گرەك-ريم كۇرەسىنەن ەلىمىزدىڭ قۇراماسىنا 1995, 1996, 2003, 2004, 2006 جىلدار اسا تابىستى بولدى. ۇلتتىق كوماندانىڭ تىزگىنىن داڭقتى بالۋان داۋلەت تۇرلىحانوۆ ۇستاعان تۇستا ازيا چەمپيوناتتارىندا ءتورت التىننان ولجالاپ, تورتكۇل دۇنيە جانكۇيەرلەرىن تامساندىردىق. 1995 جىلى مانيلادا رۋسلان جۇمابەكوۆ (74 كگ), باقتيار بايسەيىتوۆ (82 كگ), داۋلەت تۇرلىحانوۆ (90 كگ), سەرگەي ماتۆيەنكو (100 كگ) سىندى ساڭلاقتار باس جۇلدەنى ولجالادى. وسى جارىستا جەرلەستەرىمىز ۇزاق جىل بويى ازيادا ۇستەمدىك قۇرعان وڭتۇستىك كورەيانى تۇعىردان تايدىرىپ, جالپىكوماندالىق ەسەپتە كوش باستادى. تاياۋدا عانا تاۋەلسىزدىك العان وعلانداردان وندايدى كۇتپەگەن سول كەزدەگى كورەي قۇراماسىنىڭ باس باپكەرى, كەزىندەگى تۇرلىحانوۆتىڭ سىرالعى قارسىلاسى كيم ەن نامنىڭ تاڭدانىسىن جاسىرا الماي, شاراسىزدىقتان باس شايقاعانىن دا كوزىمىز كوردى.
1996 جىلى سياوشاندە ءدال سول كورسەتكىشتى قايتالادىق. قىتاي ەلىندە تاعى ءتورت ءاپايتوسىمىز قارسىلاستارىنىڭ بارلىعىن سىپىرا ۇتىپ, جەڭىس تۇعىرىنىڭ ەڭ بيىك ساتىسىنا كوتەرىلدى. ونداي باق يۋري مەلنيچەنكو (57 كگ), داۋلەت تۇرلىحانوۆ (82 كگ), سەرگەي ماتۆيەنكو (90 كگ), سەرگەي فەدورەنكوعا (100 كگ) بۇيىردى.
ءححى عاسىردىڭ العاشقى جىلدارى دا تابىسقا تولى بولدى. ماسەلەن, 2003 جىلى نيۋ-دەليدە اسەت يمانباەۆ (55 كگ), ابدوللا جابىرايىلوۆ (84 كگ), گەورگي تسۋرتسۋميا (120 كگ) باس جۇلدەنى قانجىعاسىنا بايلادى. 2004 جىلى الماتىدا ەسىمدەرى جوعارىدا اتالعان بەلدى بالۋاندار ءدال سول ناتيجەلەرىن اينا-قاتەسىز قايتالادى. 2006 جىلعى ازيا چەمپيوناتى قايتا الاتاۋ باۋرايىندا ءوتتى. بۇل جولى نۇرباقىت تەڭىزباەۆ (60 كگ), مارعۇلان اسەمبەكوۆ (96 كگ), گەورگي تسۋرتسۋميا (120 كگ) تەڭدەسسىز دەپ تانىلدى. سونداي-اق سەگىز جارىستا (1997, 1999, 2005, 2014, 2018, 2021, 2022, 2023 جىلدارى) ەكى التىندى, 11 دودادا (1993, 2000, 2009, 2011, 2012, 2013, 2015, 2016, 2017, 2020, 2024) ءبىر التىندى يەلەندىك. بەس بايراقتى باسەكەدە (2001, 2007, 2008, 2010, 2019) وتانداستارىمىزعا باس جۇلدە بۇيىرمادى.
كۇرەس تۇرلەرىندە جالپى ەسەپتىڭ قورىتىندىسى شىعارىلعان كەزدە مەدالداردىڭ سانى ەمەس, ءار كوماندانىڭ جيعان جالپى ۇپايى ەسەپكە الىنادى. وسى ورايدا ەلىمىزدىڭ قۇراماسى وزدەرى قاتىسقان 29 ازيا چەمپيوناتىنىڭ جەتەۋىنىڭ (1995, 2003, 2004, 2006, 2014, 2018, 2022) كوماندالىق سايىسىندا جەكە-دارا كوش باستادى. وڭتۇستىك كورەيانىڭ دا (1993, 1996, 1997, 2000, 2005, 2010, 2013) كورسەتكىشى ءدال سونداي. دەسەك تە 1983–1992 جىلدار ارالىعىندا قۇرلىقتىق دودا تاعى بەس رەت ۇيىمداستىرىلعانىن ەسكەرگەن ءجون. سونىڭ ۇشەۋىندە (1989, 1991, 1992) كورەيلەردىڭ قارقىنىنا ەشكىم شىدامادى. سول كەزەڭدە يران (1983) مەن جاپونيانىڭ دا (1987) باعى جاندى. ەلىمىز كسرو-نىڭ قۇرامىندا بولدى.
