فوتو: قىرمىزى جۇماعاليقىزى
فەستيۆال قازاق حالقىنىڭ باي مادەني مۇراسىن جاڭعىرتۋ, ۇلتتىق قۇندىلىقتاردى دارىپتەۋ جانە ۇمىت بولا باستاعان داستۇرلەردى قايتا جانداندىرۋدى ماقسات ەتتى. وسى ورايدا شارا بارىسىندا ءتۇرلى ەتنوگرافيالىق كورىنىستەر, تەاترلاندىرىلعان قويىلىمدار, ۇلتتىق تاعامدار جارمەڭكەسى, ءداستۇرلى ويىندار مەن قولونەر كورمەلەرى ۇيىمداستىرىلدى.
ەتنوفەستيۆال اياسىندا قازاقتىڭ كونە سالت-داستۇرلەرى مەن ادەت-عۇرىپتارى كەڭىنەن ناسيحاتتالدى. سونداي-اق, ۇلتتىق كيىمدەر مەن اشەكەي بۇيىمدار كورمەسى ۇيىمداستىرىلىپ, قازاق حالقىنىڭ ساندىك ونەرىنە قىزىعۋشىلىق تانىتقانداردىڭ قاتارى كوپ بولدى.
مەرەكەلىك شاراعا كەلگەن قوناقتار قازاقتىڭ ەجەلگى اسحاناسىمەن دە جاقىنىراق تانىستى. ارنايى ۇيىمداستىرىلعان ۇلتتىق تاعامدار جارمەڭكەسىندە قوناقتار قىمىز, شۇبات, باۋىرساق, ناۋرىز كوجە سەكىلدى دامدەردەن اۋىز ءتيدى. ۇلتتىق تاعام ازىرلەۋ شەبەرلەرى ەت اسۋ, قازانجاپپاي, تالقان دايىنداۋ سياقتى ءداستۇرلى ادىستەردى كورسەتتى.
بۇدان بولەك, ەتنواۋىل اۋماعىندا قازاقشا كۇرەس, ارقان تارتىس, اسىق اتۋ, تەڭگە ءىلۋ سەكىلدى ءداستۇرلى ويىندار ۇيىمداستىرىلىپ, جينالعان كوپشىلىك بەلسەندى تۇردە قاتىستى. اسىرەسە, بالالارعا ارنالعان ويىن الاڭدارى ەرەكشە كوڭىل-كۇي سىيلادى.
فەستيۆال بارىسىندا ارنايى ەتنو-فوتوزونالار دايىندالىپ, كەلگەن قوناقتار ۇلتتىق ناقىشتاعى بەزەندىرىلگەن كيىز ۇيلەر مەن قازاقى بۇيىمدار اياسىندا ەستەلىك سۋرەتكە ءتۇستى. كيىز ءۇي شەبەرلەرى, زەرگەرلەر مەن ۇلتتىق قولونەر شەبەرلەرى وزدەرىنىڭ بىرەگەي تۋىندىلارىن كوپشىلىك نازارىنا ۇسىنىپ, ۇلتتىق ونەردىڭ سان الۋان قىرىن پاش ەتتى.
فەستيۆالگە قازاقستاننىڭ تۇكپىر-تۇكپىرىنەن كەلگەن ونەرپازدارمەن قاتار, تۇركىتىلدەس ەلدەردەن دە قوناقتار قاتىستى. ولار وزدەرىنىڭ ۇلتتىق ونەرىن ورتاعا سالىپ, حالىق اندەرى مەن بيلەرىن ورىندادى. بۇل شارا تەك قازاق مادەنيەتىن عانا ەمەس, جالپى تۇركى حالىقتارىنىڭ ورتاق مۇراسىن ناسيحاتتاۋعا باعىتتالعان.
ءىس-شاراعا جينالعان جۇرتشىلىق ۇلتتىق قۇندىلىقتارعا جاقىن بولۋدىڭ ماڭىزدىلىعىن سەزىنىپ, ەرەكشە اسەرمەن تارقاستى.
