, سەناتتىڭ قاراۋىنا جىبەرىلدى.
قۇجاتقا «مۇگەدەكتىگى بار سپورتشىنى سۇيەمەلدەۋشى» ۇعىمى ەنگىزىلەدى.
بۇل جاڭا ەرەجە ءبىرىنشى توپ مۇگەدەكتىگى بار سپورتشىلارعا سپورتتىق ءىس-شارالارعا قاتىسۋ كەزىندە كومەك كورسەتۋگە مۇمكىندىك بەرەدى. زاڭ جوباسى مۇگەدەكتىگى بار سپورتشىلاردىڭ قوزعالىس ەركىندىگىن جانە سپورتتىق جارىستارعا قاتىسۋ شارتتارىن ۇلعايتۋعا باعىتتالعان.
بۇل وزگەرىس سپورتتاعى ينكليۋزيۆتىلىكتى ارتتىرىپ, مۇگەدەكتىگى بار ازاماتتاردىڭ سپورتقا قاتىسۋىنا قولايلى جاعداي جاساۋعا سەپتىگىن تيگىزەدى.
زاڭ جوباسىندا تاعى دا ءبىر ماڭىزدى وزگەرىستىڭ ءبىرى لەگيونەرلەردى مەملەكەتتىك بيۋدجەت جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالىنعانى.
بۇل شارا ەل ازاماتتارىنىڭ سپورتتا دا, قارجىلىق قولداۋدا دا باسىمدىققا يە بولۋىن قامتاماسىز ەتەدى.
زاڭ جوباسىنىڭ قابىلدانۋى ەلىمىزدەگى سپورتتىق جۇيەنى جەتىلدىرۋگە, مەملەكەتتىك قاراجاتتىڭ ءتيىمدى پايدالانىلۋىنا جانە سپورتتىڭ كاسىبي دەڭگەيدە دامۋىنا سەرپىن بەرەدى.
