فوتو: اشىق دەرەككوز
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 188 مەديتسينا نىسانى سالىنادى. ريددەردە كوپبەيىندى اۋرۋحانانى, وسكەمەندە گەماتولوگيا ورتالىعىن, اقتاۋدا جەدەل جاردەم ستانساسىن, الماتىدا جۇقپالى اۋرۋلار ۇلتتىق عىلىمي ورتالىعىن, استانادا ۇلتتىق عىلىمي ونكولوگيا ورتالىعىنىڭ جاڭا عيماراتىن پايدالانۋعا بەرۋ قاجەت. 2026 جىلى 32 اۋداندىق ورتالىق اۋرۋحانانى جاڭعىرتۋ, سونداي-اق قىزىلوردا جانە ماڭعىستاۋ وبلىستارىنداعى اۋرۋحانالاردى سالىپ ءبىتىرۋ كەرەك. جۇمىستى اياقتاۋ مەرزىمىن بۇزۋعا بولمايدى», دەدى پرەزيدەنت.
سونىمەن قاتار پرەزيدەنت باسپانا ماسەلەسىنە دە توقتالىپ, وتكەن جىلى الەۋمەتتىك وسال توپتاعى ازاماتتار ءۇشىن 21 مىڭ پاتەر ساتىپ الىنعانىن اتاپ ءوتتى.
سونىمەن قاتار, سوڭعى ەكى جىلدا سەمەي, تاراز, كەنتاۋ جانە ورال قالالارىندا ەرەكشە قاجەتتىلىگى بار ادامدارعا ارنالعان وڭالتۋ ورتالىقتارى اشىلعان.
«2026 جىلدىڭ اياعىنا دەيىن اقتوبەدە, اتىراۋدا, كوكشەتاۋدا, شىمكەنتتە جانە تالدىقورعاندا ءدال وسىنداي ورتالىقتار اشۋ قاجەت», دەدى مەملەكەت باسشىسى.
بۇدان بولەك, ءاربىر وبلىس ورتالىعىندا اۋتيزمگە شالدىققان بالالارعا ارنالعان وڭالتۋ جانە دامىتۋ ورتالىقتارىن قۇرۋ ماڭىزدى ەكەنى ايتىلدى.
«وكىنىشكە قاراي, دۇنيە جۇزىندە وسىنداي دياگنوزى بار بالالاردىڭ سانى جىلدام ءوسىپ بارادى. مۇنداي جاعداي قازاقستاندا دا بار. دەمەۋشىلەردىڭ جانە «قازاقستان حالقىنا» قورىنىڭ كومەگىمەن وسى ماڭىزدى جۇمىستا بەلگىلى ءبىر ىلگەرىلەۋ بار. ۇكىمەت پەن اكىمدەر بۇل شارۋانى جانداندىرۋى قاجەت. قازاقستاندا ەرەكشە قاجەتتىلىگى بار ءاربىر بالانىڭ تولىققاندى ءبىلىم الۋعا مۇمكىندىگى بولۋى كەرەك. بۇل – وتە ماڭىزدى ماسەلە. سوندىقتان جىل سوڭىنا دەيىن وسىنداي بالالارعا جان-جاقتى قولداۋ كورسەتۋ ءىسىن رەتتەيتىن جاڭا زاڭ ازىرلەۋ كەرەك», دەدى قاسىم-جومارت توقاەۆ.
