«تەندەردىڭ» تالابىندا تەمىر جاشىك تە بولسا...

ايلاپ-اپتالاپ كەشىكسە دە اۋىلدا تۇراتىن اعايىندى گازەت-جۋرنالدىڭ ءوزى ىزدەپ بارادى. بىلايشا ايتقاندا, باسپاسوزگە جازىلعان بولسا, سومكە اسىنعان پوشتاشى, ايتەۋىر, ءبىر جەتكىزەدى. ال قالا­داعى اعايىندار جازىل­عان گازەت-جۋرنالدارىن ءوز­دەرى ىزدەپ جۇرەدى. ويتكەنى, قالا­داعى قاي ءۇيدىڭ كىرەبەرىسىندە باياعىداي پوشتانىڭ تەمىر جاشىگى بار دەيسىز؟ سودان ۇيدە كۇندىز ەشكىم بولماي, ەسىككە قىستىرىپ كەتكەن گازەتتىڭ قولدى بولاتىنى بار. اقشا شىعارىپ, بىرەۋ جازىلادى, ەكىنشى بىرەۋ قولتىعىنا قىستىرىپ كەتىپ, قىزىعىن كورەدى. راس, اۋىلعا قاراعاندا قالا حالقىنىڭ گازەت-جۋرنالعا جازىلۋعا دەگەن ىقىلاسىنىڭ كەم بولاتىنى باياعىدان بەل­گىلى. بالكىم, ولار كوشە بويىن­داعى دۇڭگىرشەكتەردەن ساتىپ الا سالعاندى وڭاي كورەتىن شى­عار. مۇمكىن قولىنداعى الا­قانداي ۇيالى تەلەفون ار­قىلى جاڭالىقتىڭ بەتتەرىن پاراقتاپ, كەڭسە تۇگىلى جەكە پاتەرلەردىڭ ءوزىن ورمەكشىنىڭ تورىنداي شىرماپ العان ينتەرنەتتەن ءبارىن وقىپ وتىرامىز دەيتىن شىعار. قالاي ايتساق تا, قالالىقتاردىڭ اق­پارات الۋدا مۇمكىندىگى مول ەكەنى راس. بىراق, شاھار جۇرتىنىڭ گازەت-جۋرنالعا جا­زى­لايىن دەگەن قادامىنىڭ كىبىر­تىكتەي بەرۋىنە ءبىر جاعى وسى تەمىر جاشىك تە كىنالى سياقتى. شىنىن ايتۋ كەرەك, كوپقاباتتى ۇيدە تۇراتىن­دار گازەت-جۋرنالدارىنىڭ امان-ەسەن قولىنا تيەتىنىنە سەن­بەيدى. ايتپەسە, قالادا دا كۇن سايىن گازەت قاراماسا ىشكەن اسى بويىنا سىڭبەيتىن كوزى قاراقتى وقىرمان كوپ. قيت ەتسەك: «باياعىدا ونداي ەدى, مۇنداي ەدى...», دەپ وتكەن­دى اڭساپ شىعا كەلەمىز. ارينە, ايتۋعا تۇرارلىق دۇنيە بولعاننان كەيىن ايتىلادى دا. بۇرىن وسى پوشتا جاشىكتەرىن ورناتۋدى سول ءۇيدىڭ قۇرىلىسىن جۇرگىزەتىن مەردىگەر موينىنا الادى ەكەن. قازىر دە ەلىمىزدە قاپتاعان قۇرىلىس. مەردىگەرلەر ءزاۋلىم ۇيلەر ادام بالاسىنا ىڭعايلى, جايلى بولۋ ءۇشىن بارلىعىن جاساۋدا. بىراق, پوشتانىڭ وسى تەمىر قورابىنا ەشكىمنىڭ كوڭىلى تۇسپەي تۇر. بالكىم ولار­­دى دا كىنالاۋعا بولماس. ويتكەنى, تەمىر جاشىكتەر «تەن­دەردىڭ» تەمىردەي تالابىنان الدەقاشان شىعىپ قالعان. جوعارىدان: «مىندەتتى تۇردە بولسىن», دەگەن پارمەن بول­ما­عاننان كەيىن قاي قۇرىلىس باسشىسى ءوزى ءبىلىپ قولعا السىن؟! مەنىڭشە, پوشتانىڭ تەمىر جاشىگى اناۋ ايتقانداي قىمبات تۇرماسا كەرەك. تاراز قالاسىنىڭ اكىمى نۇرجان كالەندەروۆتىڭ ەسەپتىك بايان­داماسىندا 573,5 ملن. تەڭگەگە 65 پاتەرلىك ەكى ءۇيدىڭ قۇرىلىسى سالىنىپ جاتقانى ايتىلىپتى. ال ەندى وسى ۇيلەرگە 6-7 جاشىك ورناتىلۋ كەرەك. ولاردىڭ باعاسى جارتى ميلليون تەڭگە بولا ما, جوق پا, ءاي, قايدام... بىلايشا ايتقاندا, ميىعىنان كۇلگەن ميلليونداردىڭ تابانىنىڭ استىندا جاتاتىن سوما. بالكىم بۇل شارۋانى مەردىگەرلەر دەمەۋ­شى رەتىندە وزدەرى-اق ات­قارىپ تاستار. ايتەۋىر, وسى ىسكە باسشىلاردىڭ تالابى, ىقىلاسى كەرەك. كوپ­قاباتتى ۇيلەردىڭ كىرەبەرىسى گازەت-جۋرنال سالاتىن جاشىك­تەر­دەن كوز تارتىپ تۇراتىن كۇن بولار ما ەكەن؟! ورالحان ءداۋىت, «ەگەمەن قازاقستان». جامبىل وبلىسى.