ء«بىرتۇتاس تاربيە» باعدارلاماسىن جۇزەگە اسىرۋ اياسىندا كوكشەتاۋ قالاسىنىڭ №6 مەكتەپ-ليتسەيى ۇيىمداستىرعان شىعارماشىلىق بايقاۋعا وبلىس ورتالىعىنداعى مەكتەپتەردىڭ 9-11 سىنىپ وقۋشىلارى قاتىستى. ءىس-شارانىڭ تۇپكى ماقساتى – سان عاسىر بويى حالىقتىڭ قازىناسىنا اينالعان ۇلتتىق قۇندىلىقتاردى ناسيحاتتاۋ ارقىلى ءماندى مادەني مۇرانى قايتا جاڭعىرتۋ, سونداي-اق ءداستۇرلى ۇلتتىق مادەنيەت نەگىزىندە وسكەلەڭ ۇرپاقتىڭ ەستەتيكالىق تالعامىن قالىپتاستىرۋ. بايقاۋ شارتى بويىنشا قاتىسۋشىلار قازاقتىڭ تانىم-تۇسىنىگى مەن داستۇرلەرىنە ساي تىگىلگەن ۇلتتىق كيىم ۇلگىلەرىن تانىستىرىپ, ولاردىڭ جاسالۋ بارىسى كورسەتىلگەن بەينەروليكتەر ۇسىندى جانە وسى ورايداعى شىعارماشىلىق قابىلەتتەرىن ورتاعا سالدى.
قازىلار القاسى بايقاۋ جەڭىمپازى مەن جۇلدەگەرلەرىن جانە اتالىم يەگەرلەرىن اتا-بابا داستۇرلەرىن ەسكەرە وتىرىپ ازىرلەنگەن زاماناۋي كيىمدە اۆتورلىق ىزدەنىستىڭ بولۋى, تاڭدالعان كيىم ۇلگىسىنىڭ تالعامعا ساي كەلۋى سەكىلدى ولشەمدەر بويىنشا انىقتادى.
بايقاۋ قورىتىندىسىندا ەرەكشەلەنگەن وقۋشىلار ماراپاتتالدى. №6 مەكتەپ-ليتسەيىنىڭ 11-سىنىپ وقۋشىسى ديلنارا باەتوۆا باس جۇلدەنى جەڭىپ الدى. ءبىرىنشى ورىندى №17 مەكتەپ-گيمنازياسىنىڭ 9-سىنىپ وقۋشىسى ينايا مولداباەۆا يەلەندى. ءىس-شارا سوڭى ۇستازدار مەن وقۋشىلاردىڭ كونتسەرتتىك قويىلىمدارىنا ۇلاستى.
كوكشەتاۋ
