سۋرەتتى تۇسىرگەن – ەرلان ومار, «EQ»
ەلورداداعى پرەزيدەنتتىك ورتالىقتا «ناۋرىز.تانىم.تاريح» اتتى ينتەراكتيۆتى ەكسكۋرسيالار اپتالىعىنىڭ سالتاناتتى اشىلۋ ءراسىمى ءوتتى. ءىس-شاراعا مادەنيەت قايراتكەرلەرى, جوعارى وقۋ ورىندارىنىڭ وقىتۋشىلارى مەن ستۋدەنتتەرى, مەملەكەتتىك ورگانداردىڭ وكىلدەرى قاتىستى.
– ناۋرىز مەيرامىنىڭ باستاۋى بولىپ سانالاتىن كورىسۋ كۇنى قىستان امان-ەسەن شىققان ەل ءبىر-بىرىمەن كورىسىپ, امان-ساۋلىق سۇراسىپ, يگى تىلەكتەر ايتقان. بىرەگەي مەرەكەگە وراي مەملەكەت باسشىسىنىڭ تاپسىرماسىمەن ناۋرىزناما ونكۇندىگى قولعا الىندى. ناۋرىزنامانىڭ ءار كۇنىنىڭ ءوز اتاۋى مەن ماڭىزى بار. پرەزيدەنتتىك ورتالىقتىڭ ناۋرىزناما اياسىندا ۇيىمداستىرىپ وتىرعان اپتالىعى بارىسىندا كەلۋشىلەر تاقىرىپتىق ەكسكۋرسيالارعا قاتىسىپ, قازاقتىڭ داستۇرىمەن تانىسىپ, تاماشالاي الادى, – دەدى ورتالىق ديرەكتورى باقىتجان تەمىربولات.
كورىسۋ كۇنى – بىرلىكتىڭ, ىزگى تىلەكتەر مەن سىيلاستىقتىڭ بەلگىسى, سوندىقتان ءىس-شارا جىلى ءارى دوستىق اتموسفەرادا ءوتتى. ءىس-شارادا ەركەعالي راحماديەۆ اتىنداعى مەملەكەتتىك اكادەميالىق فيلارمونيا ونەرپازى ديانا ماي ء«اريايداي» ءانىن ورىنداسا, مادەنيەت قايراتكەرى نۇرجامال شىرىنباەۆا «قازاعىم» ءانىن شىرقاپ, كورەرمەنگە كوكتەمگى كوڭىل كۇي سىيلادى. سونىمەن بىرگە «جاستار» تەاترىنىڭ ارتىستەرى, تاتتىمبەت اتىنداعى №1 ونەر مەكتەبىنىڭ دارىندى وقۋشىلارى ساحنالىق كورىنىس قويىپ, امال مەرەكەسىنىڭ ماڭىزىن ۇقتىردى.
كونتسەرتتىك ءىس-شارادان سوڭ كەلۋشىلەر قازاقتىڭ ءداستۇرلى كيىمدەرى جانە مۋزىكالىق اسپاپتارىمەن تانىسىپ, ء«بىر جادىگەردىڭ تاريحى» جوباسىن تاماشالادى.
– كورمەمىزدەگى تايقازاننىڭ مانىنە توقتالسام, بىزدە ناۋرىز مەيرامى 1926 جىلدان 1988 جىلعا دەيىن تويلانباعان. وسى تايقازاننىڭ ەلىمىزگە ورالۋى ناۋرىزدىڭ قايتا تويلانۋىنا ىقپال ەتتى دەۋگە بولادى. تايقازان جەتى ءتۇرلى باعالى زاتتاردىڭ قوسىندىسىنان جاسالعان. مۇنىڭ ءبىر ەرەكشەلىگى, قوجا احمەت ءياساۋيدىڭ شاكىرتتەرى تايقازاننىڭ ىشىنە سۋ قۇيىپ, سۇرە وقىپ, سول سۋدىڭ ادامداردى ەمدەيتىن قاسيەتى بار دەپ سەنگەن. ءاربىر جىلى امال مەرەكەسى بارىسىندا ەلىمىزدىڭ ەڭ مىقتى باتىرلارى وسى تايقازاندى كوتەرىپ جارىسقان ەكەن,– دەدى ورتالىقتىڭ ەكسكۋرسيا جۇمىسى قىزمەتىنىڭ ساراپشىسى اسقار نەسىپباي.
سونداي-اق ءىس-شارادا كوپتەگەن مادەني جادىگەر كورسەتىلىپ, امال مەرەكەسىنىڭ قادىر-قاسيەتى ايقىندالا ءتۇستى.
