قايعىلى وقيعا بىلتىر 10-شى قاراشادا ەسىل اۋدانىنىڭ ياۆلەنكا اۋىلىندا بولعان. 30 جاستاعى جىگىت ءوز اناسىن ۇرىپ ءولتىرىپ, كەيىن قىلمىسىن جاسىرۋ ءۇشىن ۇيگە ءورت قويعان.
اتالعان ءىس سقو قىلمىستىق ىستەر جونىندەگى مامانداندىرىلعان اۋدانارالىق سوتىندا جابىق جاعدايدا قارالدى. ويتكەنى, ايىپتالۋشىنىڭ پسيحيكالىق اۋىتقۋى بار. ول بىردەن الماتى وبلىسىنداعى ەمدەۋ مەكەمەسىنە جىبەرىلگەن. سوندىقتان ۇكىم وقىلعاندا سوت زالىندا بولعان جوق. تەك ونىڭ زاڭدى وكىلى عانا قاتىستى.
«سوت قاۋلىسىمەن كونستانتين بەلوپۋحوۆ 99-باپتىڭ 2-بولىگى 5-تارماعى, 108-باپتىڭ 1-بولىگى, 202-باپتىڭ 2-بولىگى, 1-تارماعىندا كوزدەلگەن قاۋىپتى ارەكەتتەردى اقىلسىز كۇيدە جاساعانى ءۇشىن قىلمىستىق جاۋاپتىلىقتان بوساتىلادى. قر قك-ءنىڭ 16-بابىنا سايكەس ول الماتى وبلىسى تالعار اۋدانى اقتاس كەنتىندە ورنالاسقان مامانداندىرىلعان پسيحياتريالىق ستاتسيونارعا جىبەرىلدى. وعان ەمدەۋ تۇرىندەگى مەديتسينالىق سيپاتتاعى ماجبۇرلەۋ شارالارى تاعايىندالسىن», — دەدى ۇكىمدى وقىعان سقو قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ەرلان نۇرشارىپوۆ.
كەيىن شىعارىلعان شەشىمدى تۇسىندىرگەن ەرلان نۇرشارىپوۆ كونستانتين بەلوپۋحوۆتىڭ سوزىلمالى پسيحيكالىق اۋرۋمەن اۋىرعانىن ايتتى. ونى جۇرگىزىلگەن ساراپتاما قورىتىندىسى دا كورسەتكەن. ياعني, ول قىلمىس جاساعان ۋاقىتتا ءوز ارەكەتتەرىنە ەسەپ بەرە الماعان.
ايتا كەتەيىك, 30 جاستاعى كونستانتين بەلوپۋحوۆ اناسىنا قوناققا كەلگەن. ول رەسەيدىڭ ومبى قالاسىندا تۇرادى.
