سۋرەت: qazaquni.kz
قازىر مادەنيەتتەن جۇرداي, قاراپ وتىرىپ قىسىلاتىن, وتباسىڭمەن كورۋگە مۇلدەم كەلمەيتىن فيلمدەر بارشىلىق. كينو ۇلتتى ۇيىتىپ, بولاشاق ۇرپاقتى تاربيەلەۋگە ءتيىس.
سوندىقتان مەملەكەت باسشىسىنىڭ قۇرىلتايدا بۇل ماسەلەنى كوتەرگەنى وتە ورىندى بولدى. ساپالى, ساۋاتتى, تالعامى بيىك كارتينالار سانى ارتقان كەزدە عانا وتاندىق كينونىڭ ەڭسەسى بيىك بولادى.
ۇلتتىق كينونى قولداۋ مەملەكەتتىك ورتالىعىنىڭ جانىنداعى ساراپتاما كەڭەسىنىڭ نەگىزى باعىتىنىڭ ءبىرى – ءار جوبانىڭ ستسەناريىنەن باستاپ, وندىرىسكە دەيىنگى كەزەڭدى سۇزگىدەن وتكىزۋ. كينو, ادەبيەت, ونەر مەن انيماتسيا سالاسىنىڭ كاسىبي ماماندارىنان قۇرالعان توپتىڭ قارا قىلدى قاق جاراتىن ادىلەتتى بولۋى دا باستى تالاپتارىمىزدىڭ ءبىرى. ول ءۇشىن ساراپتاما كەڭەسىنىڭ قۇرامى جاڭارتىلىپ, ءتىپتى داۋىس بەرۋ مەحانيزمىن دە وزگەرتتىك. كەڭەس مۇشەسىنىڭ بايقاۋعا قاتىسىپ وتىرعان كينوكومپانيا وكىلدەرىنە جاقىندىعى بار ما, جوق پا, جالپى وندىرىسكە قاتىسى بار ما, وسىنىڭ بارلىعى ەسكەرىلەدى. بۇرىن-سوڭدى مۇنداي جاڭاشىلدىق بولماعان. سونىمەن قاتار وتكەن جىلدان باستاپ جاڭا ەرەجە قولدانىسقا ەنىپ, بۇل بايقاۋدى اشىق وتكىزۋگە قوسىمشا سەرپىن بەردى.
ەڭ باستىسى, سان ەمەس – ساپا. سول ءۇشىن كينو ورتالىقتىڭ ساراپتاما كەڭەسى ءتىلدىڭ تازالىعىنا دا ەرەكشە ءمان بەرەدى. ەكراندا بىلاپىت سوزدەر مەن كوزگە قوراش كورىنىپ, كوڭىلگە قاياۋ تۇسىرەتىن دۇنيەلەردىڭ بولماۋىن دا قاتاڭ قاداعالايدى.
ءبىز مەملەكەتتىك قارجىلاندىرۋعا ۇمىتكەر فيلمدەردى قولداۋدى جالعاستىرا بەرەمىز. كاسىبي مامانداردىڭ عانا ەمەس, جاڭا ەسىمدەردىڭ پايدا بولىپ, قازاق كينوسىنىڭ كوكجيەگى كەڭىپ, قاناتى قاتايا تۇسسە دەگەن مۇددەنى دە ەشقاشان ەستەن شىعارمايمىز.
كينو – ونەر ءارى يدەولوگيا. ال يدەولوگيانىڭ باستى كۇشى – ساناعا توڭكەرىس جاساۋ, يگى ىستەردى ناسيحاتتاۋ. ادامدىق, ار ىسىنە ادالدىقتى ءوز بيىگىنە كوتەرۋ. بۇل رەتتە كينو ورتالىعى قۇرىلتايدا ايتىلعان دۇنيەلەردى نازارعا الا وتىرىپ, وسى ماقساتتا ەڭبەكتەنۋدى جالعاستىرادى.
قۇرمانبەك جۇماعالي,
ۇلتتىق كينونى قولداۋ ورتالىعىنىڭ باسقارما توراعاسى
