بابالارىمىز امال ايى تۋعاندا قىس بويى قاتىناس قيىنداعان, ۇزىلگەن جاقىن-جۇراعاتتىڭ جاعدايىن, مال-باس اماندىعىن بىلۋگە اسىعادى. ۇلكەن-كىشى بىرىنە-ءبىرى ىزەت كورسەتىپ, اۋىلىنا ارنايى بارىپ, سالەم بەرىپ باس سۇعادى. سالەمنەن باستالعان سىيلاستىق ءاز-ناۋرىزدى تويلاۋعا ۇلاسادى.
بىلتىر بەكىتىلگەن ناۋرىزناما ونكۇندىگى تۇجىرىمداماسى دا وسى ويىمىزدى قۋاتتايدى. 14 ناۋرىز كورىسۋ كۇنىنەن باستالعان مەرەكە ۇلتتىق قۇندىلىقتارىمىزدى ون كۇن بويى تۇگەندەپ, ناسيحاتىن ارتتىرىپ, ناۋرىزدى اتاپ وتۋمەن ۇشتاسادى.
ال كورىسۋ كۇنىنىن ەلىمىزدىڭ باتىس ءوڭىرى ءاۋ باستان بەلسەندى تويلايدى. بۇل كۇنى باتىس قاراتاۋ تاۋ جۇيەسىندە ورنالاسقان ماڭعىستاۋدىڭ ەڭ بيىك نۇكتەسى وتپان تاۋدا وت جاعىلادى. بەكەم بىرلىكتىڭ سيمۆولىنا اينالعان الاۋدىڭ تاريحى دا تاتۋلىق پەن قيىن-قىستاۋ كەزەڭدە جۇدىرىقتاي جۇمىلۋعا ۇندەيدى. وتپانتاۋ جاۋگەرشىلىك زاماندا حالىققا قورعان بولعان قاسيەتتى مەكەن. بۇگىندە وتپانتاۋدا «بىرلىك الاۋىن» جاعۋ مەرەكەنىڭ باستالعانىن اڭعارتادى. بۇل ساتتە ۇيدەگى ايەل-انالار, قىز-كەلىنشەك اتقارار شارۋا مەن ءداستۇر قالىپتاسقان. ءبىز وسى جايلى ماڭعىستاۋ وبلىسى, وڭدى اۋىلىنىڭ تۇرعىندارى, ءوسىپ-ونگەن وتەسىنوۆتەر اۋلەتىنىڭ كوركەم كەلىندەرىنەن سۇراپ بىلدىك.
وسى اۋلەتتىڭ ءتۇتىنىن 5 جىلدان بەرى تۇتەتىپ, الدىڭعى تولقىن ءۇردىسىن جالعاستىرىپ كەلە جاتقان جانعالي اقسىناي بالا شاقتان قالىپتاسقان قاعيدا بويىنشا كورىسۋ كۇنىن ەلەۋسىز قالدىرمايتىنىن ايتادى.
«ومىرىمىزدەگى تاتۋلىق پەن بىرلىكتىڭ سيمۆولىنا اينالعان مەرەكە دەر ەدىم. بۇل كۇنگە دەيىن جاڭارۋ باستالادى. وكپە-رەنىش ۇمىتىلىپ, العان قارىزدارىمىز بولسا سونى قايتارۋعا تىرىسامىز. الىس اعايىنمەن كورىسىپ, جاقىن جانمەن ەمىن-ەركىن ديدارلاساتىنىمىز ۇنايدى. ىزەتتىلىك پەن كىشىپەيىلدىلىكتىڭ كورىنىسى وسى تۇستا ايقىن كورىنەدى. بۇل ءداستۇر ءوز كەزەگىندە تاربيەلەپ وتىرعان ۇل-قىزىمىزعا دا ورنەكتى ونەگە بولماق. اعايىنىن باۋىرىنا باسقان مەيىرىمدىلىكتى كورىپ وسكەن ۇرپاق ادامزاتتىڭ ءبارىن سۇيۋگە ۇمتىلادى», دەگەن اقسىناي مەرەكەلىك داستارحاندى ازىرلەپ, اس-سۋدى قامداۋ دا مەرەكە مەرەيىن اسىرا تۇسەتىنىن تىلگە تيەك ەتتى. كەيىپكەرىمىز مەرەكە قارساڭىندا ەر مەن ايەل اتقاراتىن شارۋالار جۇرت جادىندا جاتتالعانىن اتاپ ءوتتى.
