كەشە, 22 ناۋرىز كۇنى تۇندە قازاقستاننىڭ توپتىق كەزەڭدەگى العاشقى ويىنىن وتكىزدى. ۋەلستىڭ استاناسى كارديففتە وتكەن ماتچتا الي اليەۆ شاكىرتتەرى الاڭ يەلەرىنەن 3:1 ەسەبىمەن جەڭىلدى.
كەزدەسۋدەگى العاشقى گولدى 9-شى مينۋتتا ۋەلس شابۋىلشىسى دەنيەل دجەيمس سوقتى. ويىننىڭ 32-ءشى مينۋتىندا قازاقستان قۇراماسىنىڭ كاپيتانى 11 مەترلىك ايىپ دوبىن مۇلتىكسىز ورىنداپ, تارازى باسىن تەڭەستىردى. تەڭ ەسەپپەن ءبىرىنشى تايم اياقتالدى.
ەكىنشى تايمنىڭ باسىندا الاڭ يەلەرى بۇرىشتاما دوبىن كوتەرىپ, بەن دەۆيس ەسەپتى ەسەلەدى. ماتچ اياقتالۋعا ساناۋلى مينۋت قالعاندا راببي ماتوندو تابلوداعى كورسەتكىشتى 3:1-گە جەتكىزىپ, كەزدەسۋدىڭ نۇكتەسىن قويدى.
ءسويتىپ, قازاقستان قۇراماسى جەڭىسسىز وتكەن ماتچتار سەرياسىن تاعى دا ۇزارتتى. ەندى ءبىزدىڭ جىگىتتەر ءۇش كۇننەن كەيىن سىرت الاڭدا ليحتەنشتەيمەن شەبەرلىك بايقاسادى. ماتچ ۆادۋتس قالاسىندا وتەدى.
J توبىندا ونەر كورسەتەتىن قازاقستان ۋەلس, ليحتەنشتەين, بەلگيا جانە سولتۇستىك ماكەدونيامەن ۇپايعا تالاسادى.
ايتا كەتەيىك, رەسەيلىك مامان س.چەرچەسوۆ كەتكەننەن كەيىن قازاقستان قۇراماسى باس باپكەرىنىڭ مىندەتىن اتقارۋشى بولىپ الي اليەۆ تاعايىندالعان.
قازاقستان قۇراماسى الەمدىك ءمۋنديالدىڭ توپتىق كەزەڭىندە سوڭعى رەت 2013 جىلى جەڭىسكە جەتتى. ول كەزدە ءبىزدىڭ فۋتبولشىلار فارەر ارالدارىنىڭ قۇراماسىن 2:1 ەسەبىمەن ۇتقان ەدى. سودان بەرى ۇلتتىق قۇراما ىرىكتەۋدە 22 ويىن وتكىزىپ, ونىڭ جەتەۋىندە تەڭ تۇسسە, قالعانىندا جەڭىلىستىڭ كەرمەك ءدامىن تاتتى.