جاڭا عاسىر تابالدىرىقتان اتتاعان تۇستا يراننىڭ «كلاسسيكتەرى» قارقىنىن كۇرت كۇشەيتتى. پارسى ەلىنىڭ 14 مارتە (2001, 2007, 2008, 2009, 2011, 2012, 2015, 2016, 2017, 2019, 2020, 2021, 2023, 2024) مەرەيى ۇستەم بولدى. ءسويتىپ, ولار قازاقتاردان دا, كورەيلەردەن دە وزدى. تاعى ءبىر جارىستا وزبەكستاننىڭ (1999) اسىعى الشىسىنان ءتۇستى. جالپى ەسەپتە تەك وسى ءتورت ەلدىڭ ورەندەرى عانا توپ جاردى.
1993–2024 جىلدار ارالىعىندا يراننىڭ – 58, وڭتۇستىك كورەيانىڭ – 56, قازاقستاننىڭ – 44, قىرعىزستاننىڭ – 23, وزبەكستاننىڭ –19, جاپونيانىڭ – 16, قىتايدىڭ – 11, سولتۇستىك كورەيانىڭ – 3, ءۇندىستان مەن سيريانىڭ – 2 گرەك-ريم كۇرەسى شەبەرى ازيا چەمپيونى دەگەن اتاققا قول جەتكىزدى. سارى قۇرلىقتىڭ باستى دوداسىندا دارالانۋعا نەبارى 10 مەملەكەتتىڭ مارقاسقالارىنىڭ عانا كۇش-جىگەرلەرى جەتتى. باسقالارى كۇمىس پەن قولانى قاناعات تۇتتى.
وسى سپورت ءتۇرىن سەرىك ەتكەن قازاق ەلىنىڭ 44 ورەنى ازيا چەمپيونى اتانعانىن جوعارىدا ايتتىق. سولاردىڭ اراسىنان سەرگەي ماتۆيەنكو (1993, 1995, 1996, 1999) مەن گەورگي تسۋرتسۋميانى (2003, 2004, 2005, 2006) بولە-جارا اتاپ وتسەك, ەش ايىبى جوق. ولار ءتورت رەتتەن توپ جاردى. داۋلەت تۇرلىحانوۆ (1995, 1996), باقتيار بايسەيىتوۆ (1995, 2000), يۋري مەلنيچەنكو (1996, 1997), محيتار مانۋكيان (1997, 1999), اسەت يمانباەۆ (2003, 2004), ابدوللا جابىرايىلوۆ (2003, 2004), مارعۇلان اسەمبەكوۆ (2005, 2006), المات كەبىسباەۆ (2011, 2018), نۇرماحان تىناليەۆتىڭ (2013, 2015) ەكى مارتە مەرەيى ۇستەم بولدى. سونداي-اق رۋسلان جۇمابەكوۆ (1995), اناتولي فەدورەنكو (1996), نۇرباقىت تەڭىزباەۆ (2006), دارحان باياحمەتوۆ (2009), ەربول قوڭىراتوۆ (2012), نۇرسۇلتان تۇرسىنوۆ (2014), ەرۇلان ىسقاقوۆ (2014), دوسجان قارتىقوۆ (2016), ماقسات ەرەجەپوۆ (2017), اسحات دىلمۇحامەدوۆ (2018), تەمىرلان شادۋكاەۆ (2020), ايدوس سۇلتانعالي (2021), سۇلتان اسەت ۇلى (2021), مەيىرجان شەرماحامبەت (2022), ءالىمحان سىزدىقوۆ (2022), يبراگيم ماگومادوۆ (2023), دياس قالەن (2023), ەرجەت جارىلقاسىن (2024) سىندى جامپوزدار سارى قۇرلىقتا الدىنا جان سالمادى.
كەيىنگى ازيا چەمپيوناتى بىلتىر بىشكەكتە ءوتتى. بۇل جارىستا يران قۇراماسىنا تەڭ كەلەر كوماندا تابىلمادى. پارسى ەلىنىڭ پەحلەۆاندارى 4 التىن, 3 كۇمىس, 2 قولانى ولجالادى. ەكىنشى, ءۇشىنشى ورىنداردى جاپونيا (3+2+2) مەن قىرعىزستان (1+2+3) يەلەندى. ەلىمىز (1+2+1) ءتورتىنشى ساتىعا تۇراقتادى. بالۋاندارىمىز اراسىنان ەرجەت جارىلقاسىن (63 كگ) جەڭىمپاز اتاندى. شەشۋشى تۇستا ول جاپونيالىق اياتا سۋزۋكيگە سان سوقتىردى. نۇرسۇلتان تۇرسىنوۆ (87 كگ) پەن يۋسۋف ماتسيەۆ (97 كگ) فينالدا ءسۇرىندى. ەكەۋى دە يراننىڭ بالۋاندارىنا ەسە جىبەردى. يبراگيم ماگومادوۆ (77 كگ) قولا مەدالدى ەنشىلەدى.
گرەك-ريم كۇرەسىنەن 2024 جىلعى ازيا چەمپيوندارى: 55 كگ – رو يۋچول (وڭتۇستىك كورەيا), 60 كگ – جولمان شارشەنبەكوۆ (قىرعىزستان), 63 كگ – ەرجەت جارىلقاسىن (قازاقستان), 67 كگ – سايد ەسمايلي (يران), 72 كگ – سينگو حارادا (جاپونيا), 77 كگ – ناو كۋساكا (جاپونيا), 82 كگ – تايزو يوشيدا (جاپونيا), 87 كگ – ناسەر اليزادە (يران), 97 كگ – مۇحاممەدحادي ساراۆي (يران), 130 كگ – ءامين مىرزازادە (يران).