«بۇل مەرەكەگە دايىندىق ەرتەدەن باستالادى. ەر ادامدار قىستىق سوعىمىن دايىندايدى. ودان قالا بەردى ءۇي اينالاسىن رەتكە كەلتىرىپ, اعاش ەگۋ جۇمىستارىن جاسايدى. ۇيگە كەلگەن ءاربىر جانعا جاقسى تىلەگىن ارناپ, ۇلكەن كىسىلەر باتاسىن بەرەدى. سونداي-اق, مەرەكەدە ۇيىمداستىرىلاتىن شارالارعا جۇمىلا بىرىگەدى. ماسەلەن, 14 ناۋرىزدا وڭىرىمىزدە ءداستۇرلى تۇردە امال مەرەكەسى تويلانىپ كەلەدى. «وتپان تاۋ» مادەني-تاريحي كەشەنىندە ءار رۋدىڭ ادامدارى بىرىگىپ, ءۇي تىگىپ جاڭا جىلدى قارسى الۋعا دايىندالادى. بۇل – ەر ادامدار ءۇشىن ماڭىزدى جۇمىس بولماق. ال مەيرام قارساڭىندا ايەل ادامدار داستارقان قامىمەن جۇرەدى. داستارقانعا ۇلتتىق تاعامداردى ازىرلەپ, ارنايى ءداندى داقىلداردى قوسىپ ناۋرىز كوجە پىسىرەدى. جاڭا جىلعا ساقتاعان ءسۇر ەتىن اسىپ, قوناقتاردى كۇتۋگە دايىندالادى. ءبىزدىڭ ماڭعىستاۋدىڭ قىز-كەلىنشەكتەرى, ايەلدەرى, اجەلەرىنە دەيىن جاڭادان كويلەك تىكتىرەدى. الدىن الا بازار ارالاپ سىيلىقتىڭ ەڭ جاقسىسىن تاڭداپ, كەلگەن قوناققا ۇسىنۋعا دايىندايدى. ءۇيدىڭ ىشكى تازالىعى دا ايەلدەردىڭ موينىندا», دەيدى جانعالي اقسىناي.
ال اقسىنايعا شاڭىراقتاعى شاتتىقتى ەسەلەيتىن ءداستۇر-داعدىنى ەنەسى, مادەنيەت سالاسىنىڭ قىزمەتكەرى شاۋەنوۆا سارا شوعىقىزى ۇيرەتىپ ءجۇر. سارا شوعىقىزى مەرەكەنىڭ تويلانۋ توركىنىن ۇرپاقتارىنا ۇيرەتۋدى وزىنە پارىز تۇتادى.
«بۇل مەرەكەنىڭ وتباسىنداعى قۇندىلىعى جوعارى. وسىناۋ يگى ءداستۇردىڭ جالعاستىعىن, ءبىز ءۇشىن ماڭىزىن بالالارىما, نەمەرەلەرىمە تۇسىندىرۋدەن شارشاعان ەمەسپىن. بۇل كۇنگە دايىندىقتى ەرتە باستاۋدى, قىز بالالارعا اس ازىرلەي الۋ كەرەكتىگىن ۇنەمى ايتىپ وتىرامىن. بۇل كۇنى جاستاردىڭ ۇلكەندەرگە كورىسىپ, باتا الۋىنىڭ ءمانى بار.ء ۇي ىشىندەگى جاندار ءبىر-بىرىمىزبەن كورىسىپ, «جاسىڭ قۇتتى بولسىن» دەگەن تىلەكتەرىمىزدى ايتامىز. وتباسىنداعى يگى داستۇرلەردى مەن دە الدىڭعى تولقىننان ۇيرەندىم, كەلەر بۋىنعا قالپىن بۇزباي جەتكىزۋ مىندەتىمىز», دەدى ول.
جىل وتكەن سايىن كوكتەم جارشىسى كورىسۋ كۇنىنىڭ ءمان-ماعىناسى ايشىقتالىپ, تويلانۋ ايماعى كەڭىپ كەلەدى. مەرەكە مەرەيىن اسىرىپ, ۇرپاعىنا ۇلگى ەتىپ وتىرعان وتباسى ينستيتۋتىنىڭ قايماعى بۇزىلماسىن.
