ۇلتتىق كيىمدى ۇلىقتاۋدى «Egemen Qazaqstan» گازەتى دە ماڭىزدى ماسەلە رەتىندە نازارىنان قالىس قالدىرعان جوق. 2024 جىلى 18 ناۋرىزدا «ۇلتتىق كيىم تەك ناۋرىز ايىنىڭ ايشىعى ما؟» دەگەن تاقىرىپتا ماقالا جاريالاپ, قازاقى كيىمىمىزدىڭ ەل تاريحى مەن تۇرمىسىنان الاتىن ورنى, زامانعا ساي جاڭارا جاڭعىرۋى, كيىمىمىزگە دەگەن قىزىعۋشىلىقتىڭ ارتا ءتۇسۋى تۋرالى ايتا كەلىپ, كوزدىڭ جاۋىن الاتىن كورىكتى كيىمدەرىمىزدىڭ كوكجيەگى تارىلىپ, تەك ناۋرىز ايىنداعى مەرەكەلەردە عانا كيىلەتىنىنە قىنجىلعانبىز. «ۇلتتىق كيىمدى تەك توي-تومالاق, ناۋرىز ايىندا عانا ەمەس, ۇنەمى كيىپ ءجۇرۋدىڭ نەسى ابەس؟ داۋ-دامايى, اشىق-شاشىعى كوپ قازىرگى قوعامدا ۇرپاقتى اداستىرماي, بابا جولىمەن تاربيەلەيمىن دەگەندەر ءۇشىن ۇلتتىق كيىم – باعا جەتپەس بايلىق, تاربيەنىڭ ءوزى. شەتەلدىكتەر قىزىققان قازاق كيىمىنىڭ قادىرىن ءوزىمىز ءبىلىپ, ءوزىمىز قولداپ, ءوزىمىز تۇتىنا جۇرەيىك» دەگەن ەدىك.
قۇرىلتايدا مەملەكەت باسشىسى ايتقان, ءبىر جىل بۇرىن «Egemen Qazaqstan» گازەتى كوتەرگەن ماسەلە بيىل ماڭعىستاۋ وڭىرىندە الەمدىك دەڭگەيدە ۇيىمداستىرىلعان ەلىمىزدىڭ مادەنيەتىن, دۇنيەتانىمىن, ىسمەرلىگىن ناسيحاتتايتىن ءىس-شاراعا ارقاۋ بولدى. ناۋرىز مەرەكەسىندە, ياعني 22 ناۋرىز كۇنى اقتاۋ قالاسىندا قازاقتىڭ ۇلتتىق كيىمىن كيگەن 5 مىڭنان استام ادام اۋقىمدى ۇلتتىق كيىم فەستيۆالىن وتكىزەدى. جوبا اياسىندا ۇلتتىق كيىم كيگەن 5 مىڭنان استام ادام «قازاق ۇلتتىق كيىممەن ەڭ كوپ ادام جينالىسى» اتالىمى بويىنشا الەمدىك گيننەسس رەكوردىن ورناتۋدى ماقسات ەتتى. سونداي-اق «Best Fest Nauryz» ءىس-شاراسىن ۇيىمداستىرۋ توبىنىڭ جەتەكشىسى اسەمگۇل ادامبايدىڭ ايتۋىنشا, ءىس-شارانىڭ ماقساتى – قازاق حالقىنىڭ بىرەگەي مادەني مۇراسىن الەمگە تانىتۋ, ۇلتتىق داستۇرلەردىڭ بايلىعىن دارىپتەۋ جانە قوعامدى ورتاق قۇندىلىقتارعا ۇيىستىرۋ جانە ءداستۇر مەن جاڭاشىلدىقتىڭ ۇيلەسىمىن كورسەتۋ.
– ءىس-شاراعا قاتىسۋشىلار كونە نەمەسە زاماناۋي ۇلگىدە جاڭارتىلعان ۇلتتىق كيىمدەردى, اتاپ ايتقاندا بەشپەت, جاداعاي, كامزول, شاپان كيەدى, ال ۇلتتىق باسكيىم مەن اياقكيىمدى تاڭداۋ قاتىسۋشىلاردىڭ ەركىندە. سالتاناتى جاراسقان شەرۋدە فۋتبولكا, كورسەت, كلاسسيكالىق كوستيۋم, جەمپىر, سۆيتەر, زاماناۋي ستيلدەگى باسقا دا كيىمدەردى كيۋگە, سونىمەن قاتار كيىمگە ءارتۇرلى جازۋلار مەن سۋرەتتەر جابىستىرۋعا تىيىم سالىنادى, دەدى مۋزەي سالاسىنىڭ ارداگەرى تامارا جۇماليەۆا.
قازاقتىڭ ۇلتتىق كيىمدەرىن كيىپ, گيننەستىڭ رەكوردىن ورناتامىن دەگەن توپقا جاسى 16-عا تولعان ەلىمىزدىڭ ازاماتتارى قاتىسۋىنا رۇقسات ەتىلگەن. از ۋاقىت ىشىندە ەلىمىزدىڭ بارلىق وڭىرلەرىنەن قاتىسۋشىلار تىركەلدى, ءتىپتى ماڭعىستاۋدىڭ الىس اۋىلدارىنان ارنايى كەلەتىن ازاماتتار, اجەلەر مەن كەلىندەر از ەمەس. قازاقستان حالقى اسسامبلەياسىنان وزگە ۇلتتىڭ 50 وكىلى قازاقتىڭ ۇلتتىق كيىمىمەن ساپقا قوسىلادى.
ۇلتتىڭ رۋحىن كوتەرىپ, جاستار اراسىندا داستۇرگە دەگەن قىزىعۋشىلىقتى ارتتىراتىن جوبانى سەرىكتەس رەتىندە ماڭعىستاۋ وبلىسىنىڭ اكىمدىگى «BS Holding» قۇرىلىس كومپانياسىنىڭ دەمەۋشىلىگىمەن وتكىزەدى.
كاسپي تەڭىزى جاعاسىندا ساپ قۇراتىن ۇلتتىق كيىمدى 5 مىڭنان استام ادام ماقساتىنا جەتىپ, گيننەستىڭ رەكوردتار كىتابىنا ەنگەن جاڭالىق تۋرالى گازەتىمىزدىڭ الداعى ساندارىندا بۇيىرسا, حابارلايتىن بولامىز.
ماڭعىستاۋ وبلىسى
