كوكشەتاۋ مەن قورعالجىنعا دەيىنگى كەڭ كوسىلگەن سايىن دالادا ورمان بارشىلىق. وبلىستىق تابيعات رەسۋرستارى جانە تابيعاتتى رەتتەۋ باسقارماسىنا قاراستى 13 ورمان شارۋاشىلىعى جۇمىس ىستەيدى. شارۋاشىلىقتار ەل يگىلىگىن كوزدىڭ قاراشىعىنداي كۇزەتىپ, جىل سايىن كوشەت ەگىپ, ورمان القابىن كەڭەيتىپ كەلەدى. بۇگىندە وڭىردەگى ورمان قورىنىڭ اۋماعى 1,06 ميلليون گەكتاردى قۇرايدى. ونىڭ ۇشتەن ءبىرى, ياعني 445,3 مىڭ گەكتارى – ورماندى القاپ. مەملەكەتتىك ورمان قورى باسقارماعا تيەسىلى. ول دەگەنىڭىز 405,1 مىڭ گەكتار.
جوعارىدا مەملەكەتتىك ورمان شارۋاشىلىقتارى ورمان ۇلەسىن مولايتۋ باعىتىندا ەسەلى جۇمىس ىستەپ كەلە جاتقاندىعىن ەكپىن ءتۇسىرىپ ايتىپ وتتىك. ءسال تالداۋ جاسالىق, 2009 جىلى 17,6 مىڭ گەكتار القاپقا كوشەت وتىرعىزىلدى. استانا – ششۋچينسك باعىتىنداعى اۆتوجولدىڭ قوس قاپتالى ورمانشىلاردىڭ وڭدى جۇمىسىنىڭ ارقاسىندا كوركەيىپ كەلەدى. جاسىل بەلدەۋ جىل وتكەن سايىن جايقالىپ ءوسىپ, كوزقۋانىشقا اينالىپ وتىر. وكپەك جولاۋشى بۋراباي تاۋلارىنىڭ باۋرايىنان باستاۋ الىپ, شورتاندىعا دەيىن سوزىلاتىن جول بويىندا تامىلجىعان تابيعاتتىڭ قۇنارلى ءبىر پۇشپاعىنا كوز سۋسىنداتىپ, كوكىرەگىن قۋانىشقا تولتىرادى. جول بويىنداعى جاسىل بەلدەۋ جىل وتكەن سايىن ەسەلەي كوبەيىپ, سان الۋان اعاش بوي كوتەرىپ, سىرباز سۇلۋلىعى الەمگە اڭىز بولىپ تاراعان جۇماق ولكەنىڭ جۇپار ءيىسىن سامال جەلمەن تاراتىپ, پەيىش ءپىشىندى عاجايىپ كورىنىسكە يە بولىپ بارادى.
ەل بايلىعىن ەسەلەۋ تۋرالى مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, بۇل تاراپتاعى جۇمىس مەيلىنشە مۇقيات اتقارىلىپ جاتىر. پرەزيدەنت تاپسىرماسىندا كەيىنگى بەس جىل ىشىندە ورمان قورىن ەسەلەۋ ماقساتىندا 2 ميللياردقا جۋىق كوشەت وتىرعىزۋ مىندەتى جۇكتەلگەن بولاتىن. وسى تاپسىرمانى ورىنداۋ بارىسىندا ءوڭىر 2021–2027 جىلدارى 150 ميلليون دانا قىلقان جاپىراقتى جانە جاپىراقتى اعاش كوشەتتەرىن 23,8 مىڭ گەكتارعا وتىرعىزۋدى مەجەلەگەن ەدى. 2021 جىلى ورمان شارۋاشىلىقتارى 1 370 گەكتارعا كوشەت وتىرعىزدى. اۋەل باستا 970 گەكتار جوسپارلانعان. تاماشا تابيعاتتىڭ سۇلۋ اجارىن سىلاندىراتىن شاراپاتتى شارۋاعا بەلسەنە ۇلەس قوسقان ورمانشىلار بۇل تاراپتاعى جوسپاردى 141%-عا ورىنداپ شىقتى. 2022 جىلى ورمان شارۋاشىلىقتارى جوسپاردا كورسەتىلگەن 1 280 گەكتاردىڭ ورنىنا 2 845,5 گەكتار جەرگە كوشەت وتىرعىزدى. 17,2 ميلليون دانا كوشەت ايالى قولداردىڭ شاراپاتىمەن كوكتەپ بوي كوتەردى. جوسپار 222,3%-عا ورىندالدى. ودان كەيىنگى جىلدارى دا قىرۋار جۇمىس اتقارىلدى. بيىل ورمان شارۋاشىلىقتارى 2 مىڭ گەكتار جەرگە 14 ميلليون دانا كوشەت وتىرعىزۋدى مەجەلەپ وتىر.
بۇل ىستە ەڭ باستىسى – كوشەت دايىنداۋ. 11 تالىمباقتىڭ 171 گەكتار القابىندا 10 ميلليون دانا ءبىر-ەكى جىلدىق كوشەت باپتالىپ, دايىن تۇر. بۇل كولەم بارلىق قاجەتتىلىكتى وتەۋگە تولىق جەتەدى. ورمان شارۋاشىلىقتارى جاپىراقتى اعاش تۇرلەرىنىڭ تۇقىمىن دەر كەزىندە جيناپ كەپتىرىپ قويعان بولاتىن. ەرتە قامدانعاننىڭ ەسەسى كەتپەيدى دەگەندەي, 113 توننا تۇقىم جينالدى. 7 تۇقىم كەپتىرگىشتە 70 توننا قاراعاي بۇرشىكتەرى وڭدەۋدەن وتكىزىلدى.
جۇمىس اۋقىمى كەڭەيگەننەن كەيىن جاڭا تالىمباقتاردىڭ قۇرىلىسىن جۇرگىزۋ قاجەتتىلىگى تۋىنداپ وتىر. جالپى كولەمى 62 گەكتاردى قۇرايتىن تۇراقتى تالىمباقتىڭ جوبالاۋ-سمەتالىق قۇجاتى دايىندالىپ جاتىر. ويعا العان ءىس وڭىنان وڭعارىلعان كەزدە كوكشە دالاسىنداعى كوشەتتەردىڭ سانى دا وسە تۇسپەك. ءار جىل سايىن ءوز ىسىنە جاۋاپكەرشىلىكپەن قارايتىن ورمان شارۋاشىلىعىنىڭ ەڭبەككەرلەرى ەسەلى ۇلەسىن قوسىپ جاتقانىمەن, وڭىردەگى ورماندى القاپتىڭ كولەمى بارلىق جەردىڭ 3%-ىن عانا قۇرايدى. تاپسىرما جۇزەگە اسىرىلعان كەزدە قولدىڭ سالاسىنداي اق قايىڭدار مەن ماڭگى جاسىل قاراعايلار كومكەرگەن كورىكتى ءوڭىردىڭ ومىراۋىندا بالعىن كوشەت كۇنگە بوي سالىپ كوتەرىلىپ, ورماندى القاپتىڭ ومىراۋى ىرىسقا تۇنىپ تۇرماق.
اقمولا وبلىسى
