سۋرەت: ombudsmanbiz.kz
ارنايى جىلجىمالى زەرتحانا دەرەكتەردى جينايتىن جوعارى دالدىكتەگى كامەرالارمەن, سونداي-اق سەنسورلارمەن جابدىقتالعان.
«جول جەلىلەرىن باسقارۋ جۇيەسى جولدار مەن ينفراقۇرىلىم تۋرالى دەرەكتەردى ساقتاپ قانا قويماي, جولداردىڭ جاي-كۇيى مەن قاۋىپسىزدىگىن دياگنوستيكالاۋعا, باعالاۋعا مۇمكىندىك بەرەدى. مىسالى, جۇيەدە استاناداعى كوشەلەر بويىنداعى اعاشتاردىڭ سانىن بىلۋگە نەمەسە شەكارالاردىڭ ۇزىندىعىن ەسەپتەۋگە بولادى», دەيدى «قازجولعزي»-ءدىڭ رەسمي وكىلى ادينا ايناەۆا.
ماماندار جول جەلىسىندەگى وزگەرىستەردى ەسەپكە الۋ ءۇشىن ۇنەمى تەكسەرىپ وتىرۋ قاجەت ەكەنىن ايتادى. مىسالى, استانادا قايتا پاسپورتتاۋ جەتى جىلدا جولداردىڭ ۇزىندىعى 869 كم-دەن 1 145 كم-گە دەيىن ۇلعايعانىن انىقتادى.
تسيفرلىق پاسپورتتاۋ ەنگىزىلگەن العاشقى قالالاردىڭ ءبىرى اقتوبە بولدى. مۇندا جولداردى تسيفرلاندىرۋ جەرگىلىكتى بيلىككە, جولدارعا قىزمەت كورسەتۋگە قاراجات جەتىسپەۋشىلىگى ماسەلەسىن شەشۋگە كومەكتەستى. ادينا ايناەۆا دەرەكتەردىڭ قاراپايىم تاپشىلىعى قىس مەزگىلىندە جولداردىڭ ءتيىستى كۇتىمىن قامتاماسىز ەتۋگە مۇمكىندىك بەرمەگەنىن اتاپ ءوتتى.
«دەرەكتەردى تۇزەتىپ, جولداردىڭ ناقتى ۇزىندىعى مەن تۇرىنە سايكەس بيۋدجەتتى قايتا بولگەننەن كەيىن اقتوبە ماگيسترالدىق كوشەلەرگە دە, تۇرعىن الاپتارداعى جولدارعا دا قىزمەت كورسەتۋ ءۇشىن قاراجاتتى دالىرەك بولە الدى. بۇل قاراجات تاپشىلىعىن بولدىرماۋعا جانە وتكەن ماۋسىمدا جولدارعا ساپالى قىزمەت كورسەتۋگە مۇمكىندىك بەردى. تۇزەتۋدىڭ ناتيجەسىندە تەحنيكانى جاڭارتىپ, جابدىقتار مەن ماتەريالداردى جەتكىلىكتى مولشەردە ساتىپ الۋعا مۇمكىندىك تۋدى», دەدى رەسمي وكىل.
تسيفرلىق پاسپورتتاۋدى ەنگىزۋ – ەلىمىزدىڭ جول ينفراقۇرىلىمىن تسيفرلاندىرۋ مەن رەفورمالاۋداعى ماڭىزدى قادام. جول دەرەكتەرىن ءدال ەسەپكە الۋ جانە ۇنەمى جاڭارتىپ وتىرۋ بيۋدجەت قاراجاتىن ءتيىمدى پايدالانۋعا, وزگەرىستەرگە ۋاقتىلى جاۋاپ بەرۋگە جانە جولدارعا قىزمەت كورسەتۋ ساپاسىن ارتتىرۋعا جاعداي جاسايدى.
