سۋرەت: multiurok.ru
دەمالىس كۇنى ۇزىندى-قىسقالى بولىپ تىركەسىپ, ورتالىق بازارعا باردىق. ۇلتتىق كيىم ءۇيىلىپ جاتىر, نە جوق دەيسىز. جەلەتكە, بەلدەمشە, ءوڭىرى مەن جاعا جيەگى جانە ومىراۋ تۇسى كوز جاۋىن الاتىن ءتۇرلى جىپپەن كەستەلەگەن كاجەكەي, بارقىتتان تىگىلگەندىكتەن جۇپ-جۇمساق ەكەن. استارى بولسا دا ءجۇن مەن ماقتا سالىنباي, ىقشامداپ تىگىلىپتى. جەڭسىز كەۋدەشە. وزگە دە ءوڭى جاقسى كيىم جەتىپ ارتىلادى. ساتىپ تۇرعاننىڭ ءبارى ايىر قالپاق اعايىننىڭ قىز-كەلىنشەكتەرى.
– وزدەرى پىسىق-اق, – دەيدى ءبىر اقساقال, – بۇرىن كىسى قايتقاندا جىرتىس ەسەبىندە جۇمسايتىن تەڭ-تەڭ ماتا ساتۋشى ەدى. قازاق ودان تىيىلعاننان كەيىن قىز جاساۋىنا كوشتى. ەندى, مىنە, ۇلتتىق كيىمدەرىمىزدى وسىلاردان ساتىپ الاتىن بولدىق. مەن توسەكتە باسى, توسكەيدە مالى قوسىلعان اعايىندى جەك كورمەيمىن, قايتا وسى پىسىقتىعىن جاقسى كورەمىن. وسى بازاردا بىلەتىندەردىڭ ايتۋىنا قاراعاندا, ەكى جۇزدەن استام قىرعىزدىڭ قىز-كەلىنشەگى ساۋدا جاساپ ءجۇر. تىكسىن, ساتسىن. بىراق ءوزىمىزدىڭ قولونەر شەبەرلەرى قايدا قاراپ وتىر؟
وسى اڭگىمە ءارى قاراي ساباقتالىپ جۇرە بەرگەنى.
– الدەبىر مەرەكەلەردە قولونەر شەبەرلەرىنىڭ كورمەسى وتەدى, – دەيدى ءبىر اجەي, – بىلاي قاراساڭ بار سياقتى عوي. نەگە سولار وزدەرى تىگىپ, نەگە ۇسىنبايدى ەكەن؟ ءبىزدىڭ ۇلتتىق كيىمىمىزدىڭ ويۋ-ورنەگى, پوشىمى وزگەدەن گورى وزىمىزگە جاقىن ەمەس پە؟
نەمەرەمە كەۋدەشە اپەرەمىن دەپ ءجۇرىپ, تالاي نارسە ەستىدىم. شىنىندا دا, الاتاۋدىڭ ارعى بەتىنەن كەلگەن قىرعىز اعايىن بولماسا, يىنىمىزگە ىلەر ءجىبى ءتۇزۋ ۇلتتىق كيىم تابا الماي جۇتاپ جۇرەدى ەكەنبىز عوي.
