ايتا كەتەيىك, بۇعان دەيىن اتالعان ەلدەردەن ينۆەستيتسيا تارتۋ ماقساتىندا كاسىپكەرلەر اراسىندا كەزدەسۋلەر وتكەن. اراداعى ەكونوميكالىق بايلانىستاردى وسى مادەني ءىس-شارا بەكىتە ءتۇستى.
كەيىنگى جىلدارى قىزىلوردا وبلىسىنىڭ ونەر كۇندەرى استانا مەن الماتىدا زور تابىسپەن ءوتتى. سونداي-اق, سىر ءوڭىرىنىڭ شىعارماشىلىق ۇجىمدارى ەۋروپا ەلدەرىنە گاسترولدىك ساپارمەن بىرنەشە رەت باردى. وسى جولعى ساپاردىڭ تاعى ءبىر ماقساتى – شەت ەلدەردەگى شىعارماشىلىق ۇجىمدارمەن تاجىريبە الماسۋ.
بيىل قىزىلوردا قالاسىنىڭ قازاق ەلىنىڭ استاناسى بولعانىنا 100 جىل تولدى. وسىدان ءبىر عاسىر بۇرىن اقمەشىتتە وتكەن سەزدە ۇلتىمىزدىڭ «قازاق» اتاۋى قايتارىلىپ, تاريحي ادىلدىك ورنادى. قالانىڭ اتى قىزىلوردا بولىپ وزگەردى.
مەملەكەت باسشىسى قاسىم-جومارت كەمەل ۇلى بۋرابايدا وتكەن ۇلتتىق قۇرىلتايدا ەل استاناسىن قىزىلورداعا كوشىرۋ تۋرالى شەشىمنىڭ قابىلدانعانىنىڭ ءجۇز جىلدىعى تاعى ءبىر تاريحي بەلەس ەكەنىن اتاپ ءوتتى.
«وسىدان ءبىر عاسىر بۇرىن ۇلتىمىزدىڭ ءوز اتاۋىنىڭ ورالۋى تاريحي ادىلدىك ورناتۋ جولىنداعى ماڭىزدى قادام بولعانىن اشىق ايتۋىمىز كەرەك. مۇنداي ماڭىزدى وقيعالار ەل جادىندا ساقتالۋعا ءتيىس. وسى رەتتە قۇرىلتايدىڭ كەلەسى وتىرىسىن سىر بويىندا, كەزىندە قازاق ەلىنىڭ استاناسى بولعان قىزىلوردا قالاسىندا وتكىزۋدى ۇسىنامىن», دەدى مەملەكەت باسشىسى. بۇل شەشىمدى جۇرتشىلىق قىزىلوردانىڭ قازاق تاريحىندا الار ورنىنا, سىر وڭىرىندەگى باستامالار مەن جاڭاشىلدىقتارعا بەرىلگەن جوعارى باعا دەپ قابىلدادى. وسىدان ءبىر عاسىر بۇرىن قازاقتىڭ ساياسي, عىلىمي ورتالىعى بولعان قالادا ەندى ۇلت بولاشاعىنا, مۇراتىنا قاتىستى شەشىمدەر قابىلدانادى.
قىزىلوردا وبلىسىنىڭ ەۋروپا مەملەكەتتەرىندەگى ونەر كۇندەرىنىڭ العاشقى كونتسەرتى «NAURYZ – CELEBRATION OF SPRING» اتاۋىمەن فينليانديانىڭ حەلسينكي قالاسىندا ءوتتى.
ءىس-شارانى قازاقستاننىڭ فينلياندياداعى ەلشىسى ازامات ءابدرايموۆ اشىپ, ساحنا تورىنەن وسى مەرەكەلىك كەشكە قولداۋ بىلدىرگەن نۇرلىبەك ماشبەك ۇلىنا ارنايى العىسىن جەتكىزدى. كونتسەرتتى ەۋروپانىڭ 10 مەملەكەتىندەگى ەلشىلەر, ەلشىلىك قىزمەتكەرلەرى, فينليانديادا تۇراتىن قازاق دياسپوراسى, ستۋدەنتتەر جانە فين حالقى, بارلىعى 500-گە جۋىق كورەرمەن تاماشالادى.
قازاقتىڭ ءداستۇرلى مۋزىكاسى مەن ۇلتتىق ونەرىن ۇلىقتاعان قىزىلوردا وبلىستىق فيلارمونياسى ءداستۇرلى ءان-جىردى اۋەلەتتى.
فينليانديا حالقى عاسىردان عاسىرعا جەتكەن ەپوستىق جىرلارىن, ساۋلەت جانە بەينەلەۋ ونەرى تۋىندىلارىن مادەني مۇرا رەتىندە قۇرمەت تۇتادى.
كۇن مەن ءتۇننىڭ تەڭەلەتىن, جەر ارقاسى كەڭىپ, كۇللى تىرشىلىك قايتا تۇلەيتىن تابيعات مەرەكەسىندەگى كونتسەرتتىڭ شىمىلدىعى «جاراپازان» جىرىمەن ءتۇرىلدى. ەۋروپالىق كورەرمەنگە قازاقتىڭ داستۇرىمەن شاشۋ شاشىلىپ, «تويباستار» شىرقالدى. ناۋرىز-دۋمانعا قاتىسقان قالا تۇرعىندارى مەن قوناقتارى, دياسپورا مۇشەلەرى, وتاندىق جانە شەتەلدىك ستۋدەنتتەر ۇلتتىق مۋزىكامەن جانە داستۇرلەرمەن تەرەڭىرەك تانىسۋعا مۇمكىندىك الدى.
ۇلتتىق مۋزىكانىڭ ۇلى جاۋھارلارىن تورتكۇل دۇنيەگە تانىتىپ جۇرگەن «اقمەشىت» فولكلورلىق ءانسامبلى (جەتەكشىسى – نۇرعيسا نۇرباي), سىر ەلىنىڭ ونەر مايتالماندارى رۋسلان احمەتوۆ, شولپان بيمبەتوۆا, سامال بايسەيتوۆا, اقمارال نوعايباەۆا, مارات سۇگىرباي, ايتىسكەر-اقىن مۇحتار نيازوۆ, حالىقارالىق جانە رەسپۋبليكالىق كونكۋرستاردىڭ لاۋرەاتتارى باعداۋلەت قارعاباەۆ, سىمبات تاسبەرگەنوۆا, ماعجان امانجولوۆ, اقىلبەك تابىنباەۆ, توقتار اعىراەۆ, اقنۇر امانباەۆا, ءسابيت دىلداباەۆ, الماس ءالجانوۆ, زامانبەك نىسانباەۆ, ارمان تولەش قاتىسىپ, ونەر كورسەتتى.
گاسترولدىك ساپار اياسىندا كورەرمەنگە كونتسەرتتىك باعدارلامالارمەن قاتار, قازاقتىڭ ۇلتتىق تاعامدارى مەن ۇلتتىق ناقىشتا جاسالعان سىي-سياپاتى ۇسىنىلدى. جۇرتشىلىق تانىم مەن تاعىلىمعا تولى كەش سىيلاعانى ءۇشىن سىر ونەرپازدارىنا العىس ءبىلدىردى.
