ۇلتتىق قۇرىلتاي وتىرىسى اياسىندا مەملەكەت باسشىسى اعىمداعى كەزەڭدە مەملەكەتتىڭ ءبىرىنشى كەزەكتەگى مىندەتى – وڭىرلەردىڭ ەكونوميكالىق ءوسۋىنىڭ جاڭا باعىتتارىن اشۋ جانە وڭىرلىك دامۋداعى تەڭگەرىمسىزدىكتەردى جويۋ ەكەنىن اتاپ ءوتتى. ەلىمىزدىڭ شەكارالاس اۋداندارىندا كولىك-لوگيستيكالىق مارشرۋتتاردى دامىتۋ بويىنشا جۇمىستار جالعاسادى. مەملەكەت باسشىسى اتاپ وتكەندەي, بيىل 9 اۆتوموبيل كەدەندىك بەكەتىنىڭ جاڭعىرتۋى اياقتالادى. بۇل ولاردىڭ وتكىزۋ قابىلەتىن 6 ەسەگە ارتتىرۋعا مۇمكىندىك بەرەدى. وسى ورايدا مەملەكەت باسشىسى تورعاي ءوڭىرىنىڭ دامۋىنا قاتىستى ماڭىزدى ماسەلەلەردى كوتەردى.
تورعاي ءوڭىرى – قازاق حالقى ءۇشىن تاريحي ءارى رۋحاني ماڭىزى زور قاسيەتتى مەكەن. بۇل ايماق ۇلتىمىزدىڭ ۇلى پەرزەنتتەرى احمەت بايتۇرسىن ۇلى مەن مىرجاقىپ دۋلات ۇلىنىڭ تۋعان جەرى عانا ەمەس, ەل رۋحانياتى مەن مادەنيەتىنىڭ التىن بەسىگى سانالادى. الايدا كەيىنگى جىلدارى وڭىرگە جەتكىلىكتى دەڭگەيدە كوڭىل بولىنبەي, جول قاتىناسى قيىنداپ, تۇرعىنداردىڭ ءومىر ءسۇرۋ ساپاسىنا اسەر ەتتى. كولىك ينفراقۇرىلىمىنىڭ السىزدىگى تورعايدى كورشىلەس وڭىرلەردەن وقشاۋلاپ, حالىقتىڭ قاتىناۋىن قيىنداتىپ وتىر.
«وسى تۇستا تاعى ءبىر ماڭىزدى ينفراقۇرىلىمدىق جوبا قولعا الىناتىنى تۋرالى جاريالاعىم كەلەدى. مەن ۇكىمەتكە استانادان ارقالىق, تورعاي جانە ىرعىز ارقىلى ترانسكاسپي حالىقارالىق كولىك دالىزىنە تۋرا شىعاتىن اۆتوكولىك جولىنىڭ قۇرىلىسىن باستاۋدى تاپسىردىم. جاڭا كۇرە جول ورتالىق جانە باتىس ايماقتاردىڭ اراسىن 560 شاقىرىمعا قىسقارتادى. بۇل – تۇتاس تورعاي ءوڭىرىنىڭ دامۋىنا تىڭ سەرپىن بەرەتىن اۋقىمدى جوبا», دەدى قاسىم-جومارت توقاەۆ.
بۇل جاڭالىق بۇكىل تورعاي حالقى ءۇشىن ۇلكەن قۋانىش بولدى. وسى كۇرە جولدىڭ سالىنۋى تەك تورعاي ءوڭىرى ءۇشىن ەمەس, جالپى ورتالىق جانە باتىس ايماقتار ءۇشىن دە ستراتەگيالىق ماڭىزى بار شەشىم بولماق. جاڭا جول ءوڭىردىڭ ەكونوميكاسىن دامىتۋعا, حالىقتىڭ تۇرمىس ساپاسىن جاقسارتۋعا, اۋىل شارۋاشىلىعى مەن كاسىپكەرلىكتىڭ وركەندەۋىنە زور سەرپىن بەرەدى.
ءماجىلىس دەپۋتاتى رەتىندە جەرگىلىكتى تورعاي حالقىمەن كەزدەسكەندە ورتالىق قازاقستان-باتىس اۆتوجولىنىڭ قاجەتتىلىگى تۋرالى ماسەلەنى ءجيى كوتەرىپ كەلەمىن. دەپۋتاتتىق قىزمەتىمدەگى العاشقى ساۋالدارىمنىڭ ءبىرى وسى اۆتوجول قۇرىلىسىنا ارنالدى. بۇل جول سالىنسا, كولىكپەن قاتىناۋ جەڭىلدەپ, جۇك تاسىمالى ارتادى. سونىمەن قاتار جەرگىلىكتى تۇرعىندار جۇمىسپەن قامتىلىپ, ءوڭىردىڭ ەكونوميكالىق الەۋەتى كۇشەيەدى. ءتۋريزمنىڭ دامۋى دا ايماقتىڭ جاندانۋىنا سەپتىگىن تيگىزەدى.
