ناۋرىزناما «سامۇرىق-قازىنا» كومپانيالارى توبىندا كەڭىنەن اتالىپ ءوتىپ جاتىر. 255 مىڭنان استام ادام جۇمىس ىستەيتىن كومپانيانىڭ ءىرى شاھارلارمەن قاتار, وڭىرلەردەگى بولىمدەرى مەن كاسىپورىندارىندا قايىرىمدىلىققا, ينكليۋزيۆتى باعدارلامالاردى دامىتۋعا, مادەني مۇرانى ساقتاپ, ناسيحاتتاۋعا باعىتتالعان ءىس-شارالار وتكىزىلدى. سالت-داستۇرلەر مەن ەل تاريحىنا قۇرمەت كورسەتىپ, قىزمەتكەرلەر ۇلتتىق كيىم كيىپ, قايىرىمدىلىق ىستەرىنە بەلسەندى قاتىسىپ, ۇلت بولمىسىنىڭ كورىنىسى جاڭعىرادى.
«ناۋرىز – جاڭارۋ مەن مولشىلىقتىڭ, بىرلىكتىڭ ءرامىزى. بۇل مەيرامنىڭ ءبىز ءۇشىن ماڭىزى زور. ول قازاق حالقىنىڭ قوناقجايلىعىن, تاتۋلىعىن كورسەتەدى. وتكەن كۇندى سارالاپ, بولاشاققا جاڭا ماقساتتار قوياتىن كەزەڭ. ناۋرىزناما ونكۇندىگى اياسىندا بىرقاتار الەۋمەتتىك باستامالاردى جۇزەگە اسىردىق: استانا قالاسىندا ەرەكشە بالالارعا ارنالعان ينكليۋزيا كابينەتىن, اقمولا وبلىسىندا سپورت كەشەنىن اشتىق. مۇقتاج جاندارعا كومەك كورسەتۋ ماقساتىندا قايىرىمدىلىق اكتسيالارى ءوتىپ جاتىر. جالپى, كومپانيالار توبى بويىنشا 300-دەن استام شارا ۇيىمداستىرىلدى», دەدى «سامۇرىق-قازىنا» باسشىسى نۇرلان جاقىپوۆ ناۋرىز مەرەكەسىنە ارنالعان سالتاناتتى شارادا.
سونداي-اق «سامۇرىق-قازىنا» توبى ەكولوگيالىق جوبالارعا ەرەكشە ءمان بەرەدى. ماسەلەن, ەلىمىزدىڭ وڭتۇستىك جانە باتىس وڭىرلەرىندە «تازا قازاقستان» رەسپۋبليكالىق اكتسياسى اياسىندا 250-دەن استام اعاش وتىرعىزىلدى. بىلتىر بۇل باستاما بويىنشا 113 مىڭنان استام جاسىل جەلەك ەگىلسە, بيىل تاعى 138 مىڭ كوشەت وتىرعىزۋ جوسپارلانىپ وتىر. ناۋرىزناما اياسىندا قورعا قاراستى كومپانيالاردا 10 مىڭنان استام قىزمەتكەردىڭ قاتىسۋىمەن الداعى كۇندەرى اۋقىمدى سەنبىلىكتەر وتەدى.
پورتفەلدىك كومپانيالاردىڭ قىزمەتكەرلەرى مەرەكەلىك شارالاردى شىعارماشىلىقپەن ۇيىمداستىرىپ, ءبىر كىسىدەي جۇمىلىپ, جوعارى دەڭگەيدە اتاپ ءوتتى. ماسەلەن, «قازاقستان تەمىر جولى» ۇلتتىق كومپانياسى ەل بويىنشا ەتنواۋىلدار ۇيىمداستىردى, ال جۇمىسشىلار بالالار ۇيلەرى مەن قارتتار ۇيلەرىنە بارىپ, كومەك كورسەتتى. ال «QazaqGaz» ۇيىمى شەبەرلىك ساباقتارىن ۇيىمداستىرىپ, بەتاشار ءراسىمىن كورسەتتى جانە «QG Games: Nauryz» سپورتتىق-زياتكەرلىك ءتۋرنيرى مەن وزگە دە ءىس-شارالاردى وتكىزدى.
«سامۇرىق-ەنەرگو» جانە «Kegoc» ۇيىمدارى بولسا كيىز ۇيلەر قۇرىپ, ءتۇرلى بايقاۋلار, چەللەندجدەر, ۇجىمدىق مەرەكەلىك ءىس-شارالار ۇيىمداستىردى, بالالار مەن قارتتار ۇيلەرىنە ازىق-ت ۇلىك, كەرەكتى زاتتار الىپ بەردى.
ال «تاۋ-كەن سامۇرىق» كومپانياسىنىڭ قىزمەتكەرلەرى ۇلتتىق سپورت تۇرلەرىنەن سايىستار وتكىزىپ, قايىرىمدىلىق شارالارىنا قاتىستى. «شالقياتسينك» ۇجىمى جاڭاقورعان اۋىلىندا كيىز ءۇي تىگىپ, اعا بۋىنعا قۇرمەتپەن ەڭبەك سىڭىرگەن جۇمىسشىنىڭ وتباسىنا بارىپ, مەرەكەمەن قۇتتىقتادى.
«قازاتومونەركاسىپ» كومپانياسى دا بىرقاتار قايىرىمدىلىق, ەكولوگيالىق جانە مادەني شارالار وتكىزدى. سونداي-اق قۇرىلىس سالاسىنداعى «Samruk-Kazyna Construction» ۇيىمى ۇلتتىق كيىمدەر بايقاۋى مەن اسىق اتۋ سايىسىن وتكىزىپ, از قامتىلعان وتباسىلاردىڭ بالالارىنا كومەك كورسەتتى.
وسىلايشا, ناۋرىزناما ونكۇندىگىنىڭ ءار كۇنىندە وتكىزىلگەن ءىس-شارالار ۇجىمدىق بىرلىكتى نىعايتىپ, سالت-ءداستۇر, ادەت-عۇرپىمىز بەن تاريحىمىزدى قۇرمەتتەپ, وسكەلەڭ ۇرپاققا ونەگە بولۋ جولىندا ماڭىزى زور ەكەنىن كورسەتىپ وتىر.
ناۋرىز – كوكتەم مەرەكەسى عانا ەمەس, ەل بىرلىگىنىڭ, ىزگىلىكتىڭ, جاڭارۋدىڭ, جاڭا كەزەڭنىڭ بەلگىسى. ۇلتتىق ءال-اۋقات قورى سياقتى ءىرى بيزنەس قاۋىمداستىعىنىڭ الەۋمەت الدىنداعى جاۋاپكەرشىلىگى مەرەكەنى تويلاپ, قايىرىمدىلىق اكتسيالارىن وتكىزۋمەن شەكتەلمەيدى. ول ۇلتتىق قۇندىلىقتاردى ساقتاي وتىرىپ, جاڭا كوزقاراستاعى ءادىل ءارى ۇيلەسىمدى قوعام قۇرۋعا باعىتتالعان جۇيەلى جۇمىستى قامتيدى.
اسەمگۇل نۇراحمەتوۆا
