05 مامىر, 2015

قازاقستاندىق 4 بوكسشى – تۋرنير جەڭىمپازى

346 رەت
كورسەتىلدى
2 مين
وقۋ ءۇشىن
28-04-15-box_kaz-1 سەربيانىڭ استاناسى – بەلگراد قالاسىندا 53-ءشى مارتە مارەگە جەتكەن «بوەگرادسكي پوبەدنيك» حالىقارالىق تۋرنيرىندە قازاقستان بوكسشىلارى كوماندالىق ەسەپتە ءبىرىنشى ورىندى جەڭىپ الدى. ولار بۇعان جارىستا 4 التىن, 1 قولا مەدال يەلەنۋ ارقىلى قول جەتكىزدى. جەرلەستەرىمىزگە ءبىرىنشى التىن مەدالدى 52 كگ سالماقتاعى استانالىق ازات ماحمەتوۆ اپەردى. ول شيرەك فينالدا فرانتسيالىق ەليە كونكيدى, جارتىلاي فينالدا گەرمانيالىق رونني بەبليكتى 3:0 دەگەن بىردەي ەسەپپەن ۇتىپ, فينالدا مولدوۆان الەكساندر ريسكاندى 2:1 ەتىپ تىزە بۇكتىردى. بۇلاردىڭ سوڭعى ەكەۋىنىڭ تالاي سايىستا جۇلدە الىپ جۇرگەن تارلاندار ەكەنىن جانكۇيەر قاۋىم بىلەتىن شىعار دەگەن ويدامىز. كەلەسى التىن مەدالعا الما­تىلىق جانبولات تىلەگەن ۇلى (56 كگ) يە بولدى. ءتۋرنيردى جارتىلاي فينالدان باستاعان ول شوتلاند ستەفان بويلەنى – 3:0, مولدوۆان ۆياچەسلاۆ گوياندى 2:1 ەسەپتەرىمەن جەڭدى. ال قىزىلوردالىق رۋستام سۆاەۆ (75 كگ) ءتۋرنيردىڭ جەڭىمپازى بولۋمەن قاتار, ونىڭ ەڭ ۇزدىك ­بوكس­شىسى دا اتاندى. ءبىر قىزى­عى, اتالمىش اتاق ونىمەن فينالدا شايقاسقان سەرب الەكساندەر درەنوۆاكقا دا بەرىلدى. ءبىزدىڭ جىگىت بۇل ۇرىستى 2:1 ەسەبىمەن ءوز پايداسىنا شەشە ءبىلدى. رۋستام مۇنىڭ الدىندا شوتلاند بوريس كريگتون – 2:1, نورۆەگيالىق سۋرحو شاميلوۆتان 3:0 ەسەپتەرىمەن ­باسىم تۇسكەن ەدى. كوماندا قورجىنىنداعى ءتور­تىن­­شى التىن مەدالدى شىم­كەنت­تىك نۇرجان بەكزاتوۆ اكەلدى. اسا اۋىر سالماقتاعى بوكسشى­مىز ءوزىنىڭ وسىنداعى ەكى ايقاسىن دا مەرزىمىنەن بۇرىن اياقتادى. اتاپ ايتقاندا, جارتىلاي فينال­دا مول­­دوۆالىق الەكسەي زلاتين­دى 2-راۋند­تا نوكاۋتقا جىبەرگەن ول في­نال­دا سەرب نەمانيا ءستوليچتى 1-راۋندتا-اق «ىسكە العىسىز» ەتىپ تاستادى. شىمكەنتتىك تاعى ءبىر بوكسشىمىز, 81 كيلوعا دەيىنگى سالماقتاعى نۇربول التاەۆ قولا مەدالمەن توقتادى. شيرەك فينالدا ءبىرىنشى ۇرىسىن چەح توماس بەزۆودامەن وتكىزىپ, جەڭىسكە جەتكەن (3:0) ول جارتىلاي فينالدا گرەك پولينەيكيس كالاماراستان ۇتىلدى – 1:2. ال 60 كگ سالماقتاعى سەمەيلىك ءىلياس جاقسىلىقوۆ العاشقى شايقاسىن كەيىن ءتۋرنيردىڭ جەڭىمپازى اتاناتىن گوللانديالىق ەنريكو لە كرۋزبەن وتكىزىپ, 0:3 ەسەبىمەن ەسە جىبەرىپ الدى. تۋرنيرگە بارلىعى 20 ەلدەن 116 بىلعارى قولعاپ شەبەرى قاتىستى. كوماندالىق ەسەپتە ەكىنشى ورىنعا مولدوۆا قۇراماسى شىقسا, ءۇشىنشى ساتىعا شوتلانديا بوكسشىلارى ورنالاستى. قازاقستان قۇراماسىن بۇل جارىسقا جاتتىقتىرۋشى مارات ەلەۋسىنوۆ باستاپ باردى. دامير قوجامقۇل.
سوڭعى جاڭالىقتار