«قازاقستان» رەسپۋبليكالىق تەلەراديوكورپوراتسياسى جارىققا شىعارعان «اسىل مۇرا» جيناعى – قازاقستاننىڭ مۋزىكا ونەرى تاريحىندا حالىقارالىق ستريمينگتەردە كەڭىنەن تارالعان ەڭ ءىرى جيناق. جوبا «Ozen» مۋزىكالىق لەيبلىمەن بىرگە جۇزەگە اسىرىلدى.
جيناققا «التىن قوردا» ساقتالعان 400 كۇي, 300 جىر-تەرمە, 400 حالىق ءانى مەن حالىق كومپوزيتورلارىنىڭ اندەرى, 100 ەرتەگى, 50 بەسىك جىرى, 250 رەترو حيت ءان ەنگىزىلدى. اۋديوجيناقتىڭ ەرەكشەلىگى – مۇنداعى شىعارمانىڭ كوبى اۋتەنتيكالىق فورمادا, ياعني, العاشقى ورىنداۋشىلارى جەتكىزگەن تۇپنۇسقا كۇيىندە بەرىلگەن.
جوباعا ەنگەن تاڭدامالى 1500 اۋديوجازبا Apple Music, Spotify, Yandex Music, YouTube Musicسياقتى الەمگە تانىمال 100-دەن استام مۋزىكالىق پلاتفورماعا جۇكتەلدى. سونداي-اق, تۋىندىلار «قازاقستان» تەلەراديوكورپوراتسياسىنىڭ altynqor.com سايتىنا ەنگىزىلدى.
سالتاناتتى جيىندا ءسوز سويلەگەن مەملەكەتتىك كەڭەسشى «اسىل مۇرا» اۋديوجيناعىنىڭ جارىققا شىعۋى جانە ۇلتتىق ساز ونەرى مۇراسىنىڭ الەمدىك پلاتفورمالاردا قولجەتىمدى بولۋى ءتول مادەنيەتىمىزدىڭ دامۋىنا تىڭ سەرپىن بەرەتىنىن اتاپ ءوتتى.
ەرلان قارين «مەملەكەتتىك تەلەراديوكورپوراتسيانىڭ قورىندا عانا ساقتالعان 1500 تۇپنۇسقا تۋىندى الەمدىك مۋزىكالىق پلاتفورمالاردا جاريالانىپ وتىر. بۇل جوبا مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ IV وتىرىسىندا كوتەرگەن ۇلتتىق تسيفرلىق مۇراعات قۇرۋ جونىندەگى باستامانى جۇزەگە اسىرۋعا سەپتىگىن تيگىزەدى. مۇنداي جوبالار ۇلتتىق مادەني كونتەنتتى جۇيەلەۋگە جول اشىپ قانا قويماي, ونەرپازداردىڭ جاڭا بۋىنىنا, وسكەلەڭ ۇرپاققا سەنىمدى ءارى باي دەرەك كوزى بولادى. سونداي-اق جاساندى ينتەللەكتىنىڭ جادىن ەداۋىر تولىقتىرادى», دەدى.
جيناق ەلىمىزدەگى ۇلتتىق كىتاپحانالارعا, ونەر ۋنيۆەرسيتەتتەرىنىڭ كىتاپحانالارىنا بەرىلەدى, سونداي-اق ەركىن ساۋداعا شىعارىلادى.