قوستاناي وبلىسىنىڭ جانگەلدين اۋدانىنا قاراستى اقشىعاناق اۋىلى مەن اقتوبە وبلىسىنىڭ نۇرا, مامىر ەلدى مەكەندەرى ءبىر-بىرىنە جاقىن ورنالاسقان. الايدا جولدىڭ جوقتىعىنان قىستا قار باسىپ, كوكتەم-كۇزدە لايساڭ جول قاتىناستى قيىنداتىپ جىبەرەدى. سوندىقتان جاڭا جول سالىنۋى وسى اۋىلداردىڭ قارىم-قاتىناسىن نىعايتىپ, تۇرعىنداردىڭ تۇرمىسىن جەڭىلدەتەدى. جول قاتىناسىنىڭ قيىن جاعدايى تورعاي وڭىرىندەگى شارۋالارعا دا اۋىر ءتيىپ وتىر. نەسيە راسىمدەۋ ءۇشىن قوستانايعا بارىپ, قۇجاتتارىندا ازداعان قاتە كەتسە, ولاردى قايتا تۇزەتۋ ءۇشىن بىرنەشە ءجۇز شاقىرىم جول جۇرۋگە ءماجبۇر. قىستىڭ قاقاعان ايازى مەن اق تۇتەك بورانى بۇل جاعدايدى ودان ءارى قيىنداتادى. سوندىقتان جاڭا كۇرە جول اقمولا, ۇلىتاۋ, قوستاناي, اقتوبە, ماڭعىستاۋ, اتىراۋ وبلىستارىنىڭ وركەندەۋىنە تىڭ مۇمكىندىك بەرمەك. ورتالىق بويىنشا وتەتىن توتە تاسجول بارلىق جاعىنان ءتيىمدى بولىپ, 6 وبلىستىڭ ەكونوميكاسىنا جاقسى اسەر ەتەتىنى ءسوزسىز. بۇل جوبا ايماقتىڭ دامۋىنا جاڭا سەرپىن بەرەدى, ورتالىق وبلىستاردىڭ ىشكى كولىك بايلانىستارىن جاقسارتۋعا, جاڭا اۋىلشارۋاشىلىق جەرلەرىن يگەرۋگە ىقپال ەتەدى.
مەملەكەت باسشىسى ارقالىق اۋەجايىن قالپىنا كەلتىرىپ, جاڭا اۋەجاي سالۋ ماسەلەسىن دە قوزعادى. بۇل باستاما تورعاي ءوڭىرىنىڭ كولىك قاتىناسىن جاقسارتىپ قانا قويماي, اۋىل جانە مال شارۋاشىلىعىن دامىتۋعا دا وڭ اسەرىن تيگىزەدى. ءوڭىر كەڭ جايىلىمدارىمەن جانە تابيعي بايلىقتارىمەن ەرەكشەلەنەدى. زاماناۋي كولىك ينفراقۇرىلىمىنىڭ دامۋى ارقىلى جەرگىلىكتى ونىمدەر ەلدىڭ تۇكپىر-تۇكپىرىنە ەش قيىندىقسىز جەتكىزىلمەك. قازىرگى تاڭدا ارقالىققا تەك استانا مەن قوستانايدان پويىز قاتىنايدى. اۋە قاتىناسىنىڭ اشىلۋى تۇرعىنداردىڭ ەل استاناسى مەن وبلىس ورتالىعىنا تەز جەتۋىنە مۇمكىندىك بەرەدى. بۇل اسىرەسە اۋرۋحاناعا بارۋ, الەۋمەتتىك ماسەلەلەردى شەشۋ سياقتى قاجەتتىلىكتەر ءۇشىن اسا ماڭىزدى. سونىمەن قاتار امانگەلدى جانە جانگەلدين اۋداندارىنىڭ شارۋالارى وبلىس ورتالىعىنا بارىپ جاسايتىن قۇجاتتارىن ۋاقىتىندا راسىمدەي الماي, كاسىپتەرىنە كەرى اسەر ەتىپ جۇرگەنى بەلگىلى. اۋە جولى وسى ماسەلەلەردىڭ شەشىلۋىنە ىقپال ەتەدى. پرەزيدەنتتىڭ ايتۋىنشا, بۇل جوبا ىشكى كولىك قاتىناستارىن ەداۋىر جاقسارتادى. سونداي-اق ورتالىق ايماقتاعى اۋىل شارۋاشىلىعى جەرلەرىن يگەرۋگە جانە مال شارۋاشىلىعىن دامىتۋعا تىڭ سەرپىن بەرەدى.
مونوقالالار, ونىڭ ىشىندە ارقالىق قالاسىنىڭ دامۋى تۋرالى دا بىرنەشە رەت ماسەلە كوتەرىلدى. حالىقتىڭ ءال-اۋقاتىن جاقسارتۋ – مەملەكەتتىڭ باستى مىندەتتەرىنىڭ ءبىرى. پرەزيدەنتتىڭ تورعاي وڭىرىنە ايرىقشا نازار اۋدارۋى – ادىلدىكتىڭ, قامقورلىقتىڭ جانە ەل يگىلىگى ءۇشىن اتقارىلىپ جاتقان جۇيەلى جۇمىستىڭ كورىنىسى. كونەنىڭ كوزى, ۇلتتىڭ ۇياسى بولعان تورعاي ولكەسى جاڭا تىنىس الىپ, كەلەشەككە نىق قادام باسىپ جاتىر. وسى يگى باستامالاردىڭ ءوز جەمىسىن بەرىپ, ءوڭىردىڭ دامۋىنا جاڭا لەپ اكەلەتىنى ءسوزسىز. حالىق تىلەگىنىڭ ورىندالار كۇنى الىس ەمەس, ويتكەنى پرەزيدەنتتىڭ ءوزى بۇل ماسەلەگە ايرىقشا كوڭىل ءبولىپ, ۇكىمەتكە ناقتى تاپسىرمالار جۇكتەدى.
بەرىك بەيسەنعاليەۆ,
ءماجىلىس دەپۋتاتى
