تجم كۇشتەرى مەن قۇرالدارىنىڭ سۋ تاسقىنىنا قارسى رەزەرۆى دايىندالدى

شتاب وتىرىسىندا سۋ تاسقىنىنىڭ الدىن الۋ شارالارى تالقىلاندى. 

قازىرگى ۋاقىتتا تجم قۇرامىندا 37 مىڭنان استام ادام, 13 مىڭ بىرلىك تەحنيكا, 4 مىڭنان استام سۋ ايداۋ قوندىرعىسى جانە 640 بىرلىك ءجۇزۋ قۇرالى بار ازاماتتىق قورعاۋ قىزمەتتەرىنىڭ كۇشتەرى مەن قۇرالدارىن توپتاستىرۋ ورىندارى بەلگىلەندى. تجم اۋە كەمەلەرى – تاۋلىك بويى كەزەكشىلىككە قويىلعان. سونىمەن قاتار جالپى سانى 1 مىڭعا جۋىق قىزمەتكەر, 120 بىرلىك ءتۇرلى ماقساتتاعى تەحنيكا, 123 سۋ ايداۋ جانە 39 بىرلىك ءجۇزۋ قۇرالى بار تجم كۇشتەرى مەن قۇرالدارىنىڭ رەزەرۆى دايىندالعان

«مەملەكەت باسشىسى سۋ تاسقىنىنىڭ الدىن الۋ شارالارىنا باسىمدىق بەرۋدى تاپسىردى. ۇكىمەت سۋ تاسقىنىنىڭ الدىن الۋ جانە كەرى اسەرىن جويۋعا باعىتتالعان ۇيىمداستىرۋشىلىق-پروفيلاكتيكالىق, ينجەنەرلىك-تەحنيكالىق جانە جەدەل شارالار قابىلداپ جاتىر. دەگەنمەن, ايماقتاردىڭ دايىندىعى جوعارى دەڭگەيدە بولۋى كەرەك.
اكىمدىكتەر ەلدى مەكەندەردى تاسقىن سۋدان قورعاۋ ءۇشىن كەشەندى شارالار قابىلداۋى ءتيىس. ولاردىڭ اينالاسىن توپىراق ۇيىندىلەرىمەن بەكىتىپ, ءبىرىنشى كەزەكتە سىرتتان كەلەتىن سۋدى بوگەۋ كەرەك. سۋ وتكىزۋ قۇرىلىستارى, كوپىرلەر مەن تيۋبينگتەر قاتىپ قالعان مۇز بەن قوقىستاردان تازارتىلىپ, قارعىن سۋدى وتكىزىپ جىبەرۋگە دايىن بولۋى ءتيىس. وزەن ارنالارىن تازارتىپ, بەكىتۋ قاجەت. دالا وزەندەرىنىڭ بىتەلۋگە اينالعان جەرلەرىن كەڭەيتۋ كەرەك.
سۋ باسۋ قاۋپى جوعارى ەلدى مەكەندەردە كۇشتەر مەن قۇرالداردى, ونىڭ ىشىندە ءتيىستى تەحنيكانى دايىنداۋ قاجەت. ەۆاكۋاتسيا ورىندارىن انىقتاڭىزدار. ولار تىرشىلىككە قاجەتتى بارلىق قۇرالدارمەن جابدىقتالۋعا ءتيىس», دەگەن پرەمەر-مينيستر بىرقاتار تاپسىرمالار بەردى.