شىمكەنت قالاسىندا ورنالاسقان كاسىپورىن ءبىر جىل ىشىندە 180 مىڭ ورىندىق, 10 ملن ءتىس ششەتكاسىن, 6 ملن ءيىس سابىن, 3 ملن ۇستارا ءوندىرىپتى. 1 ملرد 200 ملن تەڭگە ينۆەستيتسيا قۇيىلعان كاسىپورىننىڭ جابدىقتارى تۇگەلدەي جاڭا ءارى زاماناۋي.
كاسىپورىن ىسكە قوسىلعان ساتتەن باستاپ بىرقاتار ماڭىزدى شارا جۇزەگە اسىرىلدى. وندىرىستىك جابدىقتار تولىقتاي ورناتىلىپ, اينالىمعا تۇسكەنشە ەركىن جەتەرلىك شيكىزات ساتىپ الىندى. شيكىزاتتى تولىق دەرلىك قىتاي ەلىنەن اكەلەدى. جاڭا زاۋىت بولعان سوڭ, قىزمەتكەرلەردى ارنايى دايىندىقتان وتكەرىپ, قايتا وقىتۋ تياناقتالدى. ءار ءونىمنىڭ تارتىمدى بولۋىن قامتاماسىز ەتۋ ماقساتىندا تۇتىنۋشى تالابىنا ساي ۇنامدى ءارى قولايلى ءونىم ديزاينى ازىرلەندى.
«زاۋىتتىڭ ورنىن ساتىپ الىپ, قۇرىلىسىن تولىق بىتىرگەنشە ءوزىمنىڭ 800 ملن تەڭگەدەن اسا قاراجاتىم جۇمسالدى. ءتورت تسەحتىڭ جابدىقتارىن اكەلىپ ورناتۋعا 500 ملن تەڭگە قاراستىرىلدى. ونىڭ 170 ملن تەڭگەسىن ءوز جانىمىزدان قۇيىپ, قالعان 330 ملن تەڭگەنى «دامۋ قورى» وتەدى. قازىر كاسىپورىندا 20 ادام جۇمىس ىستەيدى. ورتاشا ەڭبەكاقى – 200 مىڭ تەڭگە», دەيدى كاسىپورىن ديرەكتورى دانيار ابدىكارىم.
تاۋاردىڭ باسى – «اريانا» سابىنى. ول – ۋاقىت سىناعىنان وتكەن, كوپتەگەن تۇتىنۋشىنىڭ سەنىمى مەن مويىنداۋىنا يە بولعان ءونىم. تاڭدالعان ينگرەديەنتتەر, زاماناۋي ءوندىرىس تەحنولوگيالارى جانە الما مەن قۇلپىنايدىڭ نازىك حوش ءيىسى جۇمساق ءارى ءتيىمدى تازارتادى.
«سابىن قۇرامىندا ناتري ستەاراتى, پروپيلەنگليكول, ناتري لاۋرەتسۋلفاتى, ناتري لاۋراتى, گليتسەرين, ناتري ءحلوريدى, ديناتري, حوش يىستەندىرگىش كومپوزيتسياسى, ناتري لاۋرەتسۋلفوسۋكتسيناتى, ديناتري ەدتا, تيتاني ديوكسيدى, اكريل سوپوليمەرى مەن مەنتول بار. سالماعى 100 گرامم سابىن كەسەگى ۇزاق ۋاقىت پايدالانۋعا جەتكىلىكتى. «اريانا الما» ءيىس سابىنى جۇمساق ءارى جەڭىل كوبىك ءتۇزىپ, جاعىمدى حوش يىسىمەن تازالىق پەن سەرگەكتىك سەزىمىن سىيلايدى», دەيدى تەحنيك ازامات ءابدىراسىلوۆ.
ال مۇنداعى ورىندىقتار پوليكاربوناتتان جاسالعان. ءمولدىر, ءتۇسسىز ورىندىقتاردى ءۇي جاعدايىندا دا, كوممەرتسيالىق ماقساتتا دا قولدانۋعا بولادى. نازىك ارلەنگەن ەدەندى قورعاۋ ماقساتىندا ورىندىق اياقتارى ارنايى ۇشتىقتارمەن جابدىقتالعان. سۋ وتكىزبەيدى جانە سىڭىرمەيدى, سونداي-اق سارعايىپ, ءتۇرى بۇزىلمايدى. وڭايلىقپەن سىنا قويمايدى», دەدى ەكىنشى تەحنيك مامىربەك تۇرسىن.
ونىڭ سوزىنشە, ورىندىق تولىق جينالعان كۇيدە جەتكىزىلەدى. جيناۋعا ىڭعايلى ءارى ۋلتراكۇلگىن ساۋلەدەن قورعالعان.
مامان «Dalida» ءتىس ششەتكاسىنىڭ دا ەرەكشەلىگىنە توقتالدى. مىسالى, ورتاشا قاتتىلىقتاعى قىلشىقتار ءتىس بەتىندەگى داقتاردى 84%-عا دەيىن جوياتىن كورىنەدى. ال نەيلون قىلشىقتارى بۇكىل پايدالانۋ مەرزىمىندە ءوز ءتۇسىن ساقتايدى.
كاسىپورىن باسشىلىعىنىڭ الداعى ۋاقىتقا جوسپارى اۋقىمدى. تەك وڭتۇستىك وڭىرمەن عانا شەكتەلىپ قالماي, ءونىمىن ەلىمىزدىڭ بارلىق ايماعىنا تاراتۋعا ق ۇلىقتى. كوپ ۇزاماي كورشى ەلدەردىڭ نارىعىنا شىعۋدى دا كوزدەپ ءجۇر. بۇعان ءونىم ساپاسى مەن زاۋىت الەۋەتى كەپىل.
