وسىعان وراي ۋنيۆەرسيتەت وقىتۋشىلارىن, ستۋدەنتتەرىن, جالپى ءوڭىر تۇرعىندارىن قۇتتىقتاعان وبلىس اكىمى قۇمار اقساقالوۆ:
«بۇل – تەك ارقالىق ءۇشىن عانا ەمەس, بۇكىل قوستاناي وبلىسى ءۇشىن ماڭىزدى وقيعا. ۋنيۆەرسيتەت مارتەبەسىنىڭ بەرىلۋى وقۋ ورنىنىڭ جاڭا كوكجيەكتەردى باعىندىرۋىنا جول اشادى. ستۋدەنتتەر سانى ارتىپ, ءبىلىم بەرۋ باعدارلامالارى كەڭەيتىلەدى. ەندى بولاشاق ماماندار تەك پەداگوگيكالىق باعىتتاردا عانا ەمەس, سونىمەن قاتار ءىت, جۋرناليستيكا, ەكونوميكا, اۋىل شارۋاشىلىعى جانە باسقا دا ماڭىزدى سالالار بويىنشا ءبىلىم الا الادى», دەدى.
شالعاي شاھارداعى ءبىلىم ورداسىنىڭ ستۋدەنتتەرى ەندى ماگيستراتۋرا بولىمىندە ءبىلىم الاتىن بولادى. كەلەشەكتە دوكتورانتۋرا اشىلماق.
وبلىس اكىمىنىڭ سوزىنشە, بۇل وزگەرىستەر ءوڭىردىڭ عىلىمي الەۋەتىن نىعايتىپ, سۇرانىسقا يە مامانداردى دايارلاۋعا مۇمكىندىك بەرەدى. ۋنيۆەرسيتەتتە عىلىمي-زەرتتەۋ جوبالارى دامىپ, يننوۆاتسيالىق تەحنولوگيالار ازىرلەنىپ, وقىتۋدىڭ وزىق ادىستەرى ەنگىزىلەتىن بولادى. جاڭا مارتەبە حالىقارالىق ىنتىماقتاستىققا دا جول اشادى. ۋنيۆەرسيتەت شەتەلدىك جوعارى وقۋ ورىندارىمەن بەلسەندى تۇردە بايلانىس ورناتىپ, تاجىريبە الماسىپ, وزىق ءبىلىم بەرۋ باعدارلامالارىن ەنگىزۋگە جانە ستۋدەنتتەرگە اكادەميالىق ۇتقىرلىق مۇمكىندىكتەرىن ۇسىنۋعا جاعداي جاسايدى.
