فوتو: اقوردا
پرەزيدەنتتىڭ ايتۋىنشا, وتكەن جىلى ەلىمىزدىڭ بارلىق ايماعىندا بالالارعا پسيحولوگيالىق قولداۋ ورتالىقتارى اشىلىپ, زاڭدارعا ماڭىزدى وزگەرىستەر ەنگىزىلدى. تۇرمىستىق زورلىق-زومبىلىقپەن كۇرەسكە قاتىستى زاڭ قابىلدانعاننان كەيىن جاعداي ءبىرشاما جاقسارعانىمەن, شالعاي اۋدانداردا ءالى دە كەلەڭسىز وقيعالار ورىن الىپ جاتىر.
«جەرگىلىكتى بيلىك وكىلدەرى مەن قوعام بەلسەندىلەرى تۇرمىستىق زورلىق-زومبىلىقتىڭ الدىن-الۋ جۇمىسىنان شەت قالىپ وتىر. ونىڭ ۇستىنە, وسى باعىتتاعى جۇمىستار قازىر ءارتۇرلى قۇجاتپەن رەتتەلەدى. شاشىراڭقى بولىپ تۇر ءبارى. سونىڭ ءبارىن ءبىر جەرگە جيناقتاعان دۇرىس دەپ ويلايمىن. وسىعان وراي «قازاقستان بالالارى» اتتى ءبىرتۇتاس باعدارلاما قابىلداعان ءجون», دەدى مەملەكەت باسشىسى.
سونىمەن قاتار, پرەزيدەنت ءبىلىم مەن تاربيەنىڭ قاتار ءجۇرۋىنىڭ ماڭىزدىلىعىن اتاپ ءوتتى.
«وزىق ويلى ۇرپاق ءوسىرۋ ءۇشىن ءبىلىم مەن تاربيە ءاردايىم قاتار ءجۇرۋى كەرەك. اشىعىن ايتساق, بالا وقىتۋ ىسىندە بۇعان دەيىن بىلىمگە كوبىرەك نازار اۋدارىلدى. ال ۇرپاق تاربيەسىنە قاتىستى جۇيەلى ۇستانىم بولعان جوق. بۇل سالاعا ءتيىستى دەڭگەيدە كوڭىل بولىنبەي كەلدى. «تاربيەسىز بەرىلگەن ءبىلىم – ادامزاتتىڭ قاس جاۋى». سوندىقتان بىلىممەن قاتار تاربيەگە ايرىقشا نازار اۋدارۋ وتە ماڭىزدى», دەدى ول.
وسى ماقساتتا بىلتىر مەكتەپتەردە ء«بىرتۇتاس تاربيە» باعدارلاماسى ىسكە قوسىلعان ەدى. بۇل رەتتە مەملەكەت باسشىسى اتالعان قۇجاتتى بارلىق مەملەكەتتىك جانە جەكەمەنشىك ءبىلىم بەرۋ مەكەمەلەرىنە ەنگىزۋ قاجەتتىگىن ايتتى.
«جوبانىڭ تۇپكى ماقساتى – وتانشىل, ءبىلىمدى, جاسامپاز ۇرپاق تاربيەلەۋ. مۇنىڭ ءبارى – ادال ازاماتقا ءتان قاسيەتتەر. قۇرىلتاي مۇشەلەرى الداعى ۋاقىتتا وسى باعدارلامانى «ادال ازامات» دەپ اتاۋدى ۇسىنىپ وتىر. مەن بۇل ۇسىنىسپەن تولىق كەلىسەمىن», دەدى قاسىم-جومارت توقاەۆ.
