تاكسي قىزمەتىنە جەڭىلدەتىلگەن سالىق رەجيمى ەنگىزىلمەك

2025 جىلعى 20 اقپاندا ماجىلىسكە ۇسىنىلعان جاڭا سالىق كودەكسى جوباسىنا ەنگىزىلگەن تۇزەتۋلەرگە سايكەس, تاكسي جۇرگىزۋشىلەرى ءۇشىن سالىق جۇكتەمەسى ارتپايدى. ولارعا ققس جانە باسقا دا سالىقتار سالىنبايدى, سونداي-اق جەكە تابىس سالىعىنىڭ مولشەرلەمەسى نولگە تەڭ بولادى. تاكسي جۇرگىزۋشىلەرى تەك 4% مولشەرىندەگى بىرىڭعاي تولەمدى تولەيدى. بۇل تولەمگە زەينەتاقى جارنالارى, الەۋمەتتىك اۋدارىمدار جانە مەديتسينالىق ساقتاندىرۋ كىرەدى.

جاڭا جۇيەنىڭ ارتىقشىلىقتارى:

• تاكسي جۇرگىزۋشىلەرىنە جەكە كاسىپكەر رەتىندە تىركەلۋدىڭ قاجەتى جوق;
• تاكسي پاركتەرىنىڭ دەلدالىنسىز, ينتەرنەت-پلاتفورما وپەراتورلارىمەن (مىسالى, ياندەكس جانە ت.ب.) تىكەلەي جۇمىس ىستەۋگە مۇمكىندىك بەرىلەدى;
• سالىق جۇكتەمەسى جەڭىلدەيدى, تەك بىرىڭعاي تولەم ارقىلى مىندەتتەمەلەر ورىندالادى.

قر قارجى مينيسترلىگى مەملەكەتتىك كىرىستەر كوميتەتىنىڭ مالىمەتىنشە, 2024 جىلدىڭ قورىتىندىسى بويىنشا تاكسي قىزمەتى بويىنشا 15 مىڭعا جۋىق سالىق تولەۋشى جەڭىلدەتىلگەن دەكلاراتسيا رەجيمىن قولدانعان. ولاردىڭ ىشىندە تەك 924 سالىق تولەۋشى 15 ملن تەڭگەلىك شەكتى سومادان اسقان. ياعني, ققس تولەۋ مىندەتتەمەسى تەك ءىرى تاكسوپاركتەردىڭ 6%-نا عانا اسەر ەتەدى.

مينيسترلىك تاكسي نارىعىنداعى تاريفتەر باسەكەلەستىككە, سۇرانىس پەن ۇسىنىسقا بايلانىستى قالىپتاساتىنىن اتاپ ءوتتى. سونىمەن قاتار, ينتەرنەت-پلاتفورما وپەراتورلارى ققس تولەۋشى بولىپ تابىلادى, بۇل دا قىزمەت قۇنىنا ىقپال ەتەدى.