ۇلىتاۋ ءوڭىرى سۋ تاسقىنى قاۋپى جوعارى ايماققا جاتادى. وبلىس اۋماعىنداعى 27 ەلدى مەكەندە سۋ باسۋ قاۋپى بار. ول جەرلەردە ەكى مىڭنان اسا ادام تۇرادى.
پرەمەر-ءمينيستردىڭ ورىنباسارى قانات الدابەرگەن ۇلى وڭىردەگى بوگەتتەر مەن سۋ قويمالارىنىڭ جايىمەن تانىستى. قاراكەڭگىر, سارىكەڭگىر, قاراتورعاي, سارىسۋ سەكىلدى ءىرى وزەندەردىڭ ارناسىن تىكۇشاق ارقىلى ارالاپ ءوتتى. بىلتىر ونداعان ءۇيدى سۋ باسقان جەزدى كەنتىنە بارىپ, جەزدى وزەنى ارناسىنىڭ جاعدايىن تەكسەردى. وندا ساناتسيا, ارنانى تازارتۋ جانە جاعالاۋدى نىعايتۋ (2 شاقىرىم) جۇرگىزىلىپ جاتىر.
كەڭگىر جانە جەزدى سۋ قويمالارىندا بولىپ, جەزدى اۋىلىنداعى قورعانىس بوگەتتەرىن كوتەرۋدى تاپسىردى. مالشىباي, بوزتۇمسىق, قورعاسىن اۋىلدارىن, قوستاناي وبلىسىنىڭ شەكاراسىنا دەيىن ارالاپ شىعىپ, كەنەنباي جانە قارساقباي بوگەتتەرىنە تەكسەرۋ جۇرگىزدى. سارىسۋ وزەنىنىڭ بويىندا ورنالاسقان جىلاندى جانە جاڭاباس ەلدى مەكەندەرىن ارالادى.
بىلتىر وبلىسقا قارايتىن ءۇش اۋىلدا 22 ءۇيدى سۋ باسقان. بيىل وسى ايماقتار ەرەكشە باقىلاۋعا الىنعان. ۇلىتاۋ وبلىسى اكىمى داستان رىسپەكوۆتىڭ ايتۋىنشا بيىل وبلىس بويىنشا 15,7 شاقىرىم بوگەت جانە 115 مەتر ارىق سالىندى.5,8 شاقىرىم كانال, 1,3 شاقىرىم ارىق جانە 281 بىرلىك سۋ وتكىزۋ قۇبىرلارى تازارتىلدى. تالدىساي وزەنىنىڭ ارناسى تازالانىپ, جىلاندى اۋىلىنداعى سارىسۋ وزەنىنىڭ جاعالاۋىن بەكىتۋ بويىنشا شارالار قابىلدانعان.
ۆيتسە-پرەمەر ق.بوزىمباەۆ «ارنايى جۇرگىزىلگەن تالداۋ ناتيجەسى بەس-التى اۋىلعا قاۋىپ ءتونىپ تۇرعانىن كورسەتتى. سوندىقتان وسى اۋىلدار قاتاڭ باقىلاۋعا الىنسىن. ەگەر قاجەت بولسا بوگەت تۇرعىزىپ, ارىق قازۋ كەرەك. قار شىعارۋ جۇمىسىن جەدەلدەتىپ, بۇل مىندەتتى 10-15 كۇندە اياقتاۋ قاجەت. ءار اۋىلدا كەمىندە 10 ارنايى تەحنيكا مەن جۇزدەن استام جەكە قۇرام توتەنشە جاعدايعا ءازىر تۇرۋ كەرەك», دەپ قاداپ ايتىپ, وتىن, ازىق-ت ۇلىك جانە مەديتسينالىق قۇرالدار رەزەرۆتەرىن دايىنداۋدى قامتاماسىز ەتۋگە تاپسىرما بەردى.
