الدىن الا جۇرگىزىلگەن زەرتتەۋ ناتيجەسىندە وڭىردەگى مادەنيەت وشاقتارىندا دەكوراتسيا قويۋشى, بۋتافورا ازىرلەۋشى, دىبىس, جارىق قوياتىن ماماندارعا سۇرانىس بار ەكەنى انىقتالدى. ال قالادا بۇل ماماندىقتار بىردە-ءبىر وقۋ ورنىندا دايارلانبايدى. سوندىقتان ءا.قاستەەۆ اتىنداعى شىمكەنت قالالىق ونەر جانە ديزاين كوللەدجى مەن ساز كوللەدجىنە وسى ماماندىقتارعا بىلىكتىلىك ساناتىن الىپ, باعدارلاما قۇرۋ بويىنشا تاپسىرما بەرىلدى. سونىمەن بىرگە اكىمدىك تاراپىنان تەحنيكالىق ماماندىقتارعا بولىنەتىن گرانت سانى كوبەيدى. قالا اكىمدىگى جۇرگىزگەن كەلىسسوز اياسىندا بىرنەشە كاسىپكەر 53 ستۋدەنتتى وزدەرىنىڭ ەسەبىنەن تەگىن وقىتىپ, جۇمىسقا ورنالاستىرماق.
سونداي-اق وڭىرلىك كاسىپكەرلەر پالاتاسى جىل سايىن ەڭبەك نارىعىنداعى جۇمىسشى ماماندىقتار سۇرانىسىن سارالاۋ ءۇشىن كاسىپورىندار اراسىندا ساۋالناما ۇيىمداستىرادى. ونىڭ قورىتىندىسى جەرگىلىكتى بيۋدجەتتى بەكىتۋ بارىسىندا ەسەپكە الىنادى. بىلتىرعى ساۋالناما اياسىندا 4 مىڭعا جۋىق بيزنەس وكىلى قامتىلىپ, مەگاپوليستە 16 مىڭنان استام جۇمىسشى ماماندىعىنا تاپشىلىق بارى انىقتالعان. نەگىزىنەن قۇرىلىس, وڭدەۋ ونەركاسىبى, دەنساۋلىق ساقتاۋ, حالىققا الەۋمەتتىك كورسەتۋ سالالارى جۇمىسشى ماماندىقتارىنا كوبىرەك مۇقتاج ەكەن.
شىمكەنت قالالىق كاسىپكەرلەر پالاتاسى وكىلدەرى دۋالدى وقىتۋ جۇيەسىن جەتىلدىرۋ كەرەكتىگىن ايتادى. بۇل ءۇشىن ارنايى ۇسىنىستار ازىرلەگەن. ونىڭ ەڭ باسىندا وقۋ ورىندارى مەن كاسىپورىنداردىڭ بايلانىسىن نىعايتۋ ماسەلەسى تۇر. اسىرەسە دۋالدى وقىتۋ باعدارلامالارىن قارجىلىق قولداۋ, كەرى بايلانىستى پايدالانا وتىرىپ, دۋالدى ءبىلىم بەرۋ ساپاسىن مونيتورينگىلەۋ جانە باعالاۋ جۇيەسىن ەنگىزۋ ماڭىزدى. بۇل قادامدار مامانداردى دايارلاۋ ساپاسىن ارتتىرماق.
كاسىپورىندا ايلىق جوعارى بولسا وقۋ بىتىرگەن تۇلەك مىندەتتى تۇردە سوندا قالۋعا تىرىسادى. سوندىقتان كاسىپكەرلەر پالاتاسى وكىلدەرى مەملەكەت جۇمىس ورىندارىن سۋبسيديالاسا دەگەن ۇسىنىس ايتتى.
دۋالدى وقىتۋعا بايلانىستى بيزنەس وكىلدەرىنىڭ دە ايتار ءوز ءۋاجى بار. ماسەلەن, ددەك كومپانياسىنىڭ باسشىسى مۇرات جۇماتاەۆ جاستار توكار ماماندىعىن يگەرۋگە قۇلشىنىس تانىتپايدى, جول الىس بولعاندىقتان ستۋدەنتتەر زاۋىتقا كەلىپ-كەتۋدەن قينالادى, ولاردىڭ وندىرىستىك وقۋ پراكتيكاسىن وقۋ ورىندارىنىڭ باسشىلىعى دۇرىس قاداعالاسا دەيدى. ال «Janna Eltanova» جشس ديرەكتورى جاننا ەلتانوۆا «جاستار پراكتيكاسى», «العاشقى جۇمىس ورنى» جوبالارىنا قاتىساتىن جۇمىسسىز جاستاردى جەڭىل ونەركاسىپ, ونىڭ ىشىندە توقىما ونەركاسىبىندەگى فابريكالارعا شاقىردى.
جەرگىلىكتى اتقارۋشى بيلىك ستۋدەنتتەردىڭ قاتىناۋ ماسەلەسىن شەشۋ ءۇشىن جولاۋشى تاسىمالداۋشى كومپانيالارمەن كەلىسسوز جۇرگىزۋگە ءازىر. قالا اكىمدىگى شاكىرتتەردى ساپالى مامان ەتىپ دايارلاپ شىعارۋ ءۇشىن كاسىپورىندارعا ءوز قارجىسى ەسەبىنەن تاجىريبەلىك وقۋ كۋرسىنان وتكىزۋگە ۇسىنىس جاسادى.
قىسقاسى, پرەزيدەنت تاپسىرماسىنا ساي «جۇمىسشى ماماندىقتار جىلى» اياسىندا قالا اكىمدىگى, وڭىرلىك كاسىپكەرلەر پالاتاسى جانە بيزنەس وكىلدەرى بىرلەسىپ, تياناقتى جۇمىس اتقارۋعا ۋاعدالاسىپ وتىر.
