سەنات توراعاسى الدىمەن ۇلتتىق قۇرىلتايدىڭ IV وتىرىسىندا مەملەكەت باسشىسى ايقىنداپ بەرگەن مىندەتتەرگە توقتالىپ, ادىلەتتى جانە قۋاتتى قازاقستان قۇرۋ يدەياسىن ىسكە اسىرۋعا قاجەتتى زاڭنامالىق جۇمىستىڭ باعىت-باعدارىنا نازار اۋداردى.
«ۇلتتىق قۇرىلتايدىڭ ءتورتىنشى وتىرىسىندا پرەزيدەنت قاسىم-جومارت توقاەۆ ەلىمىزدى ودان ءارى دامىتۋ جولىنداعى بىرقاتار مىندەتتى ايقىنداپ بەردى. جيىن بارىسىندا قوعامدى الاڭداتىپ وتىرعان وزەكتى ماسەلەلەر اشىق تالقىلانىپ, سىندارلى پىكىرلەر ايتىلدى. پارلامەنت قابىلداۋعا ءتيىس زاڭنامالىق وزگەرىستەردىڭ باعىتتارى ايقىندالدى. جالپى, جىل سايىن قۇرىلتايدىڭ ءمانى ارتىپ, مازمۇنى كەڭەيىپ كەلەدى. بيىل كوتەرىلگەن اۋقىمدى ماسەلەلەر مەن بەلگىلەنگەن ماڭىزدى مىندەتتەر سوعان دالەل. پارلامەنتتىڭ الدىندا تۇرعان ەندىگى مىندەت – مەملەكەت باسشىسىنىڭ ادىلەتتى, قاۋىپسىز, تازا جانە قۋاتتى قازاقستان قۇرۋ يدەياسىن ورىنداۋ ءۇشىن قولعا الىنعان كەشەندى باستامالارىن جۇزەگە اسىرۋعا قاجەتتى زاڭنامالىق بازا قالىپتاستىرۋ. سوندىقتان وسى باعىتتاعى جۇمىسىمىزدى جۇيەلەپ, پالاتانىڭ ءىس-شارالار جوسپارىن وزەكتەندىرۋدىڭ ماڭىزى زور», دەدى م.اشىمباەۆ.
سونداي-اق وتىرىس بارىسىندا سەناتورلار كوميتەتتەردىڭ وڭىرلەردەگى وزەكتى ماسەلەلەردى شەشۋگە ارنالعان الداعى وتىرىستارىندا جانە دەپۋتاتتاردىڭ مۇددەلى تاراپتارمەن كوشپەلى كەزدەسۋلەرىندە قوزعالاتىن تاقىرىپتاردى تالقىلادى. ولاردىڭ قاتارىندا ەكسترەميزم مەن تەرروريزمگە قارسى ءىس-قيمىل جانە ەلدەگى ويىن بيزنەسى مەن لوتەرەيا قىزمەتى بويىنشا قابىلدانعان زاڭنامالىق وزگەرىستەردىڭ قولدانىستاعى تاجىريبەسىن تالقىلاۋ سياقتى ماسەلەلەر بار. ودان بولەك, سەنات دەپۋتاتتارى وسى اپتادا اۋىل شارۋاشىلىعى مينيسترلىگى مەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ باسشىلىعىمەن بىرلەسىپ, اگروونەركاسىپتىك كەشەندى تسيفرلاندىرۋ تەتىكتەرىنە قاتىستى باسىمدىقتاردى تالقىلايدى.
م.اشىمباەۆ اتاپ وتكەندەي, مەملەكەت باسشىسى تسيفرلاندىرۋ ىسىنە باسا ءمان بەرىپ وتىر. سەبەبى بۇل ەل ەكونوميكاسىنىڭ قارقىندى دامۋىنا تىكەلەي اسەر ەتەدى. اگروونەركاسىپتىك كەشەندى تسيفرلاندىرۋ اۋىل شارۋاشىلىعى ءوندىرىسىنىڭ ونىمدىلىگىن ۇلعايتىپ قانا قويماي, ونىڭ باسەكەگە قابىلەتتىلىگىن, ءوندىرىس كولەمىن جانە ەكسپورتتىق الەۋەتىن ارتتىرۋعا دا جاعداي جاسايتىنى ءسوز بولدى.
سونىمەن قاتار بيۋرو مۇشەلەرى «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ سىبايلاس جەمقورلىققا قارسى ءىس-قيمىلداعى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» زاڭدى الداعى وتىرىستىڭ كۇن تارتىبىندە قاراۋ ءۇشىن ءتيىستى قاۋلى قابىلدادى. كەلىسىمنىڭ ماقساتى – سىبايلاس جەمقورلىققا قارسى ءىس-قيمىل سالاسىنداعى ۇلتتىق كۇش-جىگەر مەن ىنتىماقتاستىقتىڭ تيىمدىلىگىن ارتتىرۋ. زاڭ نورمالارى بىرلەسكەن باعدارلامالار مەن سىبايلاس جەمقورلىققا قارسى ءىس-شارالاردى ازىرلەۋ جانە ىسكە اسىرۋمەن بىرگە سىبايلاس جەمقورلىققا قارسى ءىس-قيمىل جانە زاڭنامانى ۇيلەستىرۋ سالاسىنداعى ىنتىماقتاستىقتىڭ قۇقىقتىق بازاسىن جەتىلدىرۋدى كوزدەيدى. اتاپ ايتقاندا, بۇل اقپارات الماسۋدى قامتاماسىز ەتۋ جانە سىبايلاس جەمقورلىققا قارسى اعارتۋدى كۇشەيتۋ ءۇشىن تاراپتاردىڭ كۇش-جىگەرىن بىرىكتىرۋ سياقتى ماسەلەلەردى قامتيدى.
بۇعان قوسا بيۋرودا وسىعان دەيىن ءماجىلىس قابىلداعان زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.
